Infrastrukturne srědki schwalili
Drježdźany (SN). Sakski financny wuběrk je minjeny tydźeń plan za wužiwanje srědkow za krajnu infrastrukturu z tak mjenowaneho wosebiteho zamóženstwa Zwjazka schwalił. Dohromady je to 26 milionow eurow, kotrež rozdźěluje Sakski fonds mjez druhim za zachowanje sakskich statnych dróhow abo za ponowjenje a narunanje mostow.
Dohromady su 27 twarskich předewzaćow we wosom sakskich wokrjesach do plana zapřijeli. Tež do Budyskeho wokrjesa ćeče lětsa dźěl sakskich srědkow. Mjez druhim inwestuje swobodny stat do ponowjenja dróhow S 106 mjez Měrkowom a Kamjenej, S 94 w Halštrowskej gmejnje a S 108 mjez Łazom a Běłym Chołmcom.
Breitenbuch wopyta Pólsku
EU pohrjeba Mladića dla zamjerzana
AfD juska – CDU bjezradna
Prěni raz w swojich stawiznach ma AfD šansu na nawod krajneho knježerstwa
Magdeburg (dpa/SN). Po dotalnym wuličenju ma AfD 43,8 procentow hłosow a je ze swojim načolnym kandidatom Ulrichom Siegmundom wčerawše wólby krajneho sejma w Saksko-Anhaltskej z wulkim wotstawkom dobyła. Z tym je strona swój wuslědk poslednich krajnych wólbow wjace hač podwojiła. Porno tomu běše za saksko-anhaltsku CDU wčerawši dźeń dezastrozny. Wona docpě z načolnym kandidatom, amtěrowacym ministerskim prezidentom kraja CDU Sven Schulze jeničce 17,2 procentaj hłosow. Je to jeje najhubjeńši wuslědk w stawiznach zwjazkoweho kraja.
Wólbny krimi
Wčerawši wólbny wječor běše po mojim měnjenju tajki prawy njedźelniši krimi, hačrunjež tutón wólbow dla wčera docyła wusyłali njejsu .
Na jednym boku sćěhowach, kak su wolerki a wolerjo w Saksko-Anhaltskej hłosowali. Wšako steješe nad tutymi wólbami wulke prašenje, hač docpěje AfD prěni raz w krajnych wólbach absolutnu wjetšinu a hač změja w susodnym zwjazkowym kraju bórze ministerskeho prezidenta tuteje strony. A na tamnym boku zajimowaše mje runje tak jara, kak wuńdu wólby wjesnjanosty w Njebjelčicach. Wšako bě tam hižo do toho jasne, zo njebudźe to jenož wólba za a přećiwo jeničkemu kandidatej, ale zo ludźo druhe mjeno na lisćik napisaja.
Na kóncu běch dwójce přesłapjeny a jónu překwapjeny. Přesłapjeny wot wólbnych wuslědkow. A překwapjeny wo tym, kelko ludźi je so na wólbomaj wobdźěliło. A to běše tola hišće happy end wječora za mnje a za demokratiju w Němskej. Stefan Šmit
Fasadu dwórnišća wozdebili
Pospyty sabotaže tež w Sakskej
Dohromady 21 samotwarjenych rozbuchadłow su sakske wěstotne zarjady minjeny pjatk blisko přepinarnjow w Bjerwałdźe a Syjku (Graustein) pola Slepoho nadešli.
Drježdźany/Düsseldorf (dpa/SN/MiP). Po pospytach sabotaže na milinowu syć w Braniborskej a Porynsko-Westfalskej w běhu zašłeho tydźenja su minjeny pjatk tež w Sakskej samopaslene rozbuchadła blisko přepinarnjow nadešli. Na zakładźe informacijow wjacorych wěstotnych zarjadow kaž tež pokiwa kedźbliweho wobydlerja wotkrychu a znješkódnichu rozbuchadła blisko přepinarnje w Bjerwałdźe kaž tež blisko přepinarnje w Syjku. To zdźěli sakske ministerstwo za infrastrukturu a wuwiwanje kraja. Škody nastali njejsu. Znješkódnjenja dla su milinu nachwilnje wotpinyć dyrbjeli.
To a tamne (07.09.26)
Dwě- a třilětne dźěćo nadeńdźechu w swojich pjelškach a jenož z přikrywu na ramjenjomaj sobotu rano na dwórnišću w porynsko-pfalcowskim měsće Rülzheim. Mjeztym zo staršej spaštaj, twochnyštej z domu, dokelž chcyštaj sej w předawanskej pasaži dwórnišća nowe črije kupić. Zastojnicy policije móžachu wobeju bórze zaso čiłej a strowej staršimaj přepodać.
„Festiwalej kumštneje inteligency“ zadźěwać chce profesor za matematiku na grjekskej uniwersiće w Patrasu, třećim najwjetšim měsće w Grjekskej. Tohodla maja jemu studenća z nawočemi, kotřiž so na pruwowanjach wobdźěla, z wopismom lěkarja dopokazać, zo je woprawdźe trjebaja. Dźeń a husćišo wón dožiwja, zo wužiwaja studenća smartne KI-nawoči, z kotrymiž spytaja w pruwowanju wobšudźić. To wuzběhny profesor na online-platformje města.
Wuznamny komponist a hudźbny redaktor był
Žarujemy wo Ulricha Pogodu. Wón bě wuznamny komponist a rozhłosowy hudźbny redaktor. Kulowska cyrkwinska wosada je zdźěliła, zo je Ulrich Pogoda póndźelu, 31. awgusta, w starobje 72 lět zemrěł.
Ulrich Pogoda bě čłowjek, kotryž je wěcy zmóžnjał. Jako hudźbny redaktor dźěłaše wón wot lěta 1985 hač do 2019 pola serbskeho rozhłosa. Dlěje hač 30 lět je so wo to starał, zo delnjoserbski hudźbny swět rosće. Wón nawjaza zwiski do wšěch hudźbnych sferow, přeswědči druhich komponistow so zajimować za to serbske, zdoby sej producentow, tekstarjow, interpretow a stwori serbsku hudźbu. Zdobom spěchowaše lěto wob lěto młode talenty, z čimž hudźbny profil serbskeho radija wobnowi a wobohaći.
Kutschke nawjeduje biskopstwo
Generalny wikar Andreas Kutschke, kotryž je w Serbach tež jako křižer w Radworskim procesionje znaty, nachwilnje biskopstwo Drježdźany-Mišno nawjeduje. 52lětny bu wčera wot tachantskeho kapitla swjateho Pětra za diecezanskeho administratora wuzwoleny. W tutej funkciji předsteji Kutschke katolskej cyrkwi w Sakskej a wuchodnej Durinskej, kotrejž přisłuša něhdźe 124 700 wěriwych, doniž njebudźe nowy biskop pomjenowany. Andreas Kutschke bě hižo po wotchadźe biskopa Heinera Kocha w lěće 2015 Drježdźansko-Mišnjanske biskopstwo w času sediswakancy nawjedował.
Foto: archiw SN/Hanka Šěnec, biskopstwo Drježdźany-Mišno/Michael Baudisch
