Produkcija přiběra – eksport hinje
Fachowcy wobkedźbuja snadny rozrost industrije Němskeje
Wiesbaden (dpa/SN). W industriji Němskeje jewja so pokazki na to, zo so wjacore lěta trajaca hospodarska kriza kónči. W nowembru je produkcija w industriji, twarstwje a pola energijowych zastaraćelow njewočakowano třeći měsac za sobu rozrostła. Wosebje sylne bě wuwiće w awtomobilowej branši. Porno tomu na eksport wusměrjene wobłuki hospodarstwa dale ćerpja, wosebje wysokich cłow USA dla. Hospodarscy fachowcy zwěsćeja najebać to pod smužku dźeń a wjace pokazkow na to, zo so hospodarstwo krok po kroku zaso zhraba.
Najnowše daty pokazuja, zo „so konjunktura němskeje industrije poněčim zaso k dobremu wuwiwa“, rjekny analyst Jens-Oliver Niklasch, zastupnik badensko-württembergskeje krajneje banki.
Jenož hišće katastrofy
Štó su štyrjo najhórši njepřećeljo socializma? Nalěćo, lěćo, nazyma a zyma! Z tutym žortom so ludźo swój čas w NDR tomu smějachu, hdyž mějachu zamołwići swoju lubu nuzu, z wjedrowymi kapriolemi wobchadźeć. Statne medije potom hnydom wo „přirodnej katastrofje“ rěčachu. Dźensa so mi tohorunja zdawa, zo stejimy před mjezu eksistency. W kupnicy mi minjeny štwórtk napismo wulkeje bulwarneje nowiny do woči biješe: „Smjertny strach. Wostańće doma!“ Měnjena bě sněhowa fronta, kotraž so nam ze zapada bližeše a hrožeše, cyłe zjawne žiwjenje zlemić. Dźensa wěmy, zo njeje so swět sypnył. A po kónctydźenskich wjeselach na sankach a zamjerznjenych hatach mnozy mjeztym wobžaruja, zo ma přichodne dny wšitko zaso nimo być.
Warnowanje wjedrarjow je wažne. Hdyž pak so z „katastrofami“ jenož hišće tak mjerwi, jich wěšćenjam na kóncu nichtó wjace njewěri. Što pak, hdyž budu woprawnjene? Marko Wjeńka
Zymske wjeselo tež w Choćebuzu
Młódši nawoda w Magdeburgu?
Magdeburg (dpa/SN). W Saksko-Anhaltskej wuradźuja dźensa wječor wo dočasnym wotstupje ministerskeho prezidenta Reinera Haseloffa. K tomu zeńdu so krajne předsydstwa CDU, SPD a FDP. Haseloff sej žada, zo so strony pisomnje zawjazaja, zo koaliciju třoch stron tež po jeho wotstupje dale powjedu. Tež nawodnistwa ministerstwow nimaja so změnić. Haseloff bě minjeny tydźeń připowědźił, zo chcył zastojnstwo do młódšich rukow wotedać. Wón so nadźija, zo ma 46lětny Sven Schulze skerje móžnosće, so AfD wobarać a wólby krajneho sejma w septembru na dobro tuchwilneje koalicije zmištrować. Po dotalnych woprašowanjach leži AfD w Saksko-Anhaltskej ze 40 procentami jasnje před CDU, kotraž by 27 procentow dóstała. Tuž njeje ani wuzamknjene, zo změje AfD w nowym krajnym sejmje absolutnu wjetšinu.
Jeli so socialdemokraća a liberalni dźensa wječor ke koaliciji wuznaja, móhli Schulza kónc januara za ministerskeho prezidenta wuzwolić. Haseloff je wot lěta 2011 ministerski prezident. Schulze je krajny předsyda CDU a minister za hospodarstwo a ratarstwo.
To a tamne (12.01.26)
Sobu do łoža swojeju knjeza abo knjenje smě třećina wšěch domjacych zwěrjatow. Tole je wuslědk reprezentatiwneho woprašowanja slědźenskeje agentury YouGov. Za tym su so tež ludźi w Šwicarskej, Francoskej, Awstriskej a Italskej prašeli. Na wšěch 29 procentow woprašanych rjekny, zo swoje łožo ze štyrinohačemi dźěli. Na druhim boku dyrbi 52 procentow zwěrjatow w nocy do swójskeho korbika abo do klětki.
Swojeho znateho na hońtwje zatřělił je 22lětny we wuchodowestfalskim Warburgu. Štyrjo młodostni w starobje mjez 22 a 24 lětami běchu minjeny pjatk wječor do ćmoweho lěsa šli. 22lětny zalěze z přewodnikomaj na łakańcu. Wottam třěli wón na 23lětneho, kiž sam na susodnej łakańcy sedźeše. Najebać prócowanje lěkarja młody muž hišće w lěsu wudycha. Zamołwići z toho wuchadźeja, zo jedna so wo tragiske njezbožo.
