Waršawa (dpa/SN). Pólski prezident Karol Nawrocki je měnjenja, zo Ruska jeho kraj wohrožuje a je so tuž za swójski program atomowych brónjow wuprajił. „Puć k pólskemu potencialej atomow je – při wšěm respekće za mjezynarodne prawidła – puć, po kotrymž měli kročić“, rjekny prawicarsko-konserwatiwny nawoda stata telewizijnemu sćelakej PolsatNews. W Pólskej je prezident najwyši rozkazowar wójska. Pólska je kraj z direktnej mjezu k wobrónjenemu konfliktej, Nawrocki hladajo na wójnu w Ukrainje podšmórny. „Wěmy, kak agresiwna a imperialna ruska pozicija napřećo Pólskej je.“ Tohodla chce wěstotu kraja z pomocu programa atomowych brónjow polěpšić. Hdy chcedźa z tym započeć, pak wón nětko hišće prajić njemóže. Na prašenje moderatora, hač so Nawrocki reakcije Ruskeje na tutón rozsud njeboji, rjekny wón: „Ruska móže na wšo agresiwnje reagować.“