Genf (dpa/SN). Po měnjenju předsydy Swětoweje strowotniskeje organizacije (WHO) je tuchwilna žołma horcoty z rekordnymi temperaturami w Europje za sta­ zemrětych sobu zamołwita. „Wot 21. junija smy w Europje wjace hač 1 300 přidatnych smjertnych padow registrowali,­ kotrež w bjezposrědnim zwisku z wysokimi temperaturami steja“, piše Tedros Adhanom Ghebreyesus na platformje za krótkopowěsće X. Wón doda: „Europa je tón kontinent na swěće, kotryž­ so najspěšnišo woćopla – dwójce tak spěšnje kaž globalny přerězk“.

Tuchwilu ćerpi něhdźe 150 milionow ludźi pod wuskutkami ekstremneje horcoty. Bydlenja, dźěłowe městna, šule a dróhi w Europje za tajke temperatury konstruowane njejsu, wuzběhuje Tedros. Hižo minjeny tydźeń běše wón warnował, zo liči WHO po cyłym swěće lětnje z něhdźe poł milionom zemrětych w zwisku z horcotu. Tejle wulkej ličbje móhli přidatne škitne naprawy zadźěwać, nawoda WHO zwurazni.

Iran a USA najebać dojednany přiměr z nadpadami pokročowałoj

Washington (dpa/SN). Po tym zo běchu so USA a Iran před dobrym tydźenjom na kónc wojowanjow w Hormuskim přeliwje dojednałoj, su Zjednoćene staty dwě nocy za sobu cile w Iranje atakowali. Jako přičinu za to mjenuja zamołwići USA iranski nadpad minjeny štwórtk na tankowc, kotryž běše z Katarskeho přistawa do Zjednoćenych arabiskich emiratow (VAE) po puću. Jako reakciju na nowe nadpady USA je iranske wójsko znowa wojerske stejnišća USA w Bahrainje a Kuwaiće bombar­dowało.

Prózdniny su so započeli, je lěto 2027 a wšitcy­ Serbja hotuja a wjesela so na tradicionalny Mjezynarodny folklorny festiwal Łužica. Tón ma swoje krute programowe dypki, mjez druhim swjedźenskej ćahaj po wsy w Chrósćicach a Hochozy. Po­prawom stej to wjerškaj štyridnjowskeho zarjadowanja. Ale dokelž hižo druhe lěto pospochi srjedźnu Europu žałostna hor­cota trapi, njeje hižo ničo wěste. Je kusk kaž w času korona-pandemije. A nětko rozsudźa organizatorojo festiwala cyle krótkodobnje, zo so swjedźenski ćah njewotměje – dokelž boja so wo strowotu akterow­ ... Móžeš sej to předstajić abo měniš snadź, zo so tajke něšto stać njemóže? Minjeny pjatk je so runje tole na naj­wjetšim folklornym festiwalu pola južnych susodow w morawskim měsće Strážnice stało. Prěni raz w 81lětnych stawiznach festiwala­ tam wulki swjedźenski ćah přewjedli njejsu. Je to njezbožo, ale hladajo na horcotu to zrozumiš. Budźemy pak to tež klětu zrozumić? Lukáš Novosad

Kamjenica (SN). Přewodźacy wuběrk europskeho programa Interreg Sakska-Čěska je kónc tydźenja w Kamjenicy spě­chowanje 13 nowych mjezy překročacych projektow wobzamknył. Dohromady 11 milionow eurow z Europskeho fondsa za regionalne wuwiće (EFRE) steji za to k dispoziciji. Z tym su nimale wšitke srědki w aktualnej spěchowanskej dobje wučerpane. To zdźěli sakska statna mi­nisterka za infrastrukturu a wuwiwanje kraja Regina Kraushaar (CDU) wčera w nowinskej zdźělence. Mjez druhim skedźbni wona tež na to, zo je za wuspěšne pokročowanje kooperacije w čěsko-sakskej namjeznej kónčinje „nadal dosć regionalneje awtonomije w europskej spěchowanskej politice trěbne“.

„ReH2gion“ je jedyn ze spěchowanych projektow, w kotrymž matej w čěskim Ústí nad Labem a Kamjenicy mjez sobu zwjazanej informaciskej srjedźišći za wodźikowu technologiju nastać, kotrejž koordinujetej wodźikowy know-how a potrjeby předewzaćow, zarjadnistwow a slědźacych a kotrejž na tutym polu zhromadne mjezy překročace projekty wuwiwatej.