Strašnu raketu zasadźili
Kijew (dpa/SN). Ruska je přećiwo Ukrainje ćežku balistisku raketu zasadźiła. Raketa typa Orješnik je njedaloko Lwiwa blisko pólskeje mjezy na zemju zrazyła. Ukrainske wojerske lětarstwo je po wšěm kraju powětrowy alarm wukazało. Dotal njeje oficialnje wobkrućene, hač so woprawdźe wo raketu Orješnik jedna. Tale raketa je kmana atomowe bomby transportować. Při nadpadach Ruskeje na stolicu Kijew su štyrjo wobydlerjo žiwjenje přisadźili.
Ratarjo dale protestuja
Brüssel (dpa/SN). Do dźensa planowaneho podpisanja wikowanskeho zrěčenja EU-Mercosur ze štyrjomi krajemi Łaćonskeje Ameriki su francoscy ratarjo pomjezne přechody do Belgiskeje blokowali. Z traktorami zaraćichu awtodróhu A2 do směra na Brüssel. Ratarjo boja so konkurency tunich ratarskich wudźěłkow. Tež w Sakskej so burja hrožacym importam wobaraja, mjez druhim z traktorami před cyrkwju Našeje knjenje w Drježdźanach.
W Iranje žadyn internet
Tysacy ludźi su wčera w Minneapolisu w staće USA Minnesota ...
Berlinski měšćanostawe wuskosćach
Berlin (dpa/SN). Senatorka za hospodarstwo zwjazkoweje stolicy Franziska Giffey (SPD) je so kritisce wo knježacym wyšim měšćanosće Kaiju Wegneru (CDU) wuprajiła. Wón bě tenis hrał, mjeztym zo bě na juhozapadźe zwjazkoweje stolicy hodźiny do toho wulka milinowa hawarija wudyriła. „To cyle njerozumju“, rjekny politikarka SPD při wopyće hladarnje seniorow w měšćanskim dźělu Zehlendorfje. „Dožiwjam ze stron wobydlerjow mjeztym jara zamylene reakcije.“
Kajke politiske sćěhi zadźerženje Wegnera změje, měło so wočaknyć. „Móžu jenož rjec, zo bych ze situaciju hinak wobchadźała“, wona doda. Giffey derje rozumi, zo trjeba čłowjek w tajkej krizowej situaciji přestawku. „Potom pak by wón to tež rjec móhł.“
Haseloffchce wotstupić
Magdeburg (dpa/SN). Ministerski prezident Saksko-Anhaltskeje Reiner Haseloff (CDU) je pod wěstymi wuměnjenjemi zwólniwy, wotstupić. Po informacijach powěsćernje dpa maja so přichodnu póndźelu wšitke strony knježerstwoweje koalicije pisomnje zawjazać, wobsahi koaliciskeho zrěčenja přewzać a zwjazk CDU, SPD a FDP dale wjesć. Potom móhł načolny kandidat CDU Sven Schulze zastojnstwo ministerskeho prezidenta přewzać. W Saksko-Anhaltskej wola 6. septembra nowy krajny sejm. Tuchwilu knježi tam koalicija CDU, SPD a FDP. We woprašowanjach je AfD ze swojim načolnym kandidatom Ulrichom Siegmundom mjezu 40 procentow docpěła.
Reiner Haseloff je wot lěta 2011 ministerski prezident. Loni w awgusće bě wón připowědźił, zo lětsa njekandiduje. Kritikarjo so boja, zo njezměje Schulze hač do septembra hižo dosć chwile, so jako ministerski prezident profilować.
Nahladnosć SPD a USA woteběra
Berlin (dpa/SN). SPD je při najnowšim woprašowanju sćelaka ARD na nahladnosći mjez ludźimi w Němskej přisadźiła a docpěwa w tak mjenowanym njedźelnym woprašowanju 13 procentow. To je procent mjenje hač zašły měsac. Hišće słabša bě strona w awgusće 2019 z dwanaće procentami.
Porno tomu je so unija CDU/CSU wo procent na 29 procentow polěpšiła. AfD dóstawa dale 25 procentow hłosow. Zeleni maja kaž dotal dwanaće a Lěwica dźesać procentow. BSW je so na tři procenty pohubjeńšił (minus jedyn) a njeby tak runje kaž FDP (dale tři procenty) w zwjazkowym sejmje zastupjeny był, bychu-li zajutřišim, njedźelu, wólby byli.
Podawki minjenych tydźenjow su nahladnosći USA jara zeškodźeli. Jenož dwanaće procentow Němcow chwali sej dźěło prezidenta Donalda Trumpa. Dowěra do USA je na 15 procentow spadnyła.
