Ministerka prosy na wjeršk azyla
Drježdźany (dpa/SN). Sakska chce zarjadniskim sudnistwam hladajo na raznje přiběracu ličbu skóržbow azyla dla pomhać. Justicna ministerka Constanze Geiert (CDU) přeprošuje tohodla na azylowy wjeršk, kotryž přewjedu přichodnu póndźelu. Zaměr je, ze zastupnikami ministerstwa a sobudźěłaćerjemi zarjadniskich sudnistwow wo aktualnym połoženju wuradźować a z toho wuchadźace konkretne naprawy wobzamknyć, ministerstwa zdźěla.
Wot spočatka lěta 2024 ličba skóržbow požadarjow wo azyl na sakskich zarjadniskich sudnistwach raznje přiběra. Tole drje hač do srjedź 2025 takle wostanje a potrjechi Saksku jako pomjezny kraj cyle wosebje, tak rěka. Čas wobdźěłanja spochi přiběra a zawinuje wulke dźěłowe poćežowanje sudnistwow. Po zetkanju chce Geiert zjawnosć wo wuslědkach informować. Na zarjadniskich sudnistwach Sakskeje přijimachu 2024 widźomnje wjace skóržbow azyla dla hač lěto do toho. Po informacijach Budyskeho Wyšeho zarjad- niskeho sudnistwa su loni 8 747 nowych skóržbow registrowali, 2023 bě jich 5 703. Najwjetši dźěl skóržbow su wotpokazali.
To a tamne (06.03.25)
Drohotne debjenki spóžěrał je paduch w staće USA Floridźe. 32lětny bě so we wobchodźe złotnikarja w měsće Orlando jako sobudźěłaćer sławneho sportowca wudawał a sej wšelake drohoćinki wobhladał, mjez druhim nawušnicy za wjace hač 700 000 dolarow. Muž spytaše debjenki rubić, na čož so z wobsedźerjom zwadźi. Jako policija dojědźe, paduch złoćane drohoćinki spóžěra.
Mylnje bomby na wjes ćisnył je pilot wojerskeho lětadła w Južnej Koreji. Při tym so 15 wobydlerjow zrani. Njezbožo sta so w ramiku zhromadneho wojerskeho zwučowanja jednotkow USA a Južneje Koreje. Wočiwidnje běchu pilotej wopačne koordinaty dali. Na kóncu njećisny wón wosom bombow na objekt wosrjedź zwučowanišća, ale na wjes na kromje terena. Wjesnjanosta žada sej zjawne zamołwjenje wójska za misnjenje.
Genderowanu rěč wotstronili
Drježdźany (SN). Nowa sakska justicna ministerka Constanze Geiert (CDU) změni postajenje swojeje předchadnicy Katje Meier (Zeleni) a wotstroni tak mjenowanu gender-sprawnu rěč w tekstach zakonjow, wukazow a předpisow. Tak je to wčera kabinet mjeńšinoweho knježerstwa CDU a SPD wobzamknył. Zeleni po lońšich wólbach w Sakskej hižo knježerstwu njepřisłušeja. Wukubłana juristka Geiert je wot 2019 profesorka na Mišnjanskej wysokej šuli za zarjadnistwo, hdźež mjez druhim zarjadniske prawo wuwučowaše. Katja Meier je politologowka, stawiznarka a sociologowka a dźěłaše do swojeho časa jako ministerka we wšelakich funkcijach za Zelenych.
Z wida Geiert je rozsud přinošk k wottwarej běrokratije, wšako maja teksty zakonjow za ludźi a hospodarstwo zrozumliwe być. Zašła koalicija CDU/Zelenych/SPD je „genderowu rěč“ 2020 zawjedła. Katja Meier rozsud naslědnicy wobžaruje, wšako je rěč zakonjow hišće z časa postajowana, hdyž njejsu žony a mužojo samsne prawa měli. Geiert pak kritizowaše trěbne přeformulowanje cyłych zakonjow při kóždej změnje.
Trump swoje dźěło chwalił
Washington (dpa/SN). Prezident USA Donald Trump je swoje dotalne dźěło w zastojnstwje jako přewšo wuspěšne wuchwalował. „Amerika je wróćo“ rjekny republikan w swojej narěči před woběmaj komoromaj parlamenta. Po swojim spřisahanju před šěsć tydźenjemi je wón spěšnje a konsekwentnje jednał, „zo by najwulkotnišu a najwuspěšnišu dobu w stawiznach kraja zahajił“. Amerika je z nim swoju hordosć a swoje sebjewědomje zaso namakała, je sej Trump wěsty.
