Drježdźany (dpa/SN). Sakski ministerski prezident Michael Kretschmer (CDU) chce ličbu nowych ćěkancow z Ukrainy w swobodnym staće wobmjezować. „Ličby su minjene měsacy drastisce stupali“, rjekny Kretschmer nowinarjam. „Tole wuwiwa so na wulki prud. Njeje prosće móžno, zo dale a wjace ludźi přiwzamy.“

Hłowna přičina stupaceje ličby ćěkancow su nowe postajenja w Ukrainje, kiž nětko tež mužam w starobje mjez 18 a 22 lětami dowoleja, swój kraj wopušćić. Wotpowědujo tomu ličby za škitom pytacych z Ukrainy spochi přiběraja: W juliju bě 35 muži do Sakskeje přišło, w awgusće bě jich sto. W septembru přińdźe 1 253 Ukrainjanow do swobodneho stata, to je nowy rekord po awgusće 2022.

Serbšćina dyrbi samozrozumliwje widźomna a słyšomna być, to je wažne wuměnjenje za to, zo so jeje prestiž zwyši. Na pućach a we wobchodach w Budyšinje abo Kamjencu – jadrowej kónčinje – pak je žiwa, wšědna serbšćina lědma słyšeć. Jako pobych před lětami na rěčnym kursu čěšćiny w Praze, dósta kóždy wobdźělnik, wšojedne kak derje čěšćinu hižo wobknježeše, přitykačk, na kotrymž steješe „Mluvím česky“ (Rěču čěsce). Samozrozumliwje sej jón při swojej tobole přityknych a tam wón tež wosta, jako běch dawno doma. Kak so zwjeselich, jako mje předawarka we wulkej Budyskej kniharni při kasy njejapcy čěsce narěča, dokelž bě přitykačk widźała. Njeby tajka jednora pokazka tež za Serbow wu­žitna była? Běrowy serbskich institucijow su personalnje derje pjelnjene. Namaka so ně­chtó, kiž by raz po hasach šoł a serbskim předawarjam, lěkarjam, hladarjam, mechanikarjam a dalšim posłužbarjam z přećel­nym słowčkom přitykačk (na př. lipowe­ łopješko) přepodał? Wěrju, zo by tole k słyšom­nosći serbšćiny přinošowało. Weronika Žurowa

Washington (dpa/SN). Knježerstwo prezidenta USA Donalda Trumpa je němsku lěwicarsku ekstremistisku skupinu Antifa-Ost na lisćinu terorowych skupin zapisać dało. Tež tři dalše skupiny z Europy tam přichodnje steja, wonkowne ministerstwo we Washingtonje zdźěla.

Zjednoćenstwo Antifa-Ost je mjez 2018 a 2023 „tójšto nadpadow přećiwo wosobam přewjedło, kotrychž ma za fašistow abo za dźěl prawicarskeje sceny w Němskej“, rěka w stejišću ministerstwa. Tamne skupiny skutkuja w Italskej a Grjekskej. Čłonojo skupiny njesmědźa hižo do USA přijěć a tam konta měć. Kritikarjo warnuja, zo móže Trump wuraz Antifa tež w USA přećiwo swojim kritikarjam znjewužiwać.

Berlin (dpa/SN). Etat Němskeje za lěto 2026 je zdźěłany. Po poslednich změnach je etatowy wuběrk zwjazkoweho sejma dźensa rano cyłkowny etat 524,5 miliardow eurow schwalił.

Móžno je to jenož z wysokim zadołženjom. Wuběrk je wobzamknył, nimale 98 miliardow eurow nowych kreditow brać, to je wosom miliardow wjace hač w naćisku zwjazkoweho knježerstwa předwidźane. K tomu přińdu kredity z wurjadneho fondsa za infrastrukturu a za zwjazkowu woboru. Tak so nowe zadołženje pod smužku na 180 miliardow zwyši.

Zwjazkowy sejm chce na swojich planowanych posedźenjach w tydźenju wot 25. hač do 28. nowembra doskónčnje wo etaće wothłosować. Etat postaja, kelko pjenjez móža jednotliwe ministerstwa w lěće 2026 wudać a kotre projekty ze srědkami financuja. Zastupnik Zelenych Sebastian Schäfer kritizuje, zo koalicija přemało pjenjez za inwesticije nałožuje. Dietmar Bartsch (Lěwica) skorži, zo z hoberskimi kreditami lědma što wuzbytkuja. Zastupnik SPD Thorsten Rudolph porno tomu mjenuje etat „mudre naprawy za zhromadnosć towaršnosće“.