To a tamne (05.12.25)
Na wšěch 59 kuskow butry je policija we wačoku třoch paduchow w Podstupimje namakała. Trójka bě nimale 15 kilogramow butry do wačoka tyknyła a so z kupnicy zminyła. Kedźbliwy kupc bě tole wobkedźbował. Přiwołana policija skućićelow njedaloko kupnicy zaja. Mužojo su policiji druhich padustwow dla derje znaći. Nětko ma sudnik rozsudźić, hač dyrbja do jastwa. Što cwólba z telko butru chcyše, njeje znate.
Ćeknjenu kruwu su po wjacorych měsacach błudźenja na brjoze jězora w hornjej Bayerskej popadnyli. Arielle, kaž ju pomocnicy mjenuja, je mjeztym na statoku organizacije za škit zwěrjatow. Kruwa bě před poł lětom z pastwy ćeknyła a žiworješe na kromje jězora. Wšitke pospyty, skoćo popadnyć, běchu zwrěšćili. Tuž ju nětko z třělbu pohłušichu. Zamołwići so bojachu, zo wona zymu njepřetraje.
Nowy wulkopósłanc Němskeje Serbski seminar wopytał
Dr. Peter Reuss, kotryž je wot spočatka winowca wulkopósłanc Němskeje w Praze, je wčera Serbski seminar wopytał, zo by so wo stawiznach Serbow a jich stykach z Čechami informował.
„Dołhož Sakski kontaktny běrow w Praze eksistuje, je to prěni raz, zo je wulkopósłanc sam přeće a zajim jón wopytać zwuraznił“, rjekny nawodnica běrowa Josefina Ofner. Studowany stawiznar Reuss, kiž bě so 1964 w Freiburgu w Breisgauwje narodźił, bě dotal mjez druhim wulkopósłanc w Turkowskej a zastupowaše Němsku pola UNESCO w Parisu. Ofner rozprawja, zo je hnydom po nawjazanju kontakta a prěnjej rozmołwje wo termin w Hórnikowej knihowni prosył. Zastupjerka předsydy čěskeho towarstwa přećelow Serbow Společnost přátel Lužice (SPL) Eliška Oberhelová praji: „Zawěsće je hižo někotry wulkopósłanc Serbski seminar wopytał. Ale wón je najskerje prěni, kotryž je hnydom stawizny Serbow a jich zwisk z Čechami zrozumić chcył.“ Połdra hodźiny jeho předsyda SPL Lukáš Novosad po domje wodźeše.
Šulerjo jutře protestuja
Zeleni přećiwo praskotakam
Drježdźany (dpa/SN). Na swoje poslednje posedźenje w tutym lěće je so Sakski krajny sejm dźensa zešoł. Na próstwu Zelenych debatowachu wo zakazu silwesterskich praskotakow. Zeleni chcedźa zwěrjata, sobudźěłaćerjow wuchowanskich słužbow a přirodu lěpje škitać. Lěwica diskutowaše wo renće a CDU wo modernizowanju stata. Dalše temy běchu lěkarske zastaranje w swobodnym staće a wuskutki titula Europskeje kulturneje stolicy za Kamjenicu.
Trump za transparencu
Washington (dpa(SN). Prezident USA Doland Trump chcył widejo wo nadpadźe mariny USA na pozdatny čołm drogowych kurěrow w Karibice wozjewić. Při tym běchu dweju přežiwjeneju zaměrnje morili. Na to bě diskusije wo tym wudyriła, hač bě nadpad w mjezynarodnych kónčinach morja a zaměrne morjenje ludoprawnisce w porjadku. Zakitowanski minister Pete Hegseth je připowědźił, zo USA z tajkimi nadpadami pokročuja.
Netanjahu so wukaza njeboji
Zwjazkowy prezident Frank-Walter Steinmeier (nalěwo) a kral Charles ...
Niši dawk za jědź
Znowa wuličić?
Ukrainska delegacija w Floridźe
Washington (dpa/SN). Po zetkanju zastupnikow USA z ruskim prezidentom Wladimirom Putinom su dźensa delegaciju z Ukrainy w USA wočakowali. Wurjadny pósłanc USA Steve Witkoff a přichodny syn prezidenta USA Donalda Trumpa, Jared Kushner, chcyštaj so z njej w Floridźe zetkać.
Ukrainski prezident Wolodymyr Zelenskyj bě nowe rozmołwy Ukrainy a USA připowědźił. „Přihotujemy zetkanje w zjednoćenych statach“, rjekny wón wčera wječor w swojim widejowym poselstwje. Ukraina wočakuje wot USA najnowše informacije. Delegaciju Ukrainy nawjedujetaj sekretar narodneje wěstotneje rady Rustem Umjerow a šef generalneho staba wójska Andrij Hnatow.
Witkoff bě Putinej předwčerawšim, wutoru, předstawy USA wo móžnym měrowym rozrisanju předstajił. Poradźowar Putina we wonkownych politiskich naležnosćach Juri Ušakow bě po pjeć hodźinow trajacym zetkanju rjekł, zo njejsu žadyn kompromis docpěli. Ze stron USA rěkaše, zo je „hišće wjele dźěła“.
Kretschmer wita debatu wo renće
Sakski ministerski prezident młodym zapósłancam sejma dźakowny
Drježdźany (dpa/SN). Sakski ministerski prezident Michael Kretschmer raznu debatu wo wjele diskutowanym rentowym pakeće wuraznje wita. „Je cyle wažne, zo tutu diskusiju wjedźemy“, rjekny politikar CDU powěsćerni dpa w Drježdźanach. Debata je pokazała, zo je w „swójbje unije CDU/CSU“ móžno, najebać komplikowanu temu „jara wěcownu a porjadnu debatu“ wjesć. Wón so nadźija, zo zwjazkowy sejm na jutře planowanym posedźenju rentowemu paketej přihłosuje.
Přez diskusiju je so ludźom wuwědomiło, što je trěbne, zo by renta w Němskej zawěsćena była, ministerski prezident dale rjekny. Při tym dźe wo hospodarsku wukonliwosć. „Młodźi ludźo su našemu krajej wulku dobrotu wopokazali, dokelž su prašenje renty do srjedźišća diskusije stajili.“ Přećiwo rentowemu paketej spjećuje so wosebje młoda skupina frakcije CDU/CSU w zwjazkowym sejmje. Jeje zapósłancy wotpokazuja předwidźany naćisk wysokich kóštow dla, kotrež po jich měnjenju pozdźišo nastanu, budźe-li paket w tuchwilnej formje schwaleny.
