Halle (dpa/SN). Prezident Leibnitzoweho instituta za hospodarske slědźenje w Halle (IWF), Reint Gropp, wobžaruje negatiwne zhladowanje na wuwiće we wuchodźe Němskeje. „Sym měnjenja, zo wjedźe nas diskusija wo wuchodnej Němskej jako kónčinje z wjele njelěpšinami do wopačneho směra. Hdyž wobhladaće sej kónčiny, kotrež so w Němskej najspěšnišo wuwiwaja, potom su to regiony na wuchodźe Němskeje“, rjekny Gropp powěsćerni dpa. Jako přikład mjenuje wón wokolinu Berlina a Lipsk. „Tej wuwiwatej so spěšnišo hač na přikład Mnichow. Runočasnje ma su na wuchodźe tež kónčiny, kotrež w Němskej najspěšnišo zańdu.“

Gropp zastupuje měnjenje, zo wužiwa so wuraz „wuchodoněmsce“ zasadnje w negatiwnym zwisku. „Wuchodna Němska je jenož potom woprawdźe wuchodna Němska, hdyž dźe wo njelěpšiny. Lipsk a Berlin ze swojej wokolinu njejstej w tymle zmysle wjace wuchodoněmskej kónčinje. Hdyž so něšto derje wuwiwa, potom njeje to hižo wuchodoněmske. Cyle wažne je, tute zhladowanje skónčnje přewinyć.“