Wohenje w Francoskej a Španiskej a taifun w Chinje ludźi wuhnali

Hongkong/Madrid/Paris (SN/ČTK) Wjedro je kónc tydźenja swoju wulku móc pokazało: Wjace hač 300 000 ludźi je wulkich wohenjow dla swoje statoki w Francoskej we wokolinje města Bordeaux a runje tak w Španiskej njedaloko stolicy Madrid wopušćić dyrbjało. Samsny dóńt dožiwi runočasnje nimale 750 000 ludźi na juhu Chiny w prowincy Guangdong – tam pak taifuna, dešća a wulkeje wody dla.

W Chinje bě wětr přewšo sylny, jeho maksimalna spěšnosć bě sobotu wokoło 110 kilometrow za hodźinu. W naspomnjenej prowincy njejsu cyłu njedźelu ćahi jězdźili, na lětanišću w Hongkongu wjac hač 350 lětow wupadny. Taifuny so w tutej kónčinje, wokoło Japanskeje a kupy Tchaj-wan, dźeń a husćišo jewja. Tamniše staty nětko ze starosćemi wočakuja, što so na kóncu lěta stanje, hdy dožiwi planet prěnje wuskutki lětušeho hor­ceho super-El Niña, kotryž so tuchwilu w Ćichim oceanje twori a móže w zymje hišće wjetše škody zawinić, hač dotalna julijska horcota z wjac hač 50 stopjenjemi celsiusa. Prognozy wšelkich wjedrowych modelow su katastrofalne.

Hdyž do dźiwadła, opery abo baleta du, potom je to, štož tam widźu, wupłód kreatiwity woprawdźitych čłowjekow. Hdyž so mi něšto njelubi, potom wěm, zo je ně­hdźe wosoby, kotrejž móhł swoju kritiku wosobinsce posrědkować. Nětko pak su zamołwići na Wagnerowych swjedźenskich hrach w Bayreuće tole změnili. Štož so na jewišću předstaja, njeje hižo ryzy čłowječi produkt. Tež mašina smě so naraz kreatiwnje wuspytać. Při wšej sympatiji za kumštnu inteligencu a jeje lěpšiny pak je to kročel do wopačneho směra. Haj, KI móže nam stupidne a proste dźěło wotewzać, ale wona njeměła ženje kreatiwne nadawki spjelnjeć. Wšojedne hač su to plakaty, mólby, wideja abo projekcije na jewišću w Bayreuće. To poslednje, štož čłowjekej jako myslacemu a kreatiwnemu stworjenju zwostawa, je kmanosć, jónkrótne wěcy wuwiwać. Derje, zo je publikum pospyt wužiwanja kumštneje inteligency kritizował.

Maximilian Gruber

67, Crashout, Digga, Du bist gut genug, Gute Käse, Macker, Peak, Ragebait, Schere a Süper su lětuši kandidaća za „młodźinske słowo lěta“. Wot dźensnišeho hač do 20. awgusta smědźa młodo­stni mjez jědnaće a 20 lětami na webstronje nakładnistwa Langenscheidt wuzwolić, kotry z tychle namjetow je jim najlubši. Na zakładźe wothłosowanja wuzwoli nakładnistwo potom jónu wob lěto najpopularnišu flosklu.

Před mjedwjedźom, kotryž pječa po lěsach brodźi, běchu zarjady ludźi w Allgäuju warnowali. Nětko su eksperća zawostanki pozdatneho bara přepytowali a zwěsćili, zo bě to we woprawdźitosći šwinc, kiž bě swoje slědy zawostajił. Bayerski krajny zarjad za wobswět je swoje warnowanje tuž zaso cofnył. Sranty šwinca běchu 21. julija našli a do Senckenbergoweho instituta w Hessenskej pósłali.

Hannover/Teheran (B/SN). Něhdyši ewa­ngelscy biskopja Heinrich Bedford-Strohm, Wolfgang Huber a Margot Käßmann podpěruja mjezynarodne stejišćo třiceći zastupjerjow cyrkwjow a rabinerow přećiwo aktualnej žołmje politiskich wotprawjenjow w Iranje a za wjace škita nabožnych mjeńšin. Iniciěrował je stejišćo emeritowany arcybiskop z Canterburyja Rowan Williams.

Wopačnosćam znapřećiwić

Augsburg (B/SN). Augsburgski biskop Bertram Meier doporuča, powěsće na swěće dale slědować: „Njeje ženje hišće derje było, hłowu do pěska tyknyć, nawopak, jako křesćenjo měli wšo pruwować a wotwisnje wot towaršnostneje zamołwitosće njebojaznje wopačnosćam napřećo stupić.“ Křesćenjo njeměli dopušćić, zo so wšo digitalnje rjaduje, ale měli dale rozmołwu pěstować. „Naš přichod wotwisuje wot kóždeho jednotliwca.“

Prawniske prašenja