Pirna (SN). Sakski statny lěsny zawod Sachsenforst je zasadźenje helikopterow kołowokoło skalneho jewišća w Rathenje a jězora Amselsee minjeny pjatk zakónčił. Helikoptery su tam štomy, kotrež je sylne njewjedrjo kónc julija spowaliło, rumowali. Rumowanske dźěła z powětra w ćežko přistupnych wotrězkach běše na tajke zasadźenja specializowana awstriska firma dwaj tydźenjej po njewjedrje přewzała. Cyłkownje je na kóncu něhdźe 2 000 krutych metrow drjewa z potrjechenych kónčin wottransportowała.

Spěšne wotstronjenje lěsnych škodow njeje jenož hladajo na spřistupnjenje turistisce woblubowaneho dźěla Sakskeje Šwicy wažne. Wone ma masowemu rozmnoženju skórnika zadźěwać. Wot tutoho tydźenja přewjedźe zawod Sachsenforst tu poslednje rumowanske dźěła z wotpowědnej swójskej konwencionelnej techniku. Cil je, zo jězor Amselsee wot kónca oktobra sem zaso za turizm wotewru. Předstajenja skalneho jewišća w Rathenje pak móža zajimcy hakle w klětušej sezonje wot srjedź meje zaso wopytać.

Bremen (dpa/SN). Po cyłej Němskej su sobotu, 3. oktobra, na zjednoćenje Němskeje spominali. Dokelž steji zwjazkowy kraj Bremen tuchwilu na čole zwjazkoweje rady,­ běše kraj tež z hosćićelom lětušeje centralneje zwjazkoweje swjatočnosće. Mjez něhdźe 400 000 wobdźělnikami běchu mnozy politiscy zamołwići Zwjazka. Na kemšach a swjedźenskim akće wobdźělichu so nimo wyšeho měšćanosty Bremena Andreasa Bovenschulte (SPD) na přikład tež zwjazkowy kancler Friedrich Merz, prezidentka zwjazkoweho sejma Julia Klöckner (wobaj CDU), zwjazkowy prezident Frank-Walter Steinmeier kaž tež zwjazkowy zakitowanski minister Boris Pistorius (wobaj SPD). Frank-Walter Steinmeier wopisa w swojej narěči zjednoćenje jako „wokomik zboža w němskich sta­wiznach.“ Zdobom namołwješe hladajo na dźeń a sylnišu AfD towaršnosć k tomu, zo demokratiju zakituja. Wón warnowaše naležnje před nowymi „murjemi w myslenju“ a skedźbni na „njeznjesliwu poli­tisku demagogiju“ antidemokratiskich kruhow w tu- a wukraju.

Jedni warnuja před „nacionalno-rewolucionarnej stronu kadrow“ w Saksko-Anhaltskej, druzy maja hrožacy „islamo-socializm“ w Berlinje za strašniši. Najebać to budu­ najskerje jutře w Magdeburgskim krajnym sejmje prezidenta parlamenta z rjadow najsylnišeje frakcije AfD wolić. A w stolicy Němskeje budźe najskerje bórze Lěwica z Elif Eralp knježerstwo nawjedować. Po měnjenju zwjazkoweho prezidenta Steinmeiera (SPD) je prěni podawk strašniši. Sakski nutřkowny minister Schuster (CDU) je zaso zaćišć budźił, zo nas druhi wuslědk bóle wohrožuje. Hdyž pak CDU wulku nuzu ludźi – mjenujcy zapłaćomne bydlenčko namakać – njerozrisa, potom njepomha, zo politisku konkurencu „ekstremistisku“ mjenuje. A Steinmeier je politiski nan Hartz-IV-reformow. Z nimi bu wjelelětny dźěłaćer po lěće bjezdźěłnosće na runinu z ludźimi degradowany, kotřiž čas žiwjenje ani jenički dźeń dźěłali njejsu. Tajke rozsudy su bytostnej njespokojnosći puć rubali, z kotrejž so nětko bědźimy. Marcel Brauman

Běła Woda (AK/SN). Hromadźe z tójšto wobydlerjemi a hosćimi je měšćanostka Běłeje Wody Katja Dietrich (SPD) minjeny pjatk saněrowane měšćanske dwór­nišćo swjatočnje wotewrěła. Z tym je město swój prěni wulki projekt změny strukturow dokónčiło. Jón su w lěće 2023 zahajili. 90 procentow wot cyłkownje 8,2 milionow eurow twarskich kóštow dóstachu za to ze zwjazkoweho fondsa za sylnjenje strukturow. Nowe mjeno „Kulturne a wobydlerske dwórnišćo“ na to skedźbnja, zo njeje twar jenož proste dwórnišćo. W nim su tež měšćanska biblioteka z čitanskej kofejownju, žurla za zarjadowanja­ a bistro. Dźakowano liftej docpěja wopytowarjo biblioteku bjez barjerow.

W nowej bibliotece poskića dohromady 32 000 medijow. W jeje rumnosćach pak móžeš tež přednoški, čitanja, wustajeńcy, koncerty, dźěłarnički a seminary přewjesć. Čitarjo móža sej wotnětka medije samostatnje na elektroniskimaj terminalomaj wupožčić resp. je tam zaso wróćić. Přidatnje móža woni medije bórze tež hišće zwonka wotewrjenskich časow na dalšim terminalu wróćić.