To a tamne (11.06.26)
Konop steji tež tele dny zaso w srjedźišću wosebitych wikow w Berlinje. Dźesaty raz zarjaduja tam lětsa mjenujcy wiki pod mjenom Mary Jane. Zarjadowarjo wočakuja hač do njedźele něhdźe 75 000 wopytowarjow. W halach samych wopytowarjo konop konsumować njesmědźa, jenož zwonka nich. Nimo toho je alkohol za čas wikow kruće zakazany, wšako je moto wikow „Cannabis first“. Na wiki pušća ludźi hakle nad 18 lětami. Małolětni nimaja přistup, byrnjež dorosćeni pódla byli.
W Sewjerorynsko-Westfalskej je policija wjacore domske přepytała. Tam přepytuja mjenujcy wjacore pady jebanstwa, w kotrychž běchu so ludźo jako policisća abo sobudźěłaćerjo bankow wudawali. Dohromady su ludźi pječa wo něhdźe 500 000 eurow zjebali. Wjacorych podhladnych su hižo zajeli.
Wojerske zwučowanje přewjedli
Pabrade (dpa/SN). Nowa němska tankowa brigada w Litawskej je wčera blisko městačka Pabrade, bjezposrědnje při běłoruskej mjezy, wulke wojerske zwučowanje přewjedła. Wobdźělenych bě něhdźe 2 900 wojakow, mjez nimi 2 300 wojakow Zwjazkoweje wobory, z dohromady 800 tankami. Zwjazkowa wobora je nimo toho wjace hač 300 trutow zasadźiła. Hač do lěta 2027 chcedźa zamołwići němsku brigadu w Litawskej na dohromady 4 800 wojakow powjetšić.
Sudnik WM njesmě zapućować
Miami (dpa/SN). Za swětowe mišterstwo w kopańcy nominowany somaliski sudnik Omar Artan njesmě najebać wizum wěstotnych přičin dla do USA zapućować. Powołanje na swětowe mišterstwo běše za njeho wulki són, kotryž je so zrazom skónčił, rjekny wón nowinje New York Times. Afriska koparska konfederacija (CAF) bě Artana loni jako najlěpšeho sudnika lěta wuznamjeniła.
Awtobomba muža moriła
Ze swojej žonu Elke Büdenbender přebywa zwjazkowy prezident ...
Pólska chce zapřijata być
Waršawa/Berlin (dpa/SN). Pólski ministerski prezident Donald Tusk je wuzamknjenje swojeho kraja z rozmołwow wo přichodźe Ukrainy w tak mjenowanym E3-formaće kritizował. Tole je wón telefonisce tež zwjazkowemu kanclerej Friedrichej Merzej (CDU) zdźělił, pólska powěsćernja PAP wčera wozjewi. W zdźělence Tusk zwurazni, zo „njemóže dojednanja, na kotrychž Pólska wobdźělena njeje, připóznać“. Pólska je esencielny zwjazowacy element w jednanjach wo přichodźe Ukrainy a regiona, wón znazorni.
Kancler Merz, britiski premier Keir Starmer, francoski prezident Emmanuel Macron a ukrainski prezident Wolodymyr Zelenskyj běchu so njedźelu w Londonje na rozmołwy zetkali. Tam wothłosowachu europske pozicije w zwisku z Ruskej a z móžnymi jednanjemi wo kóncu wójny. Merz je Tuska wo zetkanju a rozjimanych temach informował. Wobaj staj sej wo zasadnym kursu poboku Ukrainy přezjednaj, piše kancler na portalu za krótkopowěsće X.
Statistika z negatiwnym rekordom
Skónčnje jednać!
Porjedźenka
Kmanosće šulerjow woteběraja
Cyłozwjazkowe naprašowanje mjez wučerjemi 1. do 10. lětnika, kotrež je nakładnistwo Ernst Klett přewjesć dało, wujewja: Potrjeba spěchowanja šulerjow při čitanju, pisanju a ličenju je wulka.
Stuttgart (dpa/SN). Něhdźe 70 procentow dohromady 4 000 naprašowanych wuwučowacych w Němskej zwěsća, zo su centralne zakładne kompetency šulerjow w poslednich pjeć lětach signifikantnje woteběrali. Wot negatiwneho wuwića potrjechene njejsu jenož čitanje, pisanje, ličenje a rěčenje, ale tež zamóžnosć so koncentrować, wutrajnosć, samo-organizacija a socialne kompetency.
Tole bě wosebje wjele wučerjow zakładnych a wyšich šulow zwěsćiło, ale tež wuwučowacy na gymnazijach rozprawjachu wo lěto a nišich kompetencach šulerjow, wosebje hladajo na čitanje a pisanje. Tute wuwiće jenož fachowu wučbu njepoćežuje, ale wone rubi tež drohotny wučbny čas. Dołhodobnje ma to negatiwne wuskutki na šulske wotzamknjenje a na přechod do wukubłanja abo na dźěłowe wiki.
Wuměłstwo na zahrodźe dožiwili
To a tamne (10.06.26)
Předmjenje Sophia a Noah běštej tež w lěće 2025 statistisce najwoblubowanišej mjenje. Wo tym informuje Towaršnosć za němsku rěč (GfdS), kotraž wuhódnoća za swój report daty němskich stawnistwow. Hižo w lětomaj 2023 a 2024 stej tejle předmjenje na čole statistiki stałoj. Mjez najwoblubowanišimi w lisćinje su holče mjena Mia, Lina a Ella kaž tež hólče mjena Matteo, Theo a Leo.
Statny minister za kulturu Wolfram Weimer (njestronjan) wobdźěli so dźensa w Barcelonje na poswjećenju najwyšeje cyrkwinskeje wěže swěta. Dokónčenje natwara hłowneje wěže bazliki Sagrada Familia po wjace hač 144 lětach je wosebity podawk, wón w interviewje z moderatorom Jörgom Thadeuszom přeradźi. Nimo toho je wón přewšo hordy, zo je wulki swjaty křiž wěže bayerski twarc fasadow Gartner zhotowił.
