Hač změja dźěći-serbšćinarjo 3. lětnika na Zejlerjowej zakładnej šuli we Wojerecach dale wučbu serbšćiny na wysokim niwowje? Toho sym sej wěsta! Přetož wučerka, kotraž jich wuwučuje, wostanje po dotalnych informacijach ta, kotraž bě je dotal jako serbsku skupinu přewodźała. Njejsym pak sej wěsta, hač so rozměr serbskosće zachowa. Wšako so jich wšědny swět na šuli změni. Dotal běchu dźěći w serbskim hněžku přewažnje němskeho swěta šule schowane. Wučerka rěčeše z holcami a hólcami po wjetšinje cyły šulski dźeń serbsce. Nětko pak su w rjadowni, w kotrejž wjetšina šulerjow serbsce njewuknje. Z tym je škitany serbski rěčny rum fuk a nimale połtřeća lěta natwarjeny raj so puknje kaž frinkolacy mydliznowy pucher. Tež Syć za serbsku rěč a regionalnu identitu (Zari) poćerpi stratu. Mjez staršimi šulerjow su někotři tamniše kursy serbšćiny wopytali, zo bychu ze swojimi dźěćimi serbsce rěčeć móhli. Hač to dale móža? Milenka Rječcyna

Wšěch swjatych je jedyn z najwažnišich cyrkwinskich swjatych dnjow w Pólskej. Dny do 1. nowembra je w susodnym kraju wjele dróhow zatykanych, dokelž chcedźa wšitcy ludźo rowy swojich najblišich přiwuznych wopytać a w modlitwje na nich spominać. Za to je z tójšto kwětkami a swěčkami wosebje pyšnje wozdebjeja. Wječor nadeńdźeš na pólskich pohrjebnišćach hustohdy „morjo swěčkow“. Kaž tule na wobrazu w Zgorzelecu a kaž je to tež w katolskej Hornjej Łužicy z wašnjom, wosa­dny farar rowy ze swjećenej wodu požohnuje. Foto: Matthias Wehnert

Byk Achilleo a wosoł Patroclo stej mjez slědźerjemi uniwersity w Pisy zadźiwanje budźiłoj. Hačkuli móhłoj sej muskej skoćeći w swojej wokolinje bjeze wšeho partnerku swójskeje družiny wuzwolić, pěstujetej hižo dlěši čas mjezsobny lubosćinski poćah. Wo tym rozprawjeja italscy wědomostnicy w fachowym časopisu Current biology. „Matej intensiwne seksuelne interakcije a dobre wobstajne mjezsobne socialne styki“, woni podšmórnu.

Spisowaćel a moler Janosch je wčera w starobje 95 lět w swojim domje na španiskej kupje Teneriffje zemrěł. To nawoda nakładnistwa, w kotrymž su jeho knihi wuchadźeli, Bernhard Feil wčera w nowinskej zdźělence w nadawku swójby zdźěli. Janoschowe ilustrowane dźěćace knihi wo tigrje a baru drje su po wšěm swěće znate. Dohromady je wón 150 w 40 rěčach wušłych knihow spisał.

Berlin (dpa/SN). Bio-ratarstwo w Němskej dale rosće, ale pomału. To je lětuši facit zwjazkoweho ratarskeho ministerstwa. Podźěl ekologisce wobhospodarjeneje płoniny wučinja tuchwilu 11,4 procenty cyłkowneje agrarneje přestrjenje a je z tym porno předlětu wo 1,9 milionow hektarow rozrostł. Ličba bio-zawodow pak je so snadnje na 28 150 znižiła. Tole wotpowěduje podźělej 11,2 procentow wšěch ratarskich zawodow w Němskej.

Merz chce žonu na čole Zwjazka

Berlin (dpa/SN). Zwjazkowy kancler Friedrich Merz (CDU) je so za to wuprajił, zo ma žona tuchwilneho zwjazkoweho prezidenta Franka-Waltera Steinmeiera w zastojnstwje naslědować. „W prašenju, zo dyrbi to žona być, sym rozsudźeny“, praji wón wčera na njezjawnej konferency wokrjesnych předsydow CDU w Berlinje. Konkretnu „zhromadnu kandidatku z politiskeje srjedźizny“ chce stronje bórze namjetować, wón doda.

Wutwar lětanišća wotpokazuja