Sobudźěłaćerki a sobudźěłaćerjo Přirodowědneho muzeja Senckenberg w Zhorjelcu hotuja so z połnej paru na přećah do noweho campusa při dwórnišću. Muzej wosrjedź města pak wostanje tež po přećahu dale wotewrjeny. Hač do lěta 2028 matej „wulke pakowanje“ a přećah zdokonjanej być.

Zhorjelc (dpa/SN). W Přirodowědnym muzeju Senckenberg w měsće nad Nysu so tuchwilu na přećah do noweho twarjenja přihotuja. W nowym kompleksu njedaloko dwórnišća chcedźa w přichodźe slědźenje, zběranje a wuwučowanje zjednoćić, rjekny nawodnica muzeja Kristin Baber. Liča z tym, zo budźe nowe twarjenje wosrjedź tutoho lěta hotowe. Hižo ­tutón tydźeń pjatk, 22. meje, wotewru w dotalnym twarjenju při Marijinym naměsće wustajeńcu pod hesłom „Zapakowane a wupakowane“, kotraž ma přećah na nowe stejišćo přewodźeć. „Prezentaciju w přichodnymaj lětomaj stajnje znowa přiměrimy“, Baber připowědźa.

Hač zasudźenu prawicarsku ekstremistku Marlu Svenju Liebich do Němskeje přepodadźa, Plzenske krajne sudnistwo dźensa rozsudźi. Liebig, kotruž běchu spočatk apryla na němsko-čěskej mjezy zajeli, sedźi wot toho časa w čěskim jastwje. Jeli sudnistwo rozsudźi, ju Němskej přepodać, wočakuje ju jastwo w Kamjenicy. Za zasudźenej ekstremistku běchu wot kónca awgusta 2025 najprjedy w Němskej, pozdźišo po wšej Europje pytali.

Mortwa wjelryba, kotruž běchu minjeny štwórtk před danskej kupu Anholt wuhladali, je samsne zwěrjo, kiž bě wjacore razy w Baltiskim morju před němskim pobrjohom w pěsku tčacy wostało. Pod mjenom „Timmy“ běštej ryba a jeje wuchowanje němsku towaršnosć wjacore tydźenje ­zaběrałoj. Kadawer wjelryby danske knježerstwo wotwlec nochce, dokelž to w Danskej z wašnjom njeje.

Kóšynka (AK/SN). Sedličanski jězor – z wulkosću 1 330 hektarow najwjetši jězor Łužiskeje jězoriny – ma wot tutoho tydźenja nowej turistiskej atrakciji: płuwacy móst a informaciske srjedźišćo. Dohromady něhdźe 650 000 eurow je zaměrowy zwjazk Łužiska jězorina za to inwestował. Spěchowanske srědki dósta ze zwjazkoweho programa na dobro komunow w regionach­ strukturneje změny kaž tež wot braniborskeho ministerstwa za infrastrukturu a krajne planowanje. „Wobaj elementaj stej mały, ale wažny přinošk za infrastrukturu w jězorinje“, podšmórny předsyda zaměroweho zwjazka Detlev Wurzler wutoru składnostnje jeju po­swjećenja na přibrjoze blisko Kóšynki (Kleinkoschen).

Choćebuz (AK/SN). Łužiski cyrkwinski dźeń wotměje so wot 9. do 11. junija 2028 znowa w Choćebuzu. Po zarjadowanjomaj 2015 w Choćebuzu a 2022 w Zhorjelcu přeprošuje Ewangelska cyrkej Berlin-Braniborska-šleska Hornja Łužica (EKBO) zaso na zetkanje do Łužicy.