Puć do njewotwisnosće?
Kolesa zamknyć
Twarja hoberski skład
To a tamne (18.12.25)
We wjeršku štoma je muž ze swojim płujadłom wisajo wostał. Njezbožo je pilot w zapadnych westfalskich horach nimale njezranjeny přežiwił. Wón wosta něhdźe 20 metrow wysoko tčacy, wohnjowa wobora Porta Westfalica rozprawja. Prawdźepodobnje bě so powjaz torhnył, z kotrymž muž płujadło wodźeše. Pućowarjo běchu njezbožo blisko Wittkindsburga wobkedźbowali a pomocnikow wołali.
Smě přenajer bydlenja žonu jeje pakistanskeho mjena dla wotpokazać? Z tutym prašenjom je so dźensa zwjazkowe sudnistwo w Karlsruhe zaběrało. Žona žada sej wot wikowarja imobilijow zarunanje, dokelž je ju jeje pochada dla diskriminował. Wospjet bě wikowar wobhladanje bydlenja wotprajił. Jako so wona ze „Schneider“, „Schmidt“ abo „Spieß“ přizjewi, bě termin naraz móžny.
50 miliardow eurow za wójsko
Berlin (dpa/SN). Wobstaranje nowych brónjow za zwjazkowu woboru po słowach zakitowanskeho ministra Borisa Pistoriusa (SPD) „poněčim zaběži“. Etatowy wuběrk zwjazkoweho sejma měješe dźensa předłohi za nowe brónjenske projekty we wobjimje 50 miliardow eurow na blidźe. 22 miliardow eurow wudadźa za wosobinski škit a drastu wojakow, štyri miliardy eurow płaći rakety wotwobaracy system Arrow 2, wjace hač štyri miliardy eurow trjebaja za nowy tank Puma.
Wobydlerski pjenjez změnja
Berlin (dpa/SN). Tři lěta po zahajenju reformy wobydlerskeho pjenjeza chce koalicija CDU/CSU a SPD prawidła přiwótřić a pomjenowanje zaso šmórnyć. Zwjazkowe knježerstwo chcyše wotpowědny namjet ministerki za dźěło Bärbel Bas (SPD) schwalić. Takrjec w poslednim wokomiku bě so knježerstwo na nowe formulacije dojednało. Tak chcedźa srědki skrótšić, jeli so přijimarjo pjenjez prawidłownje njepřizjewja. Štóž přicpějomne dźěło wotpokazuje, dyrbi tohorunja ze skrótšenjemi ličić.
Trump připowědźa narěč
Zwjazkowi policisća USA wotwjedu muža, kotrehož su we wobłuku ...
Rozsudny wjeršk EU za Merza
Klingbeil: Rěčimy, budźe-li na času
Berlin (dpa/SN). Předsyda SPD Lars Klingbeil je zdźeržliwje na prašenje za móžnym zasadźenjom němskich wojakow za zawěsćenje měra w Ukrainje reagował. „Nječińmy pjatu kročel do prěnjeje, debatujmy wo tym, hdyž budźe čas za to prawy“, rjekny Klingbeil Osnabrückskim nowinarjam. „Jasne je: Němska swojej zamołwitosći stajnje wotpowěduje. Hižo nětko smy najwjetši podpěraćeljo Ukrainy“, wicekancler doda.
Po dwaj dnjej trajacych jednanjach z Ukrainu běchu so předwčerawšim, póndźelu, wjacore europske kraje za to wuprajili, wot Europy nawjedowanu multinarodnu wojersku jednotku zestajeć. Wojacy měli ukrainske wójsko podpěrować a powětrowy rum kraja dohladować.
Trump žada sej wolij Venezuele
Washington (dpa/SN). Prezident USA Donald Trump je wulku wojersku prezencu swojeho wójska před pobrjohom Venezuele z pokładami zemskeho wolija w južnoameriskim kraju zwjazał. Na swojej internetnej platformje Truth Social republikan piše, zo je Venezuela USA „wolij, kraj a druhe zamóženstwo pokradnyła“ a žada sej „hnydomne wróćenje“. Knježerstwo Venezuele žadanja wotpokazuje. „Groteskne hroženje“ Trumpa je hrube ranjenje prawa ludow.
Spočatk 2000tych lět bě Venezuela swoje składy zemskeho wolija zestatniła. Potrjechene běchu wukrajne a tež firmy z USA. Slědowaše juristiska zwada wo zarunanje.
Trump je swoje postupowanje přećiwo Venezueli mjeztym dale přiwótřił. Wón mjenowaše knježerstwo prezidenta Nicolása Madura „teroristisku organizaciju“ a je blokadu wšěch wolijowych tankowcow připowědźił, kotrež steja na lisćinje sankcijow USA a so Venezueli bliža abo přistawy kraja wopušća.
