Wčera, štwórtk, wot­měchu so poslednje hry prěnjeho hrajneho dnja a prěnje hry druheho hrajneho dnja swětoweho mišterstwa. Dźeń zahaji so z partiju mjez Ghanu a Panamu. Tale hra njebě ani napjata ani kwalitatiwnje dobra. W prěnjej połojcy Afričenjo scyła žanu dobru kopańcu njehrajachu. Jeničce jónu třělichu do směra wrotow, tola bul kašćik wo kuriozne 18 metrow misny. W druhim přechodźe potom wobaj teamaj wjac iniciatiwy pokazaštej a dźakowano lucky-punchej Ghana hru w dohrajnym času 1:0 doby. Dale dźěše ze zetkanku Uzbekistana a Kolumbiskeje. Skónčnje – wjace wrotow, šansow a zabawy. Kolumbiska bě lěpši team hry a zasłuži sej dobyće 3:1. Z tym bě prěni hrajny dźeń swětoweho mišterstwa wotbyty. Z hru Čěskeje přećiwo Južnej Africe zahaji so druhi hrajny dźeń. Čěska wubranka hižo w šěstej mjeńšinje wrota docpě. Michal Sadílek docpě za mustwo našich čěskich susodow nawjedowanje. Tola to běše nimale wšitko na šansach. Jědnatki dla Češa w 83. min. hišće wurunanje kasěrowachu, štož běše runočasnje kónčny wuslědk.

Při dźeń a wyšich temperaturach drje tuchwilu najmjenje ludźi na hody mysli. Město Weißenfels w Saksko-Anhaltskej pak pyta nětko hižo štom za lětuše hodowne wiki. Sobudźěłaćerjo zarjada za kulturu planuja mjenujcy hižo wjeršk dohodowneho časa. Štom ma znaj­mjeńša dwanaće metrow wysoki a rjenje zrosćeny być. Štóž tajki poskićuje, móže so hač do 15. awgusta pola města při­zjewić.

Elfriede Jelinek, awstriska lawreatka Nobeloweho myta za literaturu, wěnuje so w swojej nowej knize „Unter Tieren“ kapitalizmej a jeho sćěham. Pod masku zwěrjatow wumjetuje wona čłowjekej najšpatniše wěcy, kiž jenož profita dla do skutka staja. Tež wobswětowa kriza a podobne k tomu słuša. 20. oktobra woswjeći Jelinek swoje 80. narodniny, tuž je kniha wjeršk jeje jubilejneho lěta.

Ewangelscy Serbja na cyrkwinskim a na domizniskim dnju we Wojerecach so zešli

Hrónčko „Mój čas steji w twojej ruce“ bě wodźacy motiw 80. serbskeho ewangelskeho cyrkwinskeho dnja, kiž wotmě so minjeny kónc tydźenja we Wojerecach. „Njejsmy jenož digitalnje zwjazani. Woprawdźita zwjazanosć je žiwa wot čłowjeka k čłowjekej“, fararka Jadwiga Malinkowa ze Slepoho sobotu na spočatku nutrnosće podšmórny. W swojim prědowanju so bliše ze sabatom zaběraše. Korjeń sabata je w 1. knize Mójzasa wopisany. Bóh je swět w šěsć dnjach stworił, sedmy dźeń je wotpočował, je jón žohnował a jón swjećił (Genezis 2,1 – 3). „Naše žiwjenje je wjac hač jenož terminy. Je čas swjećić. Je čas Boha chwalić. Je čas za zhromadnosć“, fararka wuzběhny. „Tutón čas zhromadnosće chcemy hajić.“ Cyrkwinski dźeń zjednoća Serbow a přećelow Serbow ze wšeje Łužicy kaž tež z Drježdźan a Lipska. Pod hesłom „serbske Wojerecy“ přewjedźechu wodźenja po měsće w serbskej a němskej rěči. Sigrun Nazdalina z Němcow a Werner Sroka z Kinajchta je nawjedowaštaj.

Lipsk (dpa/SN). Srjedźoněmski rozhłós MDR je detaile dojednanja z dźěłarnistwami wozjewił. Centralne dojednanje potrjechi swobodnych sobudźěłaćerjow, kiž su wot planowanych skrótšenjow w programje wosebje potrjecheni. Woni móža sej pod wěstymi wuměnjenjemi wurunanje žadać, hdyž su jich hono­rary wot apryla 2026 do měrca 2027 niše hač w lěće 2025. Kelko pjenjez swobodni dóstanu, wotwisuje wot indiwidualnych faktorow. MDR chce wot 2025 do 2028 dohromady 160 milionow eurow lutować, dokelž pobrachuja jemu pjenjezy.

Klimowu konferencu přihotowali

Bonn (dpa/SN). W Bonnje zakónča dźensa klimowu konferencu UN, kotraž je dźesać dnjow trała. Najwažniši nadawk něhdźe 6 500 delegowanych z knježerstwow, wědomosće, hospodarstwa a ciwilneje towaršnosće bě, přihotować přichodnu swětowu klimowu konferencu. Tuta budźe w nowembru w turkowskim měsće Antalya.

Wěstotna struktura njespokoja