Aziskeho šeršenja su fachowcy Sakskeho krajneho zarjada za wobswět, ratarstwo a geologiju (LfULG) w swobodnym staće minjeny tydźeń prěni króć našli, a to w Lipsku. Kaž mjeno přeradźi, je družina šeršenjow w Aziji doma. Zwěrjo je mjeńše a po barbje ćmowše hač jeho europ­ski přiwuzny, za to pak ćim agresiwniše. Prawdźepodobnje je z transportami tworow do Europy přišło. Zarjad ludźi warnuje: Štóž hnězdo nańdźe, njech dodźerži pjeć metrow wotstawka.

Potrjeba za napojemi w Němskej je tuchwi­lu horcoty dla wulka. Rěčnica Zwjazka němskich mineralnych žórłow (VDM) je wčera wozjewiła, zo maja producenća napojow tuchwilu logistiske ćeže, dokelž kupcy prózdne bleše a kašćiki njewróća. Wona namołwja ludźi, tole nje­zabyć. Zasadnje zastaranje z napojemi wohrožene njeje, rěčnica wuzběhny.

Budapest (dpa/SN). Madźarski parlament je z wulkej wjetšinu něhdyšeho prezidenta najwyšeho sudnistwa Andrasa Baku jako noweho statneho prezidenta wuzwolił. 73lětneho njestronjana běše frakcija byrgarskeje strony Tisza namjetowała, kotrejž nowy ministerski prezident Peter Magyar přisłuša. Baka wu­zběhny w swojej narěči po wólbach, zo chce nad demokratiju a prawnostatnosću stražować, zo njeby so system Orbana w kraju hižo wospjetował.

Podpěruja Žitawski klinikum

Drježdźany/Žitawa (SN). Z dohromady 9,2 milionomaj eurow podpěruje Swobodny stat Sakska pře- a wutwar nuzoweje a intensiwneje stacije Žitawskeho klinikuma Hornjołužiske hory. To wozjewi sakske strowotniske ministerstwo we wčerawšej nowinskej zdźělence. Pjatk chce nawodnica ministerstwa Petra Köpping (SPD) w Žitawje jednaćelej klinikuma Steffenej Thiele spěchowansku zdźělenku přepodać a so na městnje wo planowanych naprawach informować.

Demonstruje wojersku móc