Fanam hroža konsekwency
Drježdźany (dpa/SN). Po krawalach 4. apryla w hrě druheje koparskeje ligi mjez mustwomaj Dynamo Drježdźany a Hertha BSC hrozy Drježdźanske towarstwo wobdźělenym fanam ze stadionowym zakazom a sćazanjom čłonstwa. Prezident Ronny Rehn wuzběhny, zo njemóža wosoby z tajkimi přeńdźenjemi dlěje dźěl sportoweho zhromadźenstwa być. Jednaćel Stephan Zimmermann připowědźi nimo chłostanskoprawniskeho přesćěhanja konsekwentne postupowanje ze stadionowym zakazom.
Paralelnje k tomu předźěłaja wěstotny koncept, mjez druhim z wjetšimi wěstotnymi wobłukami, sylnišej prezencu policije na wysoko riskantnych hrach a přidatnej porjadowej słužbu we wobłuku K-bloka.
Nuzu w Sudanje njezabyć
Lutowanske naprawy předpołožiła
Berlin (dpa/SN). Po planach zwjazkoweje ministerki za strowotu Niny Warken (CDU) maja pacienća w přichodźe z wyšimi wudawkami za swoju strowotu ličić. Wčera je wona plan lutowanskich naprawow předstajiła. Zaměr toho je, zo přinoški za chorobne kasy dale njestupaja. Naprawy je ministerka na zakładźe doporučenjow fachoweje komisije zdźěłała.
Tak měli ludźo w přichodźe w apotekach wjace za medikamenty připłaćić. Homeopatiske wukony chorobne kasy hižo njepřewozmu. To płaći tež za přepytowanje kože, tak mjenowany screening raka kože. Dotal chorobne kasy přepytowanje kóždej dwě lěće zapłaća. Změnić ma so tež sobuzawěsćenje mandźelskich, štož je za potrjechenych tuchwilu bjezpłatne. Wot lěta 2028 maja woni swójski přinošk we wobjimje 3,5 procentow zapłaćić. Chorownje, lěkarjo a farmacijowe koncerny maja so tohorunja na změny nastajić.
Naćisk zakonja chce koalicija CDU a SPD 29. apryla kabinetej předpołožić. Zwjazkowy sejm drje budźe do lěćneje přestawki wo tym wuradźować. Naprawy pak su mjeztym hižo wulku kritiku zbudźili.
Prošu wjac zmužitosće!
To a tamne (15.04.26)
Lochke zemjerženje su fachowcy wčera wječor w regionje Lipsk/Groitzsch zwěsćili. Zemjerženje měješe nisku hódnotu 3,2. Po prěnich wobličenjach geofyzikarjo Freibergskeje Hórnistwoweje akademije z toho wuchadźeja, zo ležeše epicentrum rženja mjez Neukieritzschom, Lucka a Groitzschom. We wobkruhu něhdźe 60 do 70 kilometrow su ludźo třasenje zemje wčera pytnyli.
Sobudźěłaćerjej třěchikryjerskeho zawoda staj wčera popołdnju w hessenskim Altenhagenje třoch muži wobkedźbowałoj, kotřiž so do jězdźidła jeju firmy zadobychu a dźěłowy grat pokradnychu. Třěchikryjerjej měještej z rěbla najlěpši wuhlad. Wonaj dołho njechabłaštaj a spytaštaj skućićelow popadnyć, štož so jimaj tež poradźi. Dweju paduchow staj rjemjeslnikaj zadźeržałoj, doniž policija njepřijědźe.
Merz z Israelom telefonował
Berlin (dpa/SN). Zwjazkowy kancler Friedrich Merz (CDU) je do zahajenja politiskich rozmołwow mjez Israelom a Libanonom z israelskim ministerskim prezidentom Benjaminom Netanjahuwom telefonował. Merz jeho pohonjowaše, z měrowymi rozmołwami pokročować a dołhodobny měr na juhu Libanona docpěć. Hisbollah dyrbjała swoje brónje wotedać. Tež wonkowny minister Johann Wadephul (CDU) wupraja so za wotputanje a nowe rozmołwy.
Vance wuradźowanja chwali
Washington (dpa/SN). Rozmołwy mjez USA a Iranom su po słowach wiceprezidenta USA JD Vancea na dobrym puću a su k prěnim wuslědkam wjedli. Nětko je Iran na rjedźe, rjekny Vance we Washingtonje sćelakej Fox News. Najebać diferency wuwiwa so tójšto do praweho směra. Wuradźowanja w Islamabadźe su přiwšěm zwrěšćili, wosebje iranskeho atomoweho programa dla. „Iran je so hibał, ale nic daloko dosć“, Vance rjekny.
Testuja nowe rakety
We wobłuku swojeho wopyta w Algeriskej je bamž Leo XIV. wčera při ...
Lěwica kritizuje naprawy koalicije
Berlin (dpa/SN). Z raznej kritiku je Lěwica na připowědźene naprawy knježerstwa w boju přećiwo wysokim płaćiznam ćěriwa reagowała. Znižić dawk na energiju je na dobro wolijowych koncernow, rjekny předsydka frakcije Lěwicy Heidi Reichinnek w Berlinje. A tak mjenowany krizowy bonus je wotwisny wot dobreje wole dźěłodawarja a rentnarjam, studowacym a bjezdźěłnym scyła ničo njepřinjese.
„Ludźo w našim kraju njewědźa sej hižo žaneje rady a knježerstwo znowa pokazuje, zo nochce abo njeje kmane, rozrisanje namakać“, Reichinnek měni. Zo sej wot bohatych a dobyćerjow krizy wjace nježadaja ma wona za „historiske zaprajenje“. Z pjenjezami móhli energijowy krizowy fonds natwarić.
Lawrow w Chinje wuradźuje
Peking (dpa/SN). Ruski wonkowny minister Sergej Lawrow je do chinskeje stolicy Pekinga dolećał, zo by hladajo na wójnski konflikt na Bliskim wuchodźe zhromadne dźěło z Chinu pohłubšił. Po informacijach wonkowneho ministerstwa w Moskwje je chinski wonkowny minister Wang Yi dnjowemu porjadej přihłosował. Po tym chcetaj ministraj wo połoženju we wójnje Ruskeje přećiwo Ukrainje wuradźować a najnowše wuwiće na Bliskim wuchodźe wuhódnoćić. Hłowny zaměr je po słowach Lawrowa, stejišći Ruskeje a Chiny wothłosować a zhromadnje postupować.
W Chinje su mjeztym zastupjerjow dalšich krajow witali, kiž su wot wójny USA přećiwo Iranej potrjechene.
