Iran poskićuje rozmołwy
New York (dpa/SN). Iran je USA znowa poskićił jednanja wo móžnym kóncu wójny pokročować. Posrědkowarjo su knježerstwu USA plan přepodali, w kotrymž je pječa zapisane, zo móhli Hormuski přeliw w běhu sydom dnjow zaso wotewrić. Za to pak měli USA wěste žadanja spjelnić, rjekny iranski wonkowny minister Abbas Araghtschi nowinomaj „New York Times“ a „Financial Times“ na kromje hłowneje zhromadźizny Zjednoćenych narodow.
W parlamenće hrozy zwada
Magdeburg (dpa/SN). Hišće do prěnjeho posedźenja noweho krajneho sejma w Saksko-Anhaltskej hrozy zwada frakcijow w parlamenće. Dźensa, pjatk, zetkaja so zastupjerjo AfD, CDU, SPD, Zelenych, Lěwicy a BSW na radu starostow. Tam chcedźa wo jednanskim porjedźe parlamenta rozsudźić. Při tym pak je tójšto rozdźělnych pozicijow, na přikład wo wulkosći wuběrkow.
Schwesig žada sej zetkanje
Składnostnje 70. róčnicy załoženja wojerskeho lětarstwa w ZRN su ...
Schuster za nowe prawo azyla
Strachi zwonka a znutřka
Pólska bědźi so z planowanymi a woprawdźitymi nadpadami
Waršawa (dpa/SN/MG). Palacy so terminal satelitoweje posłužby Starlink za internet bě prawdźepodobnje wuslědk akta sabotaže, rěka we wozjewjenju pólskeho knježerstwa. Srjedu wječor běchu so anteny naprawy we wsy Wola Krobowska něhdźe 50 kilometrow južnje Waršawy palili, zdźěli rěčnik wohnjoweje wobory powěsćowej agenturje PAP. Woheń su spěšnje zhašeli. Mnoho nětko na to pokazuje, zo bě zamiškrjeny woheń zaměrny nadpad na staciju, kotraž mjez druhim wěste zastaranje z internetom w Ukrainje zaruča, rjekny pólski nutřkowny minister Krzysztof Gawkowski sćelakej TVP. Hišće njeje doskónčnje jasne, hač Ruska za nadpadom tči. Muster pak so derje do noweje doktriny nadpadow hodźi, měni minister. Pólska a staty na Baltikumje hižo dlěje tukaja, zo móhła Ruska stratow w Ukrainje dla prowokacije na terenje NATO forsěrować.
Žane kopolaki
Heidenau (dpa/SN). Měšćanska rada Heidenauwa je rozsudźiła, zo w měsće blisko Drježdźan hižo žane kopolaki kłasć njebudu, kotrež maja na wopory nacionalsocializma dopominać. Namjet měšćanskich radźićelow AfD a CDU běchu wčera wječor z wjetšinu hłosow přiwzali, zdźěli měšćanski zarjad. Za namjet bě 13 radźićelow hłosowało, přećiwo njemu šěsć, jedna wosoba so hłosa wzda. Namjet bě frakcije přesahowaca iniciatiwa, mjez druhim tež z frakciju „Zwjazk Hornje Łobjo za wjace demokratije“. Zarjadnistwo města bě radźe poručiło namjet wotpokazać, wšako su kopolaki najwidźomniša forma spominanja w měsće. Frakcije namjetuja, wotnětka na sewjernym kěrchowje města na wopory spominać.
Christoph Heubner, eksekutiwny wiceprezident mjezynarodneho Auschwitzoweho komiteja rjekny w zdźělence: „Tole je šamały pospyt wopory nacijow w Heidenauwje zaso z města wuhnać.“ Tež podpěru CDU wón raznje zasudźuje.
Lěwica rozsudźi wo rozmołwach
Forum akcenty sadźił a na bohatosć Łužicy pokazał
Mužakow (SN/bn). Mjeztym štwórty Łužiski kulturny forum je so minjenu wutoru w Mužakowskim hrodźe wotměł. Zarjadowanje krajow Braniborska a Sakska měrješe so na akterow a akterki z wuměłstwa, kultury, kreatiwneho hospodarstwa, kulturneho zarjadnistwa a kulturneje politiki we Łužicy a měješe tomu słužić, „zaměry Kulturneho plana Łužica sćěhować“, w zdźělence Koordinowanišća za wuwiće kultury we Łužicy rěka. Ćežišćo lětsa bě, nawjazujo na diskusije zašłych kulturnych forumow „wěnować so wosebitym kwalitam Łužicy a jeje bohatej, mnohostronskej kulturnej krajinje“ a diskutować wo tym, „kak hodźeli so tudyše potenciale dale wuwiwać a z kotrymi idejemi, formatami a srědkami móhli region slědowacym generacijam naslědnje zawostajeć“.
Bywšu situaciju mjeńšin rozjimali
Zabrze (SN). „Mjeńšiny za železnym zawěškom. Balast abo žórło identity?“ běše tema mjezynarodneje konferency w pólskim měsće Zabrze we wójwodstwje Šleska, na kotrejž je so srjedu a štwórtk něhdźe dwanatk wědomostnicow a wědomostnikow z Pólskeje, Němskeje, Čěskeje a Madźarskeje wobdźělił. W srjedźišću steješe rozdźělna politika komunistiskich statow napřećo swojim narodnym mjeńšinam w dobje zymneje wójny. Referenća rozjimachu mjez druhim tehdyšu situaciju pólskeju mjeńšinow Kašubow a Łemkow abo mjeńšiny Němcow w Rumunskej, Madźarskej a něhdyšej Juhosłowjanskej.
Za Serbski institut, kotryž konferencu zhromadnje ze slědźenskim centrumom němskeje mjeńšiny w Opolu zarjadowaše, wobdźělištaj so stawiznarjej dr. Edmund Pjech a dr. Friedrich Pollack. Pod hesłom „Mjez spěchowanjom a kontrolu – wosebite pady“ přednošowaše dr. Edmund Pjech wo mjeńšinowej politice NDR napřećo Serbam. Dr. Friedrich Pollack moderěrowaše jednu z fachowych podijowych diskusijow konferency.
To a tamne (25.09.26)
Na rasistiske nadpady před 35 lětami spominali
Wojerecy (AK/SN). „Nazyma 1991 – Wojerecy njezabudu – dopominamy so“ je na pomniku we Wojerowskim Centralnym parku napisane. Tam su so wčera wobydlerjo a zastupjerjo města zešli, zo bychu na wopory nadpadow Wojerowčanow na přebytki wukrajnych dźěłaćerjow a požadarjow wo azyl před 35 lětami spominali. Při tym bě so 32 ludźi z wukraja zdźěla ćežko zraniło.
Wojerowski wyši měšćanosta Torsten Ruban-Zeh (SPD) předčita mjez druhim postrowne słowa bywšeho dźěłaćerja Davida Macouwa z Mosambika, kotryž bě ataki wosobinsce sobu dožiwił.
Na tragiske podawki mjez 17. a 23. septembrom 1991 nochcedźa Wojerowčenjo zabyć. To zwuraznjeja z wjacorymi projektami na wšelakich městnach w měsće. Jedyn z nich je wustajeńca z titulom „See my story. Copyright by Madgermanes“ we Łužiskim centeru, kotraž předstaja wosudy něhdźe 20 000 mosambikskich dźěłaćerjow w času mjez 1979 a 1990 w NDR. Dohromady dwanaće fotografiskich a šěsć widejowych portretow tutych dźěłaćerjow wopytowar tam nadeńdźe.
