Vaduz (dpa/SN). Knježerstwo małeho wjerchowstwa Liechtenstein je kónc tydźenja cyberowy nadpad na register „hospodarsce woprawjenych wosobow“ dožiwiło. Něhdźe 31 000 datowych zapiskow z informacijemi wo wosobach, firmach, załožbach a rukowaćelstwach su njeznaći dotal pokradnyli. Z registrom spyta liechtensteinske knježerstwo financowanju terorizma a płokanju pjenjez zadźěwać.

Nawodnica knježerstwa Brigitte Haas a minister za justicu Emanuel Schädler staj krizowy stab zwołałoj. Z něhdźe 41 000 wobydlerjemi je wjerchowstwo sobu najmjeńši kraj swěta. Zdobom pak je stat hladajo na nutřkokrajny bruttoprodukt jedyn z najbohatšich krajow swěta.

Berlin (dpa/SN). „Renta z 63“ dawno hižo žana renta z 63 lětami njeje. Tuchwilu podadźa so ludźo z přerěznje 64,5 lětami na wuměnk. Najebać to je wona přičina nowych politiskich diskusijow. Nic naposledk dźe wo prašenje, hač dyrbja paket reformow rentow změnić, kotryž je rentowa komisija wudźěłała. Najzwadniši dypk w naćisku komisije je wotstronjenje zastupa do renty po 45 lětach dźěła z połnymi dochodami.

Šef CSU Markus Söder je so wčera w lěćnym interviewje telewizijneho sćelaka ARD za naćisk a přećiwo změnam wuprajił. Jako „zmysłapołnu wotmołwu na prašenje demografiskeho wuwića w Němskej“ wopisa wón namjetowane naprawy rentoweje komisije, kotraž je po jeho měnjenju dobre dźěło zdokonjała. Třo ministerscy prezidenća wuchodoněmskich zwjazkowych krajow Michael Kretsch­mer, Sven Schulze und Mario Voigt (wšitcy CDU) běchu sej minjeny tydźeń žadali, zo maja rentowy paket wosebitych wuchodoněmskich biografijow dla pře­dźěłać.

Z kupy Kreta rozprawja naša korespondentka Vanessa Žurec

Agios Pavlos/Kreta (VaŽ/SN). Po wulkich lěsnych wohenjach w Španiskej, Francoskej a Turkowskej wojuja nětko tež w Grjekskej přećiwo spěšnje so rozpřestrěwacym zahubnym płomjenjam. Wosebje potrjechene su dowolowe kupy Kreta a Paros kaž tež region zapadnje hłowneho města Athen.

Ekstremna horcota, dołha doba suchoty a sylne horce wětry, kotrež domoródni „Meltemi“ mjenuja, přisporjeja spěšnemu rozpřestrěwanju a znowawudyrjenju wohenjow. Po wčerawšich informacijach zamołwitych zarjadow je woheń hižo wjace hač 12 000 hektarow pódy zničił. We wsach Agia Galini, Nea Krya Vrysi a dalšich gmejnach na Kreće su něhdźe 6 000 dowolnikow ewaku­owali. Wosebje tragiske je: Hižo tři wohnjowi wobornicy staj tam při hašenskich dźěłach swoje žiwjenje při­sadźiłoj. Dalše tragiske njezbožo sta so wčera, njedźelu, zapadnje Athena w regionje Psatha. Tam staj hašenskej helikopteraj w powětře koliděrowałoj, při čimž dwaj pilotaj zemrěštaj.

Kak dźensniši dźeń wšo ze wšěm zwisuje, móžeš na jeničkej atomowej milinarni Madźarskeje wobkedźbować: Wona drje dotal nimale połojcu trěbneje miliny w kraju produkuje, tola strategiski přinošk za zastaranje z energiju je hižo dramatisce spadował a nětko dyrbja milinarnju najprjedy raz dospołnje hasnyć – dokelž ma Dunaj přemało wody za chłódźenje. To drje awtomatisce njewoznamjenja, zo běše nahłe wotpinanje poslednich atomowych milinarnjow w Němskej paralelnje ze zakónčenjom zmilinjenja brunicy, zmysłapołne. Tola přewulka wotwisnosć wot jednoho techniskeho systema, wšojedne wot kotreho, je riskantna. Hdyž bychmy sej swoju energiju nimale cyłkownje ze słónca a wětřika wudobywali, móhła so infrastruktura za zastaranje towaršnosće z energiju tež sypnyć – drje nic w horcym lěću, ale w ćichej, ćmowej zmyje. Bjez praweho miksa njeńdźe. A atomowa energija njeby tež w Němskej wšo wumóžacy wupuć była. Marcel Brauman