Wulki rozdźěl
Choćebuski fotograf Gerd Rattei zemrěł
Gerd Rattei, znaty Choćebuski fotograf, je dnja 9. meje w starobje 89 lět zemrěł. Wón zawostaji mandźelsku Gudrun, dwě dźowce, tři wnučki a tři prawnučki.
Narodźił bě so wón 12. decembra 1936 w Choćebuskim měšćanskim dźělu Strobice (Ströbitz). Čas žiwjenja běše hordy na swoje serbske korjenje, na serbski pochad swojeje maćerje a wowki z wjeski Njabožkojce (Naundorf) w Błótach. Po wopyće šule a wukubłanju na molerja w Choćebuskej wabjenskej agenturje DEWAG dźěłaše jako moler spisow za tehdyšu Narodnu ludowu armeju (NLA). Po tym běše pola Kulturneho zwjazka NDR w Choćebuzu přistajeny, hdźež bě mjez druhim za dźěło fotowych skupin zamołwity. Wosobinsce je fotowu skupinu w Choćebuskim domje NLA nawjedował. W lěće 1961 započa zaso za agenturu DEWAG dźěłać, wotnětka jako fotograf. Tam wosta hač do jeje rozpušćenja w lěće 1990 přistajeny. Jeho wabjenske fotografije škleńcy ze škleńčernjow w Běłej Wodźe a w Derbnom z tutoho časa su legendarne.
To a tamne (21.05.26)
Zahinjena wjelryba „Timmy“, kotruž su před něšto wjac hač tydźenjom před danskej kupu Anholt wuhladali, běše prawdźepodobnje „Tina“. Mórski biologa a čłon towarstwa za škit wjelrybow M.E.E.R. Fabian Ritter je nowe fota wo zwěrjeću wuhódnoćił a wonkowne žónske splažne organy zwěsćił. Minister za wobswět Mecklenburgsko-Předpomorskeje Till Backhaus, eksperća a medije su dotal wo muskej rybje rěčeli.
Preparěrowanu swójsku wutrobu je 32lětna Martina Grabsch z Wunstorfa w Nižosakskej přijała. Loni běchu jej wutrobu darićela zasadźili. Najebać mnohe operacije nochcyše młoda žona, kotraž bě 30 lět z chorej wutrobu žiwa była, zo wuoperowany organ prosće preč ćisnu. Staršej staj jeje wutrobu wot znateho medicinarja a plastinatora Gunthera von Hagensa preparować dałoj.
Merz z frakciju SPD so zešoł
Berlin (dpa/SN). Prěni raz je Friedrich Merz (CDU) w zastojnstwje kanclera wčera w Berlinje frakciju SPD wopytał. Na frakciskim posedźenju wón wuzběhny, zo měłoj so wobaj koaliciskej partneraj „čerwjenych linijow“ w zjawnych debatach wzdawać. „Trjebamy nětko měr, dowěru a zmužitosć w knježerstwje“, wón praji. Zdobom skedźbni na to, zo njeje žaneje druheje alternatiwy, hač aktualna koalicija. Mjeńšinowe knježerstwo wón wotpokaza.
Magyar na wopyće w Pólskej
Waršawa (dpa/SN). Nowy madźarski ministerski prezident Peter Magyar wopyta na swojej prěnjej jězbje do wukraja Pólsku. Wčera wječor poby w Krakowje. Dźensa zetka so we Waršawje ze šefom pólskeho knježerstwa Donaldom Tuskom a z pólskim prezidentom Karolom Nawrockim. W Gdańsku chce Magyar ze załožerjom Solidarnosće a lawreatom Měroweho Nobeloweho myta Lechom Wałęsu porěčeć.
Jenož kóždy pjaty štom strowy
Bywšu zwjazkowu kanclerku Angelu Merkel (naprawo) a bywšeho ...
Reparować město preč ćisnyć
Spěchowanjeza e-awta zahajili
4 600 wučerskich městnow mjenje
Drježdźany (dpa/SN). Lěto a nišich ličbow šulerjow dla chce Swobodny stat Sakska hač do lěta 2040 něhdźe 4 600 wučerskich městnow wottwarić. Po wobličenju kultusoweho ministerstwa potom 25 600 wučerjow hižo trěbnych njebudźe. „Hač do šulskeho lěta 2031/2032 chcemy tuchwilny staw městnow zdźeržeć“, sakski kultusowy minister Conrad Clemens (CDU) wčera w Drježdźanach při předstajenju ličbow wuzběhny. „Nochcemy zmylki minjenych lět wospjetować. To rěka nochcemy přewusko kalkulować“, wón doda. Tak mjenowana prognoza potrjeby wučerjow orientuje so na prognozy ličbow šulerjow, kotruž běše Krajny zarjad za statistiku loni w decembrje wozjewił. Po tutej změje Sakska w šulskim lěće 2040/41 něhdźe 80 000 šulerjow mjenje hač dźensa. Tuchwilu je jich w Sakskej 440 000.
Zawrjenje jednotliwych šulow sakski kultusowy minister wuzamknył njeje. Tutu naprawu pak chce dalokož móžno wobeńć. „Nochcu rigorozne zawrjenje šulow kaž wokoło wróćicy lěttysaca wospjetować. Wokomiknje z toho wuchadźamy, zo móžemy decentralnu šulsku syć w dalokej měrje zachować“, Clemens podšmórny.
