Lubin (SN/MG). Wokrjes Dubja-Błóta, kiž je jako jenički wokrjes spěchowanski čłon Domowiny, je wóndano swoju rozprawu wo Serbach w lětomaj 2024 a 2025 wozjewił. W nim naliči społnomócnjena za serbske naležnosće Sabrina Kuschy prócowanja a nałožene financielne srědki, kiž je wokrjes na dobro Serbow nałožował. Dohromady słuša 24 gmejnow wokrjesa do serbskeho sydlenskeho ruma. W rozprawje rěka: „Lěće 2024 a 2025 běštej we wokrjesu Dubja-Błóta faza dalšeho pozběhowanja za serbski lud.“
Wjacore projekty tole podkładuja. Tak běchu na přikład 159 busowych zastanišćow po cyłym sydlenskim rumje dwurěčnje popisać dali. Tež wosebite spěchowanje, kiž wokrjes na dobro Serbow zarjaduje, běchu w zašłymaj lětomaj mnohim projektam a iniciatiwam k dispoziciji stajili. Dohromady 77 projektow běchu z cyłkownym wolumenom něhdźe 80 000 eurow podpěrowali. Wokrjes Dubja-Błóta je dotal jenički w Braniborskej a Sakskej, kiž ma swójski instrument za spěchowanje projektow.
