Wjace hač 30 popjelnicow pokradnyli su njeznaći z pohrjebnišća na kromje malaysiskeje stolicy Kuala Lumpur. Popjelnicy stejachu w kolumbariju, w rownišću nad zemju. Skućićeljo žadaja sej wot ­přiwuznych za jich wróćenje pjenjezy. Kelko sej žadaja, dotal znate njeje. Policija z połnej paru na tym dźěła, skućićelow wuslědźić.

Hotowy wjedrowy chaos knježi tuchwilu w USA. Na zapadnym pobrjohu knježi njezwučena horcota, na kupje Hawaii bědźa so ze zapławjenjemi, na sewjeru je wjele sněha napadało a na wuchodźe bliži so wulki wichor. Wjace hač 200 milionow wobydlerjow je potrjechenych. Dotal su wjace hač 4 500 lětow wotprajić dyrbjeli. W zwjazkowych statach Michigan, Wisconsin a Minnesota zachadźa zymski ­wichor. Na zapadźe kraja zastaruja ludźi při horcoće 30 stopnjow z pitnej wodu.

Industrijna a wikowanska komora (IHK) je zawod TDDK zašły štwórtk z wosebitym mytom wuznamjeniła. Wo nadrobnosćach informuje społnomócnjena zawoda za serbske naležnosće Caroline Měršowa:

Twarc kompresorow TDDK w Nadróznej Hrabowce bu 12. měrca 2026 wot IHK Drježdźany jako najlěpši wukubłanski ­zawod 2025/26 w Budyskim wokrjesu wu­znamjenjeny. W małej swjatočnosći přija jednaćel Atsuyuki Morishita dopołdnja w mjenje wukubłarkow a wukubłarjow počesćenje wiceprezidentki IHK dr. Katrin Burk. Před zastupjerkami a zastu­pjerjemi wučomnikow, wukubłancow a před zamołwitymi wotrjadow dźakowaše so prezident TDDK Morishita wšitkim wobdźělenym za jich prócu.

Maria Laach (B/SN). Bywša němska kanclerka Angela Merkel wuzběhny na swojim póstnym prědowanju w klóštrje Maria Laach před 500 připosłucharjemi: „Nadawk politiki je, trěbne rozsudy za wěstotu wobydlerjow tworić, so wo socialnu sprawnosć a zachowanje žiwjenskeje eksistency starać. Demokratiske zhromadne žiwjenje jenož funguje, hdyž kóždy staćan k zhromadźenstwu přinošuje.“ Sebjekritisce wona přizna, zo je přećiwo změnje klimy wjele zdokonjała, ale přiwšěm hišće přemało.

Płaćić za wopyt cyrkwje

Köln (B/SN). Wot druheje połojcy lěta maja wopytowarjo Kölnskeho doma zastup płaćić, wozjewi propst Guido Assmann. Štóž pak chce Božu słužbu wopytać abo wosobinsce so modlić, smě zadarmo nutř. Wot šěsć milionow wopytowarjow su wjetšina turisća. Rjedźenje cyrkwje płaćeše 187 000 eurow w lěće 2024. Ju wudźeržować płaći kóždy dźeń 23 000 eurow, něhdźe dwě třećinje z toho za personal. Zastup do Sagrady Família w Barcelonje płaći 26 eurow a do doma swjateho Šćěpana we Wienje 29 eurow.

Ekumeniske putnikowanje

Berlin (dpa/SN). Ministerski prezident Porynsko-Pfalcy Alexander Schweitzer (SPD) žada sej jasne stejišćo CDU/CSU k dorěčam mjez frakciju Europskeje ludoweje strony EVP a AfD w Europskim parlamenće. Předsyda EVP Manfred Weber bě do wólbow potwjerdźił, zo njeje zhromadneho dźěła z prawicarsko-radikalnej stronu, rjekny Schweitzer powěsćerni dpa. Rešerša powěsćernje dpa pak je wunjesła, zo ma EVP, kotrejž tež CDU a CSU přisłušatej, dosć wuske styki k AfD.

EU wuradźuje wo wójnje

Brüssel (dpa/SN). Wonkowni ministrojo čłonskich krajow EU su so dźensa prěni króć po zahajenju wójny přećiwo Iranej wosobinsce w Brüsselu zešli. Mjez druhim su wo tym rěčeli, kak móhła EU k wotputanju konflikta přinošować. Starosćiwje wobkedźbuja wosebje wuskutki wójny na płaćizny energije kaž tež móžne nowe prudy ćěkancow. Dalša tema je połoženje w Ukrainje a wosebje blokada Madźarskeje přećiwo kreditej wjacorych miliardow eurow za Ukrainu.

Nowa koalicija w Podstupimje