Zelenskyj prěni raz Serbisku wopytał
Premjera w Běłohrodźe: Prěni raz je ukrainski prezident Zelenskyj Serbisku wopytał, byrnjež tamniše knježerstwo přećelske styki z Moskwu pěstuje. Wobaj krajej zwjazuja prócowanja wo zastup do EU.
Běłohród (dpa/SN). Najebać přećelsku zwjazanosć knježerstwa Serbiskeje z Ruskej je so ukrainski prezident Wolodymyr Zelenskyj na statny wopyt do Běłohroda podał. Ze serbiskim prezidentom Aleksandarom Vučićom je so mjez druhim wo móžnym zhromadnym dźěle kaž tež wo swojich prócowanjach wo zastup do Europskeje unije rozmołwjałoj. Wo kooperaciji we wojerskim wobłuku njejsu so rozmołwjeli, wuzběhny Vučić minjenu sobotu na nowinarskej konferency. Na naprašowanje zdźěli, zo Serbiska z Ukrainu zhromadnu produkciju trutow njeplanuje. „Planujemy pak kooperaciju na tutym polu z Israelom“, přispomni Aleksandar Vučić.
To a tamne (10.08.26)
Na parcielne zaćmiće słónca móža so ludźo, kotřiž so za astronomiju zajimuja, wjeselić. Štóž chce we Łužicy sobu dožiwić, kak so měsačk před słónco suwa, njech je wot 19.15 hodź. wobkedźbuje. Wězo pak jenož z wotpowědnymi nawočemi, kotrež woči škitaja. Maksimalne zakryće z něhdźe 85 procentami wočakuja fachowcy w 20.08 hodź.
Po 19 wohenjowych alarmach při 660 lět starym swětoznatym mosće Kapellbrücke je so wohnjowa wobora w šwicarskim Luzernje lětsa podarmo na hašenje podała – naposledk 1. a 2. awgusta. Jako tam dojědźechu běše stajnje wšitko w porjadku. Nětko maja wobornicy podhlad, što za tym tči: mostowy křižny pawk (Larinioides sclopetarius), kotryž ma w twarjenjach při wodźe swoje doma. Prawdźepodobnje zalěze do wohnjowych přizjewjakow, a tak alarm zawinuje.
Ličba wukubłacych stabilna
W Sakskej industriji mikrochipow dźeń a wjace wukubłanskich městnow
Drježdźany/Lipsk (SN/MiP). 3 600 młodych ludźi je lětsa wukubłanske zrěčenje pola Drježdźanskeje Industrijneje a wikowanskeje komory (IHK) podpisało, informuje jednaćel tamnišeho wobłuka za kubłanje Torsten Köhler w rozmołwje z němskej powěsćernju dpa. Přichodne tydźenje liči wón z dalšimi 1 000 podpisanymi zrěčenjemi. W Sakskej so powołanske wukubłanje 1. awgusta resp. 1. septembra zahaji.
Lětsa pak zwěsća Köhler nowy trend na sakskich wukubłanskich wikach: Předewzaća njepřiwozmu hižo požadarjow, kotřiž je stoprocentowsce njepřeswědča. „Dotal su za wukubłanje zamołwići z toho wuchadźeli, zo móža deficity wučomnikow w běhu wukubłanja wotstronić“, praji Köhler a doda: „Tuta strategija njeje so jako dobra wopokazała. Přewjele wučomnikow měješe ćeže we wukubłanju abo je bjez zakónčenja dočasnje złoži“. Najebać to wotpowěduje cyłkowna ličba wukubłanskich městnow niwowej zańdźeneho lěta, wón podšmórnje.
Ruski tankowc znjezbožił
Maskat (dpa/SN). Před omanskim při-brjohom je 270 metrow dołhi ruski tankowc tak mjenowaneje tajneje floty znjezbožił. Kaž přirodoškitna organizacija Greenpeace zdźěla, pokazuja satelitne wobrazy na něhdźe 600 kwadratnych kilometrach morja rozpřestrěwacy so wolij. Z tym wotpowěduje dwójce přestrjeni Mnichowa. Wolij wohrožuje sensibelne ekosystemy, mjez druhim koralnišća.
Ugandscy wojacy bórze w Gazy
Kampala (dpa/SN). Parlament wuchodoafriskeho stata Ugandy je zasadźenje kontingenta wojakow w Gazaskim pasmje schwalił. Wojacy maja jako dźěl mjezynarodneje wojerskeje jednotki ISF situaciju w konfliktnym regionje stabilizować. Jednotku ISF su we wobłuku ramikoweho dorěčenja załožili, kotrež běše prezident USA Donald Trump loni naćisnył.
Wospjet nadpad w Syriskej
Legendarny spěšnik „SVT Zhorjelc“ z NDRskeho časa ma wot ...
Mawt podróši bliskowobchad
Bilger spěšne naprawy připrajił
Płaćiznu ćěriwow wobmjezować
To a tamne (07.08.26)
525 dźěći ewakuowali
Kramatorsk (dpa/SN). Dźeń a ćešich wojowanjow kołowokoło wuchodoukrainskeho města Kramatorska dla su wčera dohromady 525 dźěći a młodostnych ewakuowali. Jako „ćežki, ale trěbny rozsud“ wopisuje akciju Wadym Filaškin, wojerski guwerner w regionje Donezk. Kramatorsk je jenož 15 kilometrow wot fronty wojowacych zdaleny a je poslednja twjerdźizna ukrainskich jednotkow w regionje.
Muži z nožicami zraniła
London (dpa/SN). W zahrodźe Covent Garden wosrjedź Londona su policisća podhladnu 47lětnu žonu zajeli, kotraž běše štyrjoch muži z nožicami atakowała a zdźěla chutnje zraniła. Wšitkich zranjenych dowjezechu do chorownje, dwě wosobje stej zaso pušćenej. Přičiny nadpada dotal znate njejsu, zdźěli Londonska policija.
Prewenciju spěchować
