Karlsruhe (dpa/SN). Zwjazkowe sudnistwo (BGH) je dźensa rozsudźiło, zo smětej awtotwarcaj BMW a Mercedes-Benz dale bencinowe a dieselowe awta twarić. Sudnicy wotpokazachu skóržbu Němskeje wobswětoweje pomocy DUH, kotraž chcyše awtotwarcomaj tole po sudniskim puću zakazać. Organizacija za škit wobswěta powołuje so na powšitkowne prawo ludźi na škit wosobiny. Tute prawo je zranjene, jeli zawody dale awta produkuja, kotrež z wustorkom klimje škodźacych płunow strowotu ludźi wohrožuja.

New York (dpa/SN). Płaćizna wolija je po najnowšim ultimatumje prezidenta USA Donalda Trumpa přećiwo Iranej dale stupała. Barrel družiny Brent płaćeše dźensa rano 113,45 dolarow a z tym procent wjace hač minjeny pjatk. Po zahajenju nalětow USA a Israela na Iran je so zemski wolij ze Sewjerneho morja wo 57 procentow podróšił. Dalše zwyšenje pła­ćizny je wotwidźeć.

Trump bě w nocy na njedźelu hrozył, energijowe zastaranje Irana zničić, jeli kraj Hormuski přeliw w běhu 48 hodźin njewotewrje. Iran reagowaše bjezposrědnje na hroženje Trumpa: W padźe nad­pada USA na energijowy system Irana by Hormuski přeliw dołhi čas dospołnje zawrjeny wostał. Nimo toho chce Iran w tymle padźe energijowe a wodowe syće arabskich krajow zničić, kiž su we wójnje přećiwo Iranej zwjazkarjo USA.

Francoski prezident Emmanuel Ma­cron wšitke wobdźělene kraje namołwja, dalšej eskalaciji zadźěwać. Ta by wosebje ciwilnu ludnosć trjechiła, kotraž milinu a pitnu wodu nuznje trjeba.

Wólby krajneho sejma w Porynsko-Pfalcy na kóncu překwapjace

Mainz (dpa/SN). Woprašowanja běchu wěsćili, zo budźe po wólbach krajneho sejma w Porynsko-Pfalcy rozdźěl mjez wodźacymaj stronomaj jara snadny. Wuslědk tuž na kóncu wšitkich překwapi: Po 35 lětach knjejstwa SPD je so CDU tam wčera jako najsylniša móc přesadźiła, a to chětro jasnje. Runočasnje je SPD je w stawiznach wólbow krajneho sejma w Porynsko-Pfalcy swój najšpatniši wuslědk docpěła. Nowy ministerski prezident budźe prawdźepodobnje načolny kandidat CDU Gordon Schnieder. Do­talny ministerski prezident Alexander Schweitzer (SPD) dyrbi zastojnstwo wo­tedać. Wón je připowědźił, zo njesteji za funkciju w nowym knježerstwje k dispoziciji, kotrež budźe drje přichodnje wulka koalicija CDU a SPD.

Koho da zajimuja wólby krajneho sejma w Porynsko-Pfalcy? Štóž je z tajkim nastajenjom wčera wječor telewizor zaswěćił, bu spěšnje powučeny: Tam je so nazornje pokazało, kak so dotalny politiski system drjebi. Hač budźe nowy ministerski prezident małeho zwjazkoweho kraja z runje třomi milionami wólbokmanych nětko čłon CDU abo SPD, njeje scyła tak wažne. Woprawdźity wólbny dobyćer je AfD. ­Strona je swój podźěl hłosow wjace hač podwojiła. Najwjetši dźěl jeje wolerjow ­běchu ludźo, kotřiž do toho njejsu scyła k wólbam šli. Tamni běchu dotalni wolerjo CDU a SPD. AfD njeje hižo wjace fenomen wuchoda, hdźež bydla tak a tak spodźiwni ludźo. Tež na zapadźe je so strona zakótwiła. Zajimawe snano hišće budźe, kak SPD reaguje, kotraž je bolostnje přisadźiła. Wona njeje jenož jako strona dźěłaćerjow wuznam zhubiła, ale ma wosebje personalny problem na čole strony. Tón job wšak woprawdźe nikomu njezawidźiš. Marko Wjeńka