Žada sej koncept za Šwikawu
Šwikawa (dpa/SN). Hospodarski minister Dirk Panter ( SPD) namołwja nawodnistwo koncerna VW, spěšnje koncept za Šwikawski zawod předpołožić. „To njesměło so hakle za poł lěta stać“, wón po wčerawšej rozmołwje z jednaćelstwom a zastupjerjemi dźěławych w Šwikawje wuzběhny. Zaměr měł być, zo produkciju jězdźidłow na stejnišću dale wjedu. „Jeli předsydstwo VW alternatiwne móžnosće wužiwanja widźi, potom njech je předstaji. Ja pak je wokomiknje njespóznawam“, Panter wuzběhny.
BSW poskitk AfD přiwzał
Magdeburg (dpa/SN). Saksko-Anhaltske krajne předsydstwo BSW je so jednohłósnje za rozmołwy z AfD wo móžnym zhromadnym dźěle wuprajiło. Wažne temy BSW su zastaranje z energiju, kubłanje a měrowa politika, praji rěčnik strony nowinarskej agenturje dpa. Zastupjerjo CDU, SPD, Zelenych a Lěwicy rozmołwy z AfD wotpokazachu.
Za měšćanostu njekandiduje
Domicil Sakskeho krajneho sejma ma so rozšěrić. Ze symboliskim ...
W Lipsku twarja bórze brónje
Parady žrěbcow zahajili
Po štyrjoch tydźenjach treninga su plahowarjo konjow minjenu sobotu w Krajnej kobłarni w Moritzburgu kóždolětne parady žrěbcow zahajili. Hižo wot ranja móžachu zajimcy do konjencow při Hrodowej aleji 1 pohladnyć. Dopołdnja koncertowaše Sakski policajski orchester na historiskim nutřkownym dworje kobłarnje. Přichodnej paradźe w Moritzburgu budźetej njedźelu, 13. kaž tež sobotu, 19. septembra.
Foto: dpa/Katharina Kausche
Wüst (CDU): Zakaz AfD pruwować
Berlin (dpa/SN). W zwisku ze sylnym wólbnym wuslědkom AfD we wólbach krajneho sejma w Saksko-Anhaltskej je so ministerski prezident Sewjerorynsko-Westfalskeje Hendrik Wüst (CDU) zawčerawšim, wutoru, za pruwowanje zakaza strony AfD wuprajił. Wón namjetuje dźěłowu skupinu zastupjerjow Zwjazka a krajow. „Dyrbimy wujasnić, kak ma stat wustawoprawnisce ze stronu wobchadźeć, kotraž ma w někotrych zwjazkowych krajach wustawje jasnje so spřećiwjace zaměry“, wón wuzběhny.
Zwjazkowy kancler Friedrich Merz (CDU) je so wčera skeptisce wo šansach zakaza strony AfD wuprajił. Wón njewěri, zo „ze zakazom AfD problemy rozrisamy, kotrež jeje wolerjo w Němskej widźa“. Město toho dyrbjeli wolerjow do politiskeje srjedźizny wróćo zdobyć spytać a jich z jasnym politiskim poskitkom přeswědčić.
Hessenski ministerski prezident Boris Rhein (CDU) a nawoda bayerskeho knježerstwa Markus Söder (CSU) běštaj so hižo do toho swoje dwěle w zwisku z pruwowanjom zakaza AfD wuprajiłoj. Porno tomu stej stronje SPD a Zeleni zasadnje za to.
Z podawkow wuknyli
Sakska załoži gremij za lěpši škit infrastruktury
Drježdźany (dpa/SN). Serija nadpadow na milinowu syć chiba nadpad trutow na Lipšćanskim lětanišću je mnohim politiskim zamołwitym Zwjazka a zwjazkowych krajow z nastorkom, so chutnje z naprawami za škit kritiskeje infrastruktury rozestajeć. W tutym zwisku staj sakskaj ministraj za nutřkowne a za energiju Armin Schuster (CDU) a Dirk Panter (SPD) wčera připowědźiłoj, zo chce swobodny stat nowy krizowy dźěłowy gremij wutworić.
Dotal eksistujetej wěstotny kabinet, kotremuž relewantni ministrojo a ministerski prezident přisłušeja, a krizowy stab. Nowy gremij změje funkciju „strategiskeho dźěłoweho muskla“, kotryž je kmany, w nuzowych padach mjez tutymaj runinomaj jednać. W nim maja zastupjerjo wšitkich relewantnych kritiskich sektorow, na přikład zežiwjenja, strowoty a energije zapřijeći być. Po planje ministrow ma so wón za něhdźe tři tydźenje na přichodnym posedźenju wěstotneho kabineta wutworić.
To a tamne (10.09.26)
Schulze nowy šef frakcije
Magdeburg (dpa/SN). Hišće amtěrowacy ministerski prezident Saksko-Anhaltskeje Sven Schulze je so wo předsydstwo frakcije CDU w krajnym sejmje požadał a so w bojowniskim wothłosowanju přećiwo tuchwilnemu předsydźe frakcije Guidej Heuerej z wosom přećiwo sydom hłosam přesadźił. Snadny wuslědk je wuraz za to, zo je sylnych zastupjerjow w frakciji krajneho sejma, spytaše Schulze po wólbach wuslědk pozitiwnje interpretować.
Přiměrja wukubłanje
Drježdźany (SN). Sakski kabinet je wčera naćisk zakonja za wukubłanje fachowych asistentow za hladanje schwalił. Z tym je Sakska zwjazkowemu standardej přiměri. Po měnjenju sakskeje strowotniskeje ministerki Petry Köpping (SPD) je to wažna powołanska perspektiwa za wšěch, kotřiž chcedźa we wobłuku hladanja dźěłać, ale třilětne wukubłanje na so wzać nochcedźa abo njemóža“. Wukubłanje traje jenož 18 měsacow. Krajny sejm dyrbi zakoń nětko schwalić.
Zeleni namjetej BSW přihłosuja
