Kobanê (SN/jp). Hladajo na tuchwilne intensiwne wojowanja w kurdiskej kónčinje na sewjeru Syriskeje je Nesrin Abdullah, komanderka kurdiskich wobrónjenych jednotkow žonow YPJ, wo kritiskim połoženju w Kobanê rozprawjała. Kónčina je wobstupjena wot zóldnarskich mocow syriskeho přechodneho knježerstwa a pro-turkowskich milicow, rjekny wojowarka na internetnej nowinarskej konferency w Kobanê. Město Rojavy a wokolne kurdiske wsy su ćežko nadběhowane, wona rjekny. Mnozy ciwilisća su ćeknyli a Kobanê je přepjelnjene z wuhnatymi. Tući nimaja wodu, milinu, tepjenje a mediciniske zastaranje. Wosebje tepjenje je jara trěbne, dokelž so w Kobanê sněži. Wobydlerjo wsow a města su sami na so stajeni, dokelž njeje so poradźiło, wuchowanske koridory organizować. K nadběhowarjam słušeja tež wojowarjo Islamskeho stata. Woni maja najmoderniše turkowske brónje a postupuja nječłowjesce. Přikłady za to su wotprawjenja a namóc přećiwo žonam. Zaměr zóldnarjow a ekstremistow njeje jenož wojerske dobyće. Woni chcedźa wokolinu zničić a ludnosć terorizować.