Na kulturnym polu nazhonjamy w Serbach wjele, štož je nam blisko a lubo. Ale tež to, štož je daloko preč, zamóže nas jimać a nam nowe impulsy dawać. Wo tym so w tutej rubrice pisa.

Kóžde lěto so dźiwam a wjeselu, hdyž słyšu wo nowych wopytowarskich rekordach na Lipšćanskich knižnych wikach. Lětsa bě jich wjace hač 300 tysac fanow. Na druhej stronje spaduja nakłady wudatych a předatych knihow. Knižna branša stona. Kak so to znjese? Mi so zda, zo stej to skerje wobě stronje jedneje medalje. Składnostnych čitarjow je mjenje. Ćim sylnišo so jadro za knihu ­angažuje.