Berlin (dpa/SN). Někotři z němskich turistow, kiž na Bliskim wuchodźe přebywaja, smědźa so bórzomneho nawróta do domizny nadźijeć. „Sym dobreje mysle, zo so to poněčim poradźi“, rjekny wonkowny minister Johann Wadephul (CDU) w sćelaku ZDF. Zwjazkowe knježerstwo je we wuskim zwisku z pućowanskimi ­předewzaćemi. Wonkowne ministerstwo tuchwilu transport chorych, dźěći a samodruhich z konfliktneje kónčiny při­hotuje. K tomu chcedźa lětadła do Sawdi-Arabskeje a do Omana pósłać.

Politikarjo Lěwicy a Zelenych zadźerženje zwjazkoweho knježerstwa kritizuja. „Hakle tři dny po wudyrjenju wójny připowědźić, někotre potrjechene skupiny z kónčiny ewakuować chcyć, njedosaha“, rjekny politikarka Zelenych Luise Amtsberg nowinarjam w Berlinje.

„Eskalacija na Bliskim wuchodźe bě wotwidźeć. Zo skutkuje zwjazkowe knježerstwo w tymle strašnym połoženju njepřihotowane a přežadane, je wostrózbjace“, rjekny wonkownopolitiska rěčnica Lěwicy Cansu Özdemir.

Protesty přećiwo turistam w Španiskej mjeztym třeće lěto pokročuja

Granada (SN/LuNo). Ze spěšnje schnyjacym lěpkom su we wobłuku akcije přećiwo nawalej turistow w španiskim měsće Granada w běhu jeničkeje nocy minjeny štwórtk, 26. februara, wokoło 500 klučowych kašćikow zalěpili. W nich chowaja přenajerjo słužby Airbnb kluče bydlenjow, kotrež wopytowarjam města za nóclěh přewostajeja. Pozdźišo skućićeljo na tute klučowe kašćiki hišće nalěpki ­zlěpichu, na kotrymž rěka: Přećiwo wikowanju z bydlenjemi.

K tutej sabotaži w centrumje stareho a turistisce popularneho města so dźeń pozdźišo dźěłarniski zwjazk Bydlenska unija Granady oficialnje wupraji: „To je naša ofensiwa přećiwo přeměnjenju by­dlenskeje situacije w měsće.“ Wobydlerjo Granady so hórša, zo přenajeće bydlenjow turistam raznje přiběra, zo starych susodow spěšnje wusydluja a zo oficialne předpisy za wobmjezowanje turizma njedosahaja.

Rěčnica zwjazka turistiskich předewzaćow Němskeje je dźesaći tysacy dowolnikarjow mjez druhim w Dubaju, kotřiž wójny na Bliskim wuchodźe dla hišće ­domoj lećeć njemóža, tróštować spytała: Dajće sej słónco na přibrjoze lubić, wšako maće hišće wjac chwile za to. Cynisce ­móhli přidać: Doniž tam iranski trut abo raketa „islamskeje republiki“ njezadyri. Dubaj je po njewotwisnej encyklopediji Wikipediji zlě wuwołany wućek bosow drogowych kartelow, koruptnych politikarjow, ruskich oligarchow a mjeztym centrum „čisćenja pjenjez“ z ilegalnych dobytkow mjezynarodneje kriminality – „to zmóžnja monarchistiska diktatura swójby Maktoum.“ Tuchwilu rěči so wjele wo „prawje ludow“, štož je faktisce prawo statow a z tym tež teroristiskich tyranow kaž knježićelow Irana, kiž swój lud morja, hdyž za to demonstruje, zo maja žony samsne prawa so drasćić kaž mužojo. Wo turizmje, kiž njeprawdu faktisce podpěra, přemało rěčimy. Marcel Brauman

Grünheide (dpa/SN). W chětro napjatej situaciji su w jeničkej tworni awtotwarca Tesla w Grünheide južnje Berlina wólby zawodneje rady zahajili. Hižo dołho trajacy konflikt mjez dźěłarnistwom IG metal a předewzaćom bě so minjeny čas dale přiwótřił. Na fasadźe zawoda je nawodnistwo hoberski transparent připrawić dało, na kotrymž je napisane: Progress, Innovation, Success. Our Future. (Postup. Inowacija. Wuspěch. Naš přichod.) Wjednistwo koncerna zwjazuje wuslědk wólbow zawodneje rady z přichodom twornje na tutym městnje. Něhdźe 11 000 přistajenych ma hač do jutřišeho składnosć, zastupnistwo swojich zajimow wolić. Cyłkownje jim jědnaće lisćinow předleži. Wo hłosy dźěławych prócujetej so mjez druhim „IG metal Tesla Workers“ wokoło Laury Arndt a skupina „Giga United“ z amtěrowacej nawodnicu zawodneje rady Michaelu Schmitz na čole.