Nóc skónčnje serbska
Předewzaća w Sakskej wolóžili
Drježdźany (SN). W zwisku z wróćopłaćenjom spěšneje korona-pomocy je Sakski krajny sejm w juliju 2025 wšelake naprawy wobzamknył, z kotrymiž chcyše potrjechene předewzaća wolóžić. Mjez druhim běše požčensku dań znižił a dobu wróćopłaćenja na 36 měsacow podlěšił. Nimo toho wobzamkny sejm tež móžne wuswobodźenje wot wróćopłaćenja za předewzaća. A to za předewzaća z netto-dochodami pod 35 000 eurami a cyłkownym zamóženstwom pod 40 000 eurami w lěće 2023.
Hladajo na to informuje sakske hospodarske ministerstwo wčera w nowinskej zdźělence, zo je dohromady něhdźe 11 000 samostatnym a małym předewzaćelam wróćopłaćenje spěšneje korona-pomocy spušćiło. To je 90 procentow wot cyłkownje 12 000 zapodatych próstwow na wuswobodźenje. Jenož 617 próstwow je ministerstwo wotpokazało. 375 próstwow tuchwilu hišće wobdźěłaja. Hač do kónca lěta wotmołwja hišće na próstwy předewzaćow. W Sakskej je wjace hač 84 000 ludźi financielnu korona-podpěru přijało. Cyłkownje wupłaćena suma wučinja 672 milionow eurow.
To a tamne (24.08.26)
Israel ma přestać sydlić
Berlin (dpa/SN). Němska a šěsć dalšich statow napominaja Israel, wulce zwadny sydlenski projekt cofnyć. W statemenće, kotryž je zwjazkowe knježerstwo wozjewiło, rěka, zo njeměł Israel sydlišća w Zapadnojordanskim kraju hižo dale rozšěrjeć. Sydlenskich projektow dla njepoćerpja jenož šansa na měrliwe rozrisanje konfliktow w regionje, ale zdobom tež renomej Israela. Statement podpisachu nimo Němskeje tež Francoska, Wulka Britaniska, Italska, Kanada, Nižozemska a Norwegska.
Lětsa wjace hač 300 ludźi zajeli
Athen (dpa/SN). Zapalerstwa dla su w Grjekskej lětsa hižo 308 ludźi zajeli. W 272 padach běchu ludźo njewotpohladnje woheń zamiškrili, 36 króć zwěsćichu wotpohlad. Tole zdźěli rěčnik wohnjoweje wobory Giorgos Artopoios statnemu sćelakej ERT. Wosebje turisća mnohe wohenje zawinuja, dokelž sej strachow wědomi njejsu. Zašły tydźeń na přikład bě turist při pobrjoze na Kreće z wuhlom grilował a tak lěsny woheń wuskutkował. Riziko lěsnych wohenjow je tež w Grjekskej wulkeje suchoty dla wulki.
Wjace wukrajnikow dźěła
Wopominanski dźeń swj. Sćěpana je w Madźarskej z narodnym ...
Woda z rěkowa jězorow tabu
Dubja-Błóta (dpa/SN). W někotrych dźělach wokrjesa Dubja-Błota njesmědźa ludźo hižo wodu z rěkow a jězorow brać. Wotpowědny zakaz wokrjesa płaći wot dźensnišeho. Sćěhowace gmejny a města su potrjechene: Markojska Góla, hamt Delnje Błóta, hamt Luboraz, Lubin, Łukow a Heideblick. Přičina za zakaz je pobrachowacy dešć. Tohodla w Sprjewi hižo dosć wody njeje a rezerwy wody su minimalne. Na situaciji drje tež chłódniše temperatury a na nowy tydźeń wočakowane spadki ničo njezměnja.
Po cyłej Braniborskej zakazuje dźeń a wjac wokrjesow wodu klumpać. We wokrjesu Hornje Błóta/Łužica podłu srjedźneje Sprjewje hižo wot lońšeho junija wodu z rěkow a jězorow brać njesmědźa.
Wědu wo demokratiji šěrić
Kubłanscy ministrojo wuchoda třeći raz zhromadnje wuradźowali
Halle (dpa/SN). Kubłanscy ministrojo zwjazkowych krajow na wuchodźe Němskeje chcedźa nastupajo demokratiske kubłanje w šulach přichodnje wušo kooperować. Tole zdźělichu zamołwići ministrojo CDU wčera we wobłuku tak mjenowanych Srjedźoněmskich rozmołwow wo kubłanju w Halle nad Solawu. „Demokratiske kubłanje je zhromadny nadawk, kotryž na mjezy zwjazkoweho kraja njekónči“, rjekny saksko-anhaltski kubłanski minister Jan Riedel. Tohodla chcedźa kraje nazhonjenja a wuspěšne koncepty za demokratiske kubłanje ze sobu zwjazać a „dołhodobnje kruće do wšědneho šulskeho dnja zapřijeć.“
Nimo ministrow ze Saksko-Anhaltskeje, Sakskeje a Durinskeje bě lětsa prěni raz tež braniborski kubłanski minister Gordon Hoffmann přitomny. „Chcemy naše šule skrućować, zo bychu naše zhromadne hódnoty zastupowali. Wšěm tym, kotřiž spytaja našemu swobodnemu demokratiskemu porjadej z pozdatnej politiskej neutralitu w šuli škodźeć, dyrbimy raznje znapřećiwjeć“, rjekny politikar CDU.
Šoferojo mjenje časa zhubili
Ponowja pomnik hrabinki
To a tamne (21.08.26)
Poprawom chcyše muž w francoskim Colomiers jenož bateriju swojeho awta wuměnić. Jako pak hawbu motora wočini, wuhlada połdra metra dołheho hada. Na to wón wohnjowu woboru a specialistow za zwěrjeće rizika zazwoni. Jim so wutoru poradźi, skoćo bjeze stracha za zwěrjo kaž tež za wobornikow z awta wuswobodźić. Had je prawdźepodobnje měsac w motorskim rumje jězdźidła „bydlił“, wšako wobsedźer swoje awto tak dołho wužiwał njebě.
W Ruskej wjesela so ludźo nad nowym filmom „Spider-Man“. Njejedna pak so wo licencowanu wersiju blockbustera z Hollywooda, ale wo rubježnu kopiju. Sankcijow dla njesmědźa mjenujcy tajke filmy w Ruskej oficialnje pokazać, štož wšak je knježerstwu smorže. Na premjernym dnju wčera běchu kina w Moskwje spěšnje dospołnje wuknihowane.
