Běłohród (dpa/SN). We wčerawšich dočasnych wólbach serbiskeho parlamenta je njewočakowano nowa opoziciska studentska lisćina jasnje dobyła. Wjelelětny serbiski prezident Aleksandar Vučić je swoju poražku w narěči zjawnje přiznał. Wot lěta 2012 bě wón serbisku politiku w měnjacych so funkcijach postajował a so ze swojim Ruskej a Chinje přichilenym politiskim kursom lěto a dale wot Europy zdalował.

„Krótko po narěči Vučića wozjewi skupina za wólbne slědźenje CRTA prěnje nachwilne wuslědki. Po tutych je wjetšina Južnych Serbow – 52 procentow – opozi­cisku studentsku lisćinu woliło. Serbiska doprědkarska strona (SNS) Vučića zdoby sej 39 procentow hłosow. Ani jeničkej dalšej­ stronje njeje so poradźiło, do serbiskeho parlamenta zaćahnyć. Za wobdźělenje w parlamenće trjebaja strony znajmjeńša tři procenty wšěch hłosow, strony etniskich mjeńšin pak jedyn procent.

Po wozjewjenju wuslědkow ludźo na dróhach a naměstach po cyłym kraju juskachu a wyskachu.

Prawiznicy a inženjerej Němske myto za wobswět spožčili

Aachen (dpa/SN). Z Němskim mytom za wobswět wuznamjenja Němska zwjazkowa załožba za wobswět (DBU) kóžde lěto ludźi, kotřiž so z wulkim angažementom za škit a zdźerženje wobswěta zasadźuja. Z mytowanskimi pjenjezami we wob­jimje 500 000 eurow, je wone najwyše dotěrowane wobswětowe myto w Europje. Inženjer Klaus Vossenkaul z Aachena a Hamburgska prawiznica Roda Verheyen sej sumu lětsa dźělitaj. Na swjatočnym zarjadowanju w Aachenje je jimaj zwjazkowy prezident Frank-Walter Steinmeier wuznamjenjenje přepodał. Vossenkaula mytowachu za jeho inowatiwne dalewuwiće membranowych filtrow za rjedźenje wopłóčkow we wodočisćernjach, Verheyen wuznamjenichu za zwoprawdźenje skutkownych směrnicow we wobswětowym a klimowym prawje.

We wčerawšich wólbach je so wjetšina wobydlerjow republiki Serbiskeje za politisku změnu mocy wuprajiła. Njespokojnosć je jasnje čujomna – hladajo na hospodarske połoženje kaž tež powšitkownych žiwjenskich wuměnjenjow dla. Vučić je drje móc wotedał, dokelž bě diferenca hłosow přewulka. Studentske hibanje njeje dotal konkretny program předpołožiło, kak chce hospodarski rozmach docpěć a kak ma so serbiska wonkowna politika přichodnje wuwiwać. Bój přećiwo korupciji słuša k centralnym naležnosćam ludnosće a steji hižo wot powalenja Slobo­dana Miloševića na politiskim dnjowym porjedźe. Přiwšěm je so w tym wobłuku jenož mało docpěło. Vučić je w Serbiskej dale přitomny. Z 39 procentami hłosow wostanje wón wuznamna politiska móc, kotraž budźe na kóždy zmylk noweho knježerstwa čakać. Njebudu-li so nuzne prašenja spěšnje rozrisać, kaž to ludnosć wočakuje, móhł nawrót Vučića w krótkim času realistiski być. Dyrbimy sćerpliwi być a přichodne měsacy wočaknyć. Bojan Benić

Tuchwilu su płaćