Berlin (dpa/SN). W zwisku z wólbami krajnych sejmow w Saksko-Anhaltskej, Mecklenburgsko-Předpomorskej a w Berlinje w septembrje zwěsćeja němske wěstotne zarjady dźeń a wjace zaměrnych šćuwacych kampanjow ze stron Ruskeje w socialnych syćach. We wotpowědnych widejach diskredituja politikarjow a strony, kotrež Ruskej a politice Putina přichilene njejsu, zdźěla zarjady. Potrjechene su wšitke strony nimo AfD a BSW. Dotal su wjacore sta tajkich widejow registrowali. Wužiwajo oficialne loga němskich medijow spytaja zhotowjerjo widejow wužiwarjam serioznosć a wěryhódnosć powěsće sposrědkować. Po měnjenju němskich wěstotnych ekspertow su aktualne kampanje dźěl tak mjenowaneje operacije Matrjoška, kotruž běchu hižo při lońšich wólbach zwjazkoweho sejma wobkedźbowali. Do wobsahoweje strategije ruskich akterow słuša mjez druhim pačenje wobydlerstwa na wuchodźe a zapadźe republiki abo diskreditowanje lokalnych politikarjow, na přikład z twjerdźenjom, zo su zjawne pjenjezy znjewužiwali.

Přeměnja Hornja Łužica, naša domizna, runje swoje wobličo? Po tym zo w Zhorjelcu wot tohole lěta dźěle za pancery produkuja a zo ma so pola Njedźichowa bórze wójsko zasydlić, chce čěski zawod nětko tež hišće blisko Budyšina bórze municiju dźěłać. To so prašam: Što přińdźe jako přichodne?

Wězo zwisuja z tajkim zasydlenjom dźěłowe městna, inwesticije a nowe perspektiwy za naš region, kotryž poprawom hustohdy podarmo wo tajke industrijowe předewzaća wojuje. A tola nastawa zaćišć, zo so Hornja Łužicy krok po kroku k centrumej němskeje zakitowanskeje industrije wuwiwa.

Wěstota je hladajo na aktualne wuwića po wšěm swěće wažna tema. Přiwšěm pak njesměli hospodarske šansy to najwažniše a jeničke měritko być!

Hornja Łužica je bohata – ze swojej krajinu, z kulturu a z atrakcijemi. Chce być dowolowy region. A nic region, w kotrymž so brónje produkuja! Stefan Šmit

Mnichowski awtotwarc Sono Motors je kónc julija insolwencu přizjewił. Přede­wzaće běše dla swojeho wizionarneho elektroawta z mjenom Sion znate, kotrehož karoserija ze solarnych bańkow wobsteji. Zamołwitym pak so poradźiło njeje, awto w seriji produkować. Předewzaću zbywa nětko mnoho nowych techniskich wuwićow a patentow, kotrež chce zajimcam předać.

Nowy wirus, kotryž je dotal w Africe, Awstralskej a Aziji rozšěrjeny, je so do Europy zadobył. Tuchwilu rozmnoža so wón mjez stadłami howjadow na juhu Němskeje. Inficěrowane skoćata maja zymicu a židlawu, dejki dawaja tohodla tež mjenje mloka. W něhdźe 100 ratarskich zawodach w južnobadenskim regionje su wirus, kotryž kuntwory přenošuja, zwěsćili. Schorjene skoćata pak su infekciju přetrali. Za čłowjeka je wirus njestrašny.

Berlin (dpa/SN). Po studiji najwjetšeje chorobneje kasy Němskeje, Techniskeje chorobneje kasy (TK), su dźěławi loni telko lěkow zapisanych dóstali kaž nihdy do toho. Dohromady 6,2 milionaj ludźi je recepty za wjace hač 34 milionow preparatow zapodało. Cyłkowna suma medikamentow je so porno předlětu wo něhdźe 2,6 procentow zwyšiła. Najhusćišo buchu recepty za medikamenty w zwisku ze schorjenjemi wutroby zapodate.

Zhorjelčan w USA zajaty

Miami Beach (SN). Stefana Menzela, Zhorjelskeho předewzaćela a něhdyšeho mějićela kasina kaž tež łódźe na Bartonjanskim jězoru, su w měsće Miami Beach w USA zajeli. Wo tym rozprawjeja Sakske Nowiny. Menzel dyrbješe tež w Němskej nachwilnje do jastwa, dokelž wobsteješe podhlad ilegalneje hry wo zbožo, bank­rota a zawlečenja insolwency. W USA su jeho nětko wobwinowanja we wobłuku zarjadnisko-prawniskeho procesa dla zajeli.

Skorža přećiwo Trumpej