Los Angeles (dpa/SN). Lěsne wohenje w Kaliforniskej so dale rozpřestrěwaja. Nětko su tež lěsy Hollywood Hills na kromje filmoweje metropole potrjechene. Z teje přičiny su zamołwići wukazali, dźěle města ewakuować. Dotal je pjeć ludźi w płomjenjach žiwjenje přisadźiło. Wjace hač 70 000 wobydlerjow před wohenjemi ćěka. Ně­hdźe 1 400 wohnjowych wobornikow je zasadźenych. Prezident Joe Biden sćele dalšich 2 000 čłonow narodneje gardy do regiona. Sylne wětry wohenje stajnje zaso wožiwjeja a wobornikow wohrožuja.

Policija wobydlerjow namołwja, přikazam zamołwitych nastupajo ewakuowanje na kóždy pad sćěhować. Najwjetši strach hrozy, hdyž ludźo sami spytaja, swoje domy před płomjenjemi škitać.

Wot wohenjow potrjechena je tež filmowa branša w Hollywoodźe. Wjacore zarjadowanja w zwisku ze spožčenjom lětušich filmowych mytow buchu wotprajene.

Po informacijach medijow USA jedna so hižo nětko wo jednu z najwjetšich wohenjowych katastrofow. Dotal su płomjenja wjace hač 1 000 domow zničili.

Do wšoněmskeho stronskeho zjězda AfD kónc tydźenja w Riesy

Drježdźany/Riesa (dpa/SN). Hladajo na připowědźene protesty wokoło zwjazkoweho zjězda AfD kónc tydźenja w Riesy ­liči policija tež z namócnymi akcijemi a chce kontrolne pasmo zarjadować. Přijězd wobdźělnikow chcedźa přewodźeć, Drježdźanska policajska direkcija zdźěla. Zamołwići za wěstotu wočakuja hač do 10 000 wobdźělnikow zjězda z cyłeje Němskeje. „Wjace hač sto busow zamołwitych za wobchad chětro wužaduja. Bjez koordinowaneho zasahnjenja policije by wobchadny chaos wěsty był“, rjekny Drježdźanski policajski prezident Lutz Rodig na nowinarskej konferency do zjězda.

Přewažny dźěl wobdźělnikow zjězda budźe měrniwy. Policija njezměje z nimi žane problemy a nawopak njetrjebaja hosćo z wobmjezowanjemi ličić, Rodig rjekny. „Hladajo na protesty w zwisku z wšoněmskim zjězdom AfD w Essenje kaž tež na zakładźe swójskich dopóznaćow dyrbimy z toho wuchadźeć, zo tež k namocy zwólniwi ludźo do Riesy přijědu. Woni steja w srjedźišću našich selektiwnych kontrolow“, policajski prezident připowědźi.

Powołanska orientacija je za šulerjow, kiž bórze šulu zakónča, njesměrnje wažna. Tuž je derje, zo so wysokošulski dźeń ­wotměwa. Přiwšěm mam zaćišć, zo je dźeń a wjace młodostnych hladajo na swój přichod přežadanych. Maja prosće přewjele móžnosćow. Wažne tuž je, telko poskitkow za powołansku orientaciju wužiwać, kaž móžno. To su prózdninske dźěło we wšelakich předewzaćach abo praktikumy, při kotrychž dóstawaja šulerjo dohlad do powołanskeho swěta. Tež w redakciji Serbskich Nowin rady młodych ludźi witamy. Toho abo tamneho smy mjeztym hižo z redakciskim wirusom natyknyli, tak zo móhł sej předstajić pozdźišo pola nas dźěłać. A tež Ludowe nakładnistwo Domowina so z akciju „Naša serbska kniha“ lěto wob lěto prócuje młodych ludźi docpěć a jim wšelake powołanja w nakładnistwje spřistupnić. Tajkich praktiskich a informaciskich zarjadowanjow njemóže dosć być. Šulerjo pak měli kóždu składnosć wužiwać. Bianka Šeferowa

Berlin (dpa/SN). Zwjazkowy kriminalny zarjad chce zhromadnje z nutřkownym ministerstwom hač k wurjadnemu posedźenju nutřkowneho wuběrka přichodnu póndźelu „chronologiju podawka“ nastupajo nadpad na Magdeburgske adwentne wiki předpołožić. Tole rozprawja powěsćernja dpa po informacijach nutřkownych politikarjow zwjazkoweho sejma. Zwjazkowa ministerka za nutřkowne naležnosće Nancy Faeser (SPD) a nawoda zwjazkoweho kriminalneho zarjada Holger Münch běštaj zapósłancam přehlad připowědźiłoj. Při tym chcedźa wujasnić, kotre zarjady su pokiwy na skućićela Taleba A. měli a kak su z nimi wobchadźeli. Pječa bě skućićel zamołwitym w šěsć zwjazkowych krajach derje znaty. Wšitke informacije chcedźa nětko znosyć, zo móhli sej cyłkowny wobraz stworić.

W běhu hodźinu trajaceho přednoška je Münch zapósłancam najnowše dopó­znaća kriminalistow předstajił. Tež zastupnicy zwjazkoweho zarjada za škit wustawy a zarjada za migraciju a ćěkancy su swoje dopóznaća přinošowali. Taleb A. bě loni 20. decembra ze swojim awtom šěsć ludźi morił a něhdźe 300 zranił.