Wójna na Bliskim wuchodźe pólsku towaršnosć znjeměrnja

Waršawa. Nadpad USA a Israela na Iran minjenu sobotu je Polakow dospołnje překwapił. Nowiny rozprawjeja z wulkimi přinoškami wo morjenju statneho nawody Ajatolleh Ali Chameneija. Runočasnje jewja pak so tež dwěle a njewěstosće. W srjedźišću steji prašenje, kajki zmysł wójna ma a što na kóncu wunjese. Při tym mysla Polacy chcyjo nochcyjo na wójnu USA w Iraku lěta 2003. Tamniše poměry su hač do dźensnišeho njejasne a chaotiske.

Nowina Rzeczpospolita praša so w swojim srjedownym wudaću nawody Berlinskeje załožby za wědomosć a politiku Volkera Perthesa za jeho posudkom. Němski politologa je přeswědčeny, zo „bomby njedosahaja, změnić režim w Iranje“. Dźenik wozjewi w tym zwisku wobraz pohrjebnišća w měsće Minab na juhu Irana: Tam wuzběhuja runje rowy za 168 šulerkow, kotrež běchu přez ameriske bomby zahinyli.