Kmanosće šulerjow woteběraja
Cyłozwjazkowe naprašowanje mjez wučerjemi 1. do 10. lětnika, kotrež je nakładnistwo Ernst Klett přewjesć dało, wujewja: Potrjeba spěchowanja šulerjow při čitanju, pisanju a ličenju je wulka.
Stuttgart (dpa/SN). Něhdźe 70 procentow dohromady 4 000 naprašowanych wuwučowacych w Němskej zwěsća, zo su centralne zakładne kompetency šulerjow w poslednich pjeć lětach signifikantnje woteběrali. Wot negatiwneho wuwića potrjechene njejsu jenož čitanje, pisanje, ličenje a rěčenje, ale tež zamóžnosć so koncentrować, wutrajnosć, samo-organizacija a socialne kompetency.
Tole bě wosebje wjele wučerjow zakładnych a wyšich šulow zwěsćiło, ale tež wuwučowacy na gymnazijach rozprawjachu wo lěto a nišich kompetencach šulerjow, wosebje hladajo na čitanje a pisanje. Tute wuwiće jenož fachowu wučbu njepoćežuje, ale wone rubi tež drohotny wučbny čas. Dołhodobnje ma to negatiwne wuskutki na šulske wotzamknjenje a na přechod do wukubłanja abo na dźěłowe wiki.
Wuměłstwo na zahrodźe dožiwili
To a tamne (10.06.26)
Předmjenje Sophia a Noah běštej tež w lěće 2025 statistisce najwoblubowanišej mjenje. Wo tym informuje Towaršnosć za němsku rěč (GfdS), kotraž wuhódnoća za swój report daty němskich stawnistwow. Hižo w lětomaj 2023 a 2024 stej tejle předmjenje na čole statistiki stałoj. Mjez najwoblubowanišimi w lisćinje su holče mjena Mia, Lina a Ella kaž tež hólče mjena Matteo, Theo a Leo.
Statny minister za kulturu Wolfram Weimer (njestronjan) wobdźěli so dźensa w Barcelonje na poswjećenju najwyšeje cyrkwinskeje wěže swěta. Dokónčenje natwara hłowneje wěže bazliki Sagrada Familia po wjace hač 144 lětach je wosebity podawk, wón w interviewje z moderatorom Jörgom Thadeuszom přeradźi. Nimo toho je wón přewšo hordy, zo je wulki swjaty křiž wěže bayerski twarc fasadow Gartner zhotowił.
Demokratija njeje nam prosće „wot Boha spožčena“
Budyšin (CS/SN). Njewšědnje wjele připosłucharjow běše so minjeny pjatk wječor w tachantskej cyrkwi na Budysku narěč zešło. To njezadźiwa, wšako referowaše Carlo Masala, w Němskej derje znaty politiski wědomostnik a profesor za mjezynarodnu politiku na Mnichowskej uniwersiće Zwjazkoweje wobory. Něhdźe 400 zajimcow chcyše wjace wo jeho rozmyslowanjach k temje „By-li Ruska dobyła“ zhonić.
Smy w času boja wo nowy swětowy porjad žiwi. A w konflikće w Ukrainje dźe wo nowy swětowy porjad, rěčnik wuzběhny. Wosebje tak mjenowane BRICS-staty – to je zwjazkarstwo wliwapołnych statow Brazilskeje, Ruskeje, Indiskeje, Chiny a Južneje Afriki – tutón nowy porjad přihotuja. Mjez druhim su nowy swójski system płaćenja z nowej měnu zawjedli, kotryž aziska wuwićowa banka zaruča. Cil zwjazkarstwa je, zapadnym industrijnym narodam móc sćazać.
„Stuttgart 21“ so dale dlije
Stuttgart (dpa/SN). Wotewrjenje dwórnišća w Stuttgarće drje so wospjet přesunje. Wo tym informuja wjacore němske medije, mjez druhim nowina FAZ. Za projekt „Stuttgart 21“ zamołwita projektna towaršnosć rozprawja wo twarskich deficitach a wo drastiskich komdźenjach, mjez druhim w digitalnym wobłuku. Planowane poswjećenje njebudźe w lěće 2029, ale prawdźepodobnje hakle 2031 abo pozdźišo. Poprawom je Němska železnica dwórnišćo w lěće 2019 wotewrěć chcyła.
Mjezsobne ataki zakónčiłoj
Tel Aviv/Teheran (dpa/SN). Iran a Israel stej swoje mjezsobne ataki z raketami zakónčiłoj. Israelski ministerski prezident Benjamin Netanjahu je přestawku wojowanjow we widejowej powěsći wobkrućił. Wón pak wuzběhny: Při najmjeńšim wopačnym kroku Irana Israel ze swojim nadpadami pokročuje. Tež iranske wojerske wjednistwo je wčera popołdnju zdźěliło, zo je swoje nadpady na Israel zakónčiło. Tež wone hrožeše z hóršimi nadpadami, jeli Israel swoje wojerske wuprawy w južnym Libanonje njezakónči.
Tilly w Moskwje njepřitomny
Ze 130 wuchowanskich lacow (Rettungsweste) stworjeny, šěsć króć ...
Zeleni žadaja sej wyši BAföG
Němsko-francoski projekt zwrěšćił
Berlin (dpa/SN). Zhromadny němsko-francoski projekt wojerskeho lětadła FCAS je po lěta trajacej ćahańcy doskónčnje zwrěšćił. Z kruhow němskeho knježerstwa rěka: Zwjazkowy kancler Friedrich Merz (CDU) a francoski prezident Emmanuel Macron staj dopóznałoj, zo so na projekće wobdźělenej předewzaći Dassault und Airbus wo dalšim zhromadnym postupowanju dojednać njemóžetej. Tutu realitu statnej šefaj nětko akceptujetaj. W lěće 2017 běštaj Macron a tehdyša kanclerka Angela Merkel (CDU) prestižny projekt zahajiłoj. Na kromje jednanjow wo přistupje balkanskich statow k EU w Montenegru staj so Macron a Merz nětko dojednałoj, jón zakónčić.
Přičiny zakónčenja su mjez druhim rozdźělne předstawy Francoskeje a Němskeje nastupajo funkcionalitu lětadła kaž tež zwada w zwisku z nawodnistwom projekta mjez firmomaj Dassault a Airbus. Při wuwiću wodźenskeho systema rozdźělnych wojerskich nastrojow kaž lětadłow a trutow chcetej wobaj zhromadne dźěło pokročować.
Postup hišće njespokoja
Zwjazkowy minister za digitalizaciju prěnje lěto dźěła bilancował
Berlin (dpa/SN). Wjace hač 220 naprawow wobsahuje agenda za modernizowanje stata, kotruž su Zwjazk a kraje loni w decembrje na konferency ministerskich prezidentow wobzamknyli. Wažny kluč za jich zwoprawdźenje je digitalizacija zarjadnistwow a zarjadniskich procesow. Přez redukowanje rozprawniskich winowatosćow chcedźa stat a komuny na přikład 25 procentow wudawkow za běrokratiju zalutować. Mnohe naprawy pospěša proces planowanja a přizwolenja. To je zakład za spěšne zwoprawdźenje nuznych infrastrukturnych projektow.
