Po krawnych nadběhach islamistiskeho syriskeho knjejstwa na ludnosć w měsće Aleppo žada sej samozarjadnistwo regiona sewjerowuchodneje Syriskeje mjezynarodnu pomoc.

Mnozy Kurdojo njerozumja, čehodla swětowa zjawnosć mjelči, mjeztym zo so w Syriskej zaso wójnske złóstnistwa stawaja. Milicy noweho islamistiskeho knjejstwa kraja po kóncu doby diktatora Assada su tele dny wosebje w štwórćach Ashrafiya, Sheikh Maqsoud a Ban Zaid wulkeje metropole Aleppo přećiwo Kurdam zachadźeli. Elham Ahmad, zamołwita demokratiskeho samozarjadnistwa regiona sewjerowuchodneje Syriskeje, je srjedu na digitalnej nowinarskej kon­ferency „ćežke nadpady na ciwilnu ludnosć, wuhnaće na wulkich płoninach a přeńdźenja přećiwo čłowjeskim prawam“ šwikała.

Tohodla Zjednoćene staty Ameriki a Europsku uniju namołwjeja, wuwiće w Aleppu a sewjernej a wuchodnej Syriskej nic jenož wobkedźbować, ale tež diplomatisce wowliwować. Elham Ahmad: ­„Jenož mjezynarodny ćišć móhł přechodne knjejstwo k dialogej nuzować a dalšim masakram zadźěwać.“