Budyšin (JŠ/SN). Kurs čěšćiny 11. lětnika měješe tydźenja wosebity wopyt: Čłonce Towarstwa přećelow Serbow, Eliška Oberhelová a Vladimíra Holmanová, předstajištej šulerkam a šulerjam krasnu hodownu rjemjeslnisku tradiciju z Kyrkonošow. Zhromadnje z hosćomaj smědźachu młodostni sami kreatiwni być a filigranu hodownu pychu ze škleńčanych parličkow zhotowić.

Wuměłstwo pyšnych škleńčanych parličkow a parličkow za hodowny štom ma dołhu tradiciju: Hižo we 1870tych lětach wuwi so w Poniklá, małej wjesce w Kyrkonošach, centrum tutoho njewšědneho rjemjesła. 1902 zadomi so tam Stanislav Horna ze swojej swójbu a załoži prěnju manufakturu parličkow. Po Prěnjej swětowej wójnje běchu drobne, z ruku dute ornamenty jara woblubowane a po wšěm swěće předawane. To přewzachu wikowanske firmy w Jablonecu nad Nisu, kiž bě srjedźišćo eksporta debjenkow.