To a tamne (02.01.26)
Wosebje zwažliwi Romjenjo su tež lětsa na prěnim dnju lěta zaso do zymneje wody rěki Tibera skočili. Tradiciju nowolětneho skakanja pěstuja w italskej stolicy wot lěta 1946. Mjez zmužitymi běše wospjet Italčan Marco Fois, kotrehož mjenuja w Romje tež „Mister OK“. Titul zdobywa sej skakar, kotryž při skoku do hłubiny z palcom a pokazowakom najlěpje gestu ok pokazuje.
Finski Oulu a słowakski Trenčín stej wot wčerawšeho nowej kulturnej stolicy Europy. Najsewjerniše europske wulkoměsto Oulu a něhdźe 2 000 kilometrow zdalene słowakske město Trenčín naslědujetej saksku Kamjenicu a słowjensko-italske namjezne dwójne město Novu Goricu/Goriziu, kotrejž běštej titul loni měłoj. Runja nimaj poskićujetej tež Oulu a Trenčín cyłe lěto bohaty program kulturnych zarjadowanjow.
Předźěłaja chłostanske prawo
Berlin (dpa/SN). Zwjazkowa justicna ministerka Stefanie Hubig (SPD) chce policistow a sobudźěłaćerjow pomocnych słužbow w Němskej lěpje před nadpadami škitać. „Runje w silwesterskej nocy je ličba nadpadow na nich njesměrnje stupała“, piše wona w nowinskej zdźělence. „Tutomu trendej dyrbimy jako stat raznje zadźěwać, tež a předewšěm ze srědkami chłostanskeho prawa“, wona podšmórny. Tute ministerstwo tuchwilu předźěła.
Trump hrozy Iranej a Hamas
Palm Beach (dpa/SN). Prezident USA Donald Trump je na zeńdźenju z israelskim ministerskim prezidentom Benjaminom Netanjahuwom w swojej rezidency Mar-a-Lago na Floridźe Iranej kaž tež teroristiskej organizaciji Hamas hrozył. Nastupajo atomowy program Irana praji wón: „Je-li trjeba budźemy spěšnje wojersce zapřimnyć“. Hladajo na islamistisku Hamas Trump podšmórny, zo je wona za spomalenje měroweho procesa w Gazaskim pasmje zamołwita.
Chorownje lěpje přihotować
Z plakatami spominaja wobydlerjo stolicy Bangladeša Dhaka na bywšu ...
Dalši čołm zničili
Z manewrom pokročuja
Peking (dpa/SN). Hižo druhi dźeń přewjeduje China kołowokoło Taiwana wulki wojerski manewer. Chinska statna powěsćernja Xinhua rozprawja, zo zasadźuje chinske wójsko wójnske łódźe kaž tež bojowniske lětadła a bombowcy. Nimo toho je wójsko zwučowanja z wótrej municiju přewjedło. Manewer z hesłom „Misija sprawnosće 2025“ běše China wčera zahajiła. Peking rěči w zwisku z wojerskim zwučowanjom wo „chutnym warnowanju do směra separatistiskich mocow“. Taiwanske zakitowanske ministerstwo informuje, zo je w běhu jednoho dnja hač do wčerawšeho ranja 130 lětow chinskich wojerskich lětadłow a trutow kołowokoło kupy registrowało. Nimo toho wobkedźbowachu 14 chinskich wójnskich łódźow, wosom dalšich łódźow kaž tež powětrowy balon.
Eksperća pohódnoćeja manewer jako reakciju Chiny na njedawno wot USA přizwolene dodawanje brónjow do Taiwana.
Wjace nawrótow do domizny
Drježdźany (dpa/SN). Sakski nutřkowny minister Armin Schuster (CDU) informuje, zo je Sakski krajny wupućowanski centrum (LAZ) k tomu přinošował, zo ličba dobrowólnje do swojeje domizny so nawróćacych ćěkańcow stupa. Po jeho měnjenju je intensiwne poradźowanje nastupajo nawrót zakład za tutón pozitiwny trend. Centrum bu loni w juniju załoženy.
1 509 ludźi je hač do kónca nowembra dobrowólnje ze Sakskeje wupućowało, zdźěli sakske nutřkowne ministerstwo. To je něhdźe 560 wjace hač w lěće 2024. „Wyše ličby dopokazuja, zo so hižo eksistenca zarjadnišća kaž tež připowědźene přepołoženje do LAZ na potrjechenych wuskutkuje“, rjekny Schuster.
Ukraina wobwinowanja wotpokazuje
Washington/Moskwa/Kijew (dpa/SN). Prezident USA Donald Trump kritizuje pozdatny nadpad Ukrainy na rezidencu ruskeho prezidenta Wladimira Putina. „To njeje derje“, rjekny wón po tym, zo běše wobkrućił, zo je z Putinom telefonował. Ukrainski prezident Wolodymyr Zelenskyj wobwinowanja ze stron Ruskeje raznje wotpokazuje. Wone su wurěč za to, zo móže Putin swoju wójnu dale wjesć a twarjenja ukrainskeho knježerstwa w Kijewje nadběhować.
Ruski wonkowny minister Sergej Lawrow běše wčera w ruskich medijach „teroristiski nadpad“ na Putinowu rezidencu Waldai wozjewił, kotraž leži w regionje Nowgorod mjez Moskwu a Pětrohrodom. Tu Putin ze swójbu často kónc tydźenja přebyła. Ruski prezident pak ma wjacore rezidency w mnohich dźělach Ruskeje. Lawrow naspomni mjez druhim 91 ukrainskich trutow, kotrež je ruska powětrowa wobora wottřěliła. Wo škodach abo zranjenych ničo njerjekny. Wón připowědźi, zo změje ukrainski nadpad konsekwency.
Bóle na lěkarske zmylki dźiwać
Drježdźany (dpa/SN). Zeleni žadaja sej wot sakskeho knježerstwa wjace kedźbnosće za misnjenja lěkarjow. Potrjecheni nochcedźa žane politiske wurěče słyšeć, rjekny zapósłanc krajneho sejma Thomas Löser. „Hdyž je 176 ludźi w Sakskej z dopokazanym woporom lěkarskich zmylkow, njesmě statne knježerstwo woči začinić.“
Po informacijach Lösera je statna ministerka za strowotnistwo Petra Köpping (SPD) w swojej wotmołwje na naprašowanje Zelenych na wobstejace móžnosće kaž pruwowanje kwality, městna za zapodaće pohórškow a interne systemy za posrědkowanje pokiwow pokazała. Wšu Saksku wopřijace systematiske zapisowanje hrubych lěkarskich zmylkow pak nimaja. „Njejasne tohorunja je, kak so dopóznaća pruwowanjow woprawdźe wuhódnoća a wužiwaja, zo njebychu so zmylki hižo wospjetowali.“ Mediciniska słužba na swojej internetnej stronje ličby lěkarskich zmylkow wozjewja, naposledk kónc oktobra. Ličby poćahuja so na lěto 2024. Po tym je mediciniska słužba Sakskeje loni z 614 posudkami na wumjetowanja lěkarskich zmylkow dla reagowała.
Praskanje na mosće znowa zakazane
impresum
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Wyša redaktorka: Bianka Šeferowa 577 230
tel.: 03591 577 232 faks: 03591 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Serwis za abonentow: 577 263
Předań nawěškow: Jadwiga Šołćic 577 266 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
