Danska delegacija w Serbach
Budyšin (SN/MG). Druhi króć je skupina Danow z Němsko-Danskeje pomjezneje kónčiny tele dny z hosćom we Łužicy. Prěni raz su tu před 16 lětami pobyli, organizatorka wuprawy Marike Hoop w rozmołwje z našim wječornikom powěda. Wčera, póndźelu, su swoju ekskursiju po serbskej Łužicy w Budyšinje zahajili. W Serbskim domje witaše jich předsyda Domowiny Dawid Statnik. Referentka za kubłanje Katrin Suchec-Dźisławkowa referowaše po tym wo dźěle a skutkowanju třěšneho zwjazka. Čłonki a čłonojo towarstwow Sydslesvigsk Forening (towarstwo Danow w Němskej) a Grænseforeningen (danske kulturne towarstwo) přebywaja hišće hač do štwórtka we Łužicy. Na programje steji mjez druhim ekskursija do brunicowych jamow, wopyt Serbskeho muzeja a tradicionalna wječer w hosćencu Wjelbik. Tež do Drježdźan chcedźa sej dojěć, powěda Marike Hoop.
Nowy tarif wujednałoj
Erfurt/Drježdźany (dpa/SN). Dźěłarnistwo ver.di je z dźěłodawarjemi w drobnowikowanju w Durinskej, Sakskej a Saksko-Anhaltskej nowe tarifowe zrěčenje podpisało. Po tutym dóstanu dźesaćitysacy dźěławych branše wot 1. septembra tohole lěta dodatnje tři procenty wjace mzdy. Klětu w juniju ma so jich mzda wo dalšej procentaj zwyšić.
Zwjazkowa wobora z partnerom
Drježdźany (dpa/SN). Lětadłowe zawody Łobjo (EFW) su wčera w Drježdźanach partnerske zrěčenje ze Zwjazkowej woboru podpisali. Přichodne sydom lět ma předewzaće zamołwitosć za inspekcije a reparaturne dźěła na wojerskich transportnych helikopterach typa NH90. Zamołwići EFW pohódnoća zrěčenje jako wažny měznik na swojim Drježdźanskim stejišću.
Žadaja sej zniženje etata
W thailandskej stolicy Bangkoku je tuchwilu dohromady 700 000 ludźi ...
Hroža Berlinej ze skrótšenjemi
Za zhromadne dźěło dźakowni
Oratorij „Wulkotna woda“ zwiski mjez Čechami a Serbami skrućił
Budyšin/Liberec (SN/MiR). Předstajenje oratorija „Wulkotna woda“ z kompozitoriskeho pjera Měrćina Weclicha na teksty Róže Domašcyneje běše njedźelu w Liberecu wjeršk dźesaćlětneho jubileja Societas Amicuum Liberec (SAL). Towarstwo spěchuje mjezsobne zrozumjenje a zhromadne dźěło čěskeho a serbskeho naroda. Koncertny rum tamnišeje Techniskeje uniwersity skićeše 1. serbskej kulturnej brigadźe dobre wuměnjenja a z tym naby přewšo zrozumliwje zanjeseny tekst wosebitu hódnotu. Pod nawodom mjezynarodnje skutkowaceje dirigentki Judith Kubicec hudźachu Serbska komorna filharmonija, band „Johannes und Die Gerstengarbe“ a „Second Line Combo“. Městopředsydka SAL Jana Vančatová witaše wšitkich hosći, mjez kotrymiž běchu předsyda Domowiny Dawid Statnik, komponist Měrćin Weclich a fotograf Maćij Bulank. Wona spominaše na iniciatora towarstwa Milana Tureka. Ze stron Serbow staj z nim cyle na spočatku mandźelskaj Bjarnat a Monika Cyžec zwisk wudźeržowałoj.
Žedźa so za jednorym
W zašłosći sym hižo dworowej swjedźenjej w Čornym Chołmcu a w Ćisku dožiwił, kónc tydźenja tón w Brětni. Wšudźe sym so prašał, što ludźi tam poprawom wabi. To njejsu tola jenož plincy, pražene kołbaski, samopječeny tykanc abo čerstwje točene piwo abo słódny lód. Myslu sej skerje, zo je to wěsta žadosć za jednorosću, kotruž hewak w swojim wšědnym dnju nimamy. Wšudźe smy wobdaći wot kompjuterow, kumštneje inteligency, wšěch móžnych funkcijow šmóratka a smartneje domjaceje techniki. Ale widźeć, kak z wušiknymaj rukomaj kowarja małe wuměłstwo ze železa nastanje abo kak wojnar z wutrajnosću drjewjane hrabje twari je kaž něšto z dawnych časow, jako bě swět hišće někak w porjadku, kaž so nam dźensa zdawa. W tutym zmysle nazhonjeja wopytowarjo na tajkim dworowym swjedźenju wěstu lochkosć, kotraž so wot jich wšědneho dnja z jeho starosćemi a wužadanjemi jara rozeznawa.
Marian Wjeńka
Tesla zwyši mzdy
Dojednanje podpisałoj
To a tamne (29.09.26)
182 km/h přespěšne awto je francoska wobchadna policija kónc tydźenja w francoskich Alpach blisko gmejny Bonneville lepiła. Na dróze z dowolenym tempom 130 km/h bě šwicarski šofer ze swojim Porsche z 312 km/h po puću. Wobchadnemu rowdyjej su nablaku jězbnu dowolnosć sćazali. Nimo toho wočakuje jeho sudniske jednanje z móžnej konsekwencu třiměsačneje jatby a 3 750 eurami pjenježneje pokuty.
Najwjetša hdy natwarjena raketa z mjenom Starship je póndźelu rano wuspěšnje na swětnišćowym dwórnišću Elona Muskoweho předewzaća SpaceX w Texasu (USA) startowała. Něhdźe 275 kilometrow nad zemju poda so wona na postajenu wobběžnu čaru. Město planowanych 10 hodźinow pak běše wona jenož tři hodźiny na njej po puću. Potom padny na kalkulowanym městnje do Pacifika.
Pjenježna pokuta
Bonn (B/SN). Wosebite rjadowanje Němskeje biskopskeje konferency wot 1. oktobra 2026 cyrkwinskim sudnistwam dowoli, skućićelam tež pjenježnu pokutu napołožić směć. Cyrkwinske sudnistwa móža nimo duchownych we wuwzaćnych padach nimo toho lajkow w cyrkwinskej słužbje kaž tež mnichow a knježny w słužbje klóštrow k pjenježnej pokuće jako narunanje nastateje škody zasudźić.
Strach židow
Berlin (B/SN). Wólbne dobyće Lěwicy w Berlinje znjeměrnja cyrkwje antisemitiskich zjawow w swójskich rjadach dla. Prezident Centralneje rady židow w Němskej Josef Schuster wobkedźbuje „wospjetowanje wustupy Lěwicy přećiwo židam. Hač do dźensnišeho njejsym žane personalne abo politiske konsekwency zwěsćił. Hidu napřećo židam nastupajo njeje strona wjace wěryhódna, a jeje prilubjenja su jenož hołe słowa.“
Ženjeni mužojo budu měšnicy