Žana woborna winowatosć
Berlin (dpa/SN). Zakitowanski minister Boris Pistorius (SPD) žadanja za spěšnym wukazanjom woborneje winowatosće w Němskej wotpokazuje. Zwjazkowa wobora nima scyła dosć kasernow, zo móhła wšitkich zwołanych wojakow zaměstnić, rjekny Pistorius sćelakej ARD. Wažniše je, wšěm tym perspektiwu skićić, kotřiž k zwjazkowej woborje chcedźa. Tutych ludźi měli registrować. Woborna winowatosć, kaž ju ze starych časow znajemy, njeje wjace zwoprawdźomna, wón rjekny.
Nahubnik bamžej pomha
Předsyda CSU, bayerski ministerski prezident Markus Söder je dźensa ...
Saksojo politiku Trumpa witaja
Arabske kraje z planom za Gazu
Kairo/Gaza (dpa/SN). Wot arabskich krajow zdźěłany plan natwara Gazaskeho pasma chcedźa tež Europskej uniji a USA předpołožić. Tole je egyptowski wonkowny minister Badr Abdel-Atti k zakónčenju wjerškoweho zetkanja w Kairo zdźělił. Jeho kraj chcył za 90 stronow wobpřijacy plan, kiž powěsćerni dpa předleži, šěroku mjezynarodnu podpěru zdobyć a so tak wjele diskutowanym namjetam prezidenta USA Donalda Trumpa spřećiwjeć.
Plan předwidźi za čas přichodnych pjeć lět najprjedy raz rumowanje rozwalinow w Gazy a potom twar nachwilnych a dołhodobnych bydlenjow za tam bydlacych Palestinjanow. Kóšty trochuja na 50 miliardow eurow. Krute připrajenja pjenjez dotal hišće wot nikoho nimaja.
Historiske financne dojednanje
Berlin (dpa/SN). Unija CDU/CSU a SPD stej so při swojich sonděrowanskich jednanjach na financny paket historiskeho rozměra za zakitowanje a infrastrukturu dojednałoj. Z nim chcedźa zdobom we wustawje zakótwjene borzdźidło zadołženja we wěstych naležnosćach zběhnyć. Nimo toho wutworja wurjadne zamóženje za porjedźenje infrastruktury Němskeje we wobjimje 500 miliardow eurow. Financne wobzamknjenja su prěnje dojednanje w rozmołwach k wutworjenju noweho knježerstwa. Zdobom maja pokazać, zo je Němska hladajo na jutřiši wjeršk EU w Brüsselu jednanjakmana. Tam chcedźa wo tym wuradźować, kak měła Europa na nowy kurs prezidenta USA Donalda Trumpa reagować. Zwjazkowy kancler Olaf Scholz (SPD) chce tam podźěl Němskeje přinošować.
Kanclerski kandidat unije Friedrich Merz (CDU) je w tym zwisku potwjerdźił, zo Němska hoberske financne wužadanje jenož zmištruje, hdyž so hospodarstwo kraja nanajspěšnišo zaso zhraba a so na puć stabilneho rozrosta nawróći.
Trump swěcu hasnył
Před něšto časom přirunowaše fachowc połoženje w Europje z lětom 1914. Tehdy knježeše wulka wójnska zahoritosć. Knježacy ludźom napowědachu, zo dyrbja ludy skónčnje na bitwišću wo swojim přichodźe rozsudźić. Wotpowědnje zahoriće wojacy do wójny ćehnjechu, dokelž běchu wo swojim dobyću kruće přeswědčeni.
Po zjawnej rozkorje mjez prezidentom USA Donaldom Trumpom a ukrainskim prezidentom Wolodymyrom Zelenskym w Běłym domje je swět naraz hinaši. Mi so zdawa, jako by Trump europskim wójnskim horliwcam swěcu hasnył abo kaž Němcy praja, tykačk wućahnył. „Stejimy bjez košle a cholowow“, rjekny jedyn z najzasaklišich zastupnikow wójnskeje politiki Roderich Kiesewetter (CDU) tele dny nowinarjam. Ludźo w Sakskej maja dobry čuch w tymle nastupanju. W zapadnej Europje knježi porno tomu wulka bjezradnosć. Politikarjam bych radźił: Štóž chce rady wojować, njech to čini abo swoje dźěći sćele. Marko Wjeńka
