Swětowy koparski zwjazk FIFA poskićuje w času swětoweho mišterstwa fanam w stadionje, zo móža swoje mjeno abo mały postrow na stadionowej wobrazowce w běhu hry pokazać dać. Poskitk wězo darmotny njeje: Za tak mjenowany „super shoutout“ žada sej FIFA nimale 70 eurow­. Politiske, komercielne abo diskriminowace wobsahi pak koparski zwjazk při tym njeakceptuje.

Dohromady 400 wobydlerjow bydlenskeho bloka w Amsterdamje dyrbješe policija minjeny pjatk w nocy ewakuować, po tym zo bě jón mócna eksplozija strašnje wobškodźiła. Sedmjoch z nich zranjenjow dla w chorowni lěkuja, smjertnych woporow na zbožo njeje. Po dotalnych dopóznaćach policije je kriminelna skupina w pódlanskim twarje bloka rozbuchlinu produkowała, při čimž bě k njezbožu dóšło.

Drježdźany (SN). GAP – to je skrótšenka Europskeje unije za zhromadnu agrarnu politiku. Wudawki EU za tutón wobłuk wučinja něhdźe 40 procentow cyłeho etata. GAP ma dwaj hłownej instrumentaj resp. stołpaj: direktne subwencije za ratarske zawody a spěchowanske srědki za wuwiwanje wjesnych kónčin.

Za planowanje GAP zamołwity gremij je agrarny wuběrk EU. Lětsa kónc junija zeńdźe so k přichodnym schadźowanju, na kotrymž wo nowych, wot lěta 2028 płaćacych spěchowanskich směrnicach wuradźuje. Zawčerawšim je rěčnik gremija a čłon EU-parlamenta Norbert Lins naćisk nowych směrnicow předstajił. Mjez druhim žada sej wuběrk wyši budget za GAP w přichodnym financnym ramiku EU kaž tež pokročowanje wupruwowaneju spěchowanskeju instrumentow. Nimo toho wotpokaza naćisk EU, direktne spěchowanje zawodow na sumu 500 000 eurow wobmjezować.

Sakski ratarski minister Georg-Ludwig von Breitenbuch (CDU) chwali nowy naćisk „jako wuwaženy. Tajki smy w tutej formje dawno hižo wot komisije EU wočakowali.“

Berlin/Hamburg (dpa/SN). Ludźo, kotřiž su mjez Berlinom a Hamburgom ze železnicu po puću, smědźa so wot njedźele wjeselić: Po połtřeća měsacach móža ćahi zaso po planje jězdźić. W minjenych tydźenjach bu čara mjenujcy „generalnje ponowjena“. Prěni ICE wotjědźe njedźelu rano w 5.34 hodź. z hłowneho dwórnišća w Hamburgu a zahaji slědowacy połhodźinski takt.

Prěni bilionar swěta

New York (dpa/SN). Swětnišćowa firma Elona Muska SpaceX je so ze swojim startom na bursy wo rekord postarała. Zawod bě něhdźe 555,6 milionow akcijow wudał a z nimi něhdźe 75 miliardow US-dolarow zasłužił. SpaceX pohódnoćeja na bursy z 1,77 bilionami dolarami, z čimž je firma wot spočatka drohotniša hač dotalny primus Meta, maćerny koncern Facebooka. Jako hłowny akcionar je Musk nětko prěni bilionar na swěće.

Nowy zakitowanski minister