Berlin (dpa/SN). Na tak mjenowanym „woclowym wjeršku“ je zwjazkowy kancler Friedrich Merz (CDU) dźensa ze zastupnikami branše z wjacorych zwjazkowych krajow wuradźował, kak móhło zwjazkowe knježerstwo w krizy tčacu industriju podpěrować. Na zetkanju wobdźělichu so tež financny minister Lars Klingbeil (SPD), ministerka za hospodarstwo Katherina Reiche (CDU) kaž tež ministerka za dźěło Bärbel Bas (SPD). Nimo ministerskich prezidentow zwjazkowych krajow z woclowej industriju běchu tež šefojo předewzaćow a zastupnicy dźěłarnistwo do kanclerskeho zarjada w Berlinje přichwatali.

Němska woclowa industrija bědźi so hižo dlěši čas z wulkimi problemami. ­Jako dodawaćelka krizojteje awtoweje ­industrije nima hižo dosć woteběraćelow za swoje produkty. Wysoke cła USA importy němskeho wocla nimo toho masiwnje haća. Wysoke płaćizny energije produkciju raznje podróša. Hospodarske ministerstwo připowědźa industrijnu płaćiznu miliny wot lěta 2026.

Zeleni žadaja sej w debaće wo syriskich ćěkancach wjace wěcownosće

Berlin (dpa/SN). Zwjazkowy kancler Friedrich Merz je w debaće wo syriskich ćěkancach wonkowneho ministra Johanna Wadephula (wobaj CDU) zakitował. ­„Wězo zwjazkowy kancler swojeho wonkowneho ministra podpěruje“, rjekny rěčnik knježerstwa Stefan Kornelius. Merz je jara spokojom, kak je frakcija CDU/CSU wutoru z temu wobchadźała. Wonkowny minister je runja druhim zamołwitym zastupnikam zwjazkoweho knježerstwa swoju poziciju w tymle prašenju rozłožił.

Wadephul bě minjeny tydźeń z wuprajenjemi wo wobydlerskej wójnje w Syriskej tójšto diskusijow w rjadach unije zbudźił. Pobywši w ćežko wobškodźenym měsće w Syriskej minister na tym nětko dwěluje, zo móža so syriscy ćěkancam hladajo na masiwne zničenja do swojeje domizny nawróćić. Merz ­runočasnje rjekny: „Wójna w Syriskej je nimo. Njeje žanych přičinow wjace za azyl w Němskej. Tuž móže so nawrót ­ćěkancow zahajić.“, wón rjekny.

Budźmy sprawni: Štó by sej měrowe myto bóle zasłužił hač NATO? Skónčnje su zamołwići w Münsteru, hdźež su 1648 zahubnu 30lětnu wójnu skónčili, zbožownu ruku dopokazali. K swjatočnosći w pyšnej žurli radnicy mam hišće pokiw: Za čestnych hosći bych sej na kóždy pad zastupnikow Serbiskeje přeprosył. Kraj ma wosebje wutrobny poćah k NATO. Najlěpši swjedźenski rěčnik by w tym zwisku Josch­ka Fischer wot Zelenych był. Tón bě lěta 1999 runje wonkowny minister Němskeje, jako měješe NATO wuběrny měrowy plan: Dokelž so Serbiska spjećowaše, swoju Kosowsku prowincu po woli zapada do njewotwisnosće pušćić, NATO Serbisku bombardowaše. 78 dnjow bomby padachu, na ministerstwa, mosty a dwórnišća. Tež „Tornada“ němskeho wójska so na akciji wobdźělichu, kiž je a wostanje wójnske złóstnistwo. Hišće dźensa spominaja w serbiskich městach z pomnikami na 3 000 mortwych ciwilistow. To tla so měrowe myto derje hodźi. Marko Wjeńka

Razniše chłostanja hroža přichodnje za rozbuchnjenje pjenježnych awtomatow. Zwjazkowy sejm je wčera wječor zakoń schwalił, z kotrymž minimalne chłostanje wot jednoho lěta na dwě lěće pozběhnu. Štóž při rozbuchnjenju druhich wohrožuje, dyrbi z jastwom hač do pjeć lět ličić. „Njeńdźe jenož wo pjenjezy w awtomatach, dźe wo wěstotne začuće ludźi“, rjekny zapósłanc CDU Marec Henrichmann. W Němskej je ličba rozbuchnjenych pjenježnych awtomatow minjenych dźesać lět masiwnje přiběrała.

Před strachami alkohola warnuje społnomócnjeny zwjazkoweho knježerstwa za bój přećiwo drogam Hendrik Streeck. Wón wobkedźbuje lochkomyslne wobchadźenje z alkoholom, „kiž steji při kóždej składnosći w srjedźišću“. Politikar CDU so za to wupraja, „přewodźane piće“ za młodostnych wot 14 lět wotstronić, dokelž wostanje alkohol strašna droga.