Napjata situacija nastupajo Grönlandsku je tema wosebiteho wjerška EU

Berlin/Brüssel/Washington (dpa/SN). Po tym zo bě US-prezident Donald Trump po rozkorach kołowokoło Grönlandskeje z cłami hrozył, měrja so staty Europy na kurs kolizije z USA. Na wosebitym wjeršku móhli tuž tež napřećiwne naprawy z wobjimom wjacorych miliardow eurow na agendźe stać. Tole ma EU mjenujcy jako opciju k dispoziciji. „Swoje strategiske hospodarske a wěstotnopolitiske zaměry budźemy stajnje škitać“, pisaše prezidentka komisije EU Ursula von der Leyen njedźelu nawječor na platformje X. Krótko do toho bě prezident rady EU António Costa wosebity wjeršk nawodow statow EU zwołał. Jako termin mjenuje jedna ze zastojnicow EU štwórtk.

Costa zdźěli, zo su sej čłonske staty w tym přezjedni, zo cła transatlantiske poćahi podrywaja a zo z wikowanskim dojednanjom USA a EU kompatibelne njejsu. Kóždej formje nućenja pak chcedźa so wobarać. Von der Leyen je znowa swoju solidaritu z Grönlandskej a Danskej zwurazniła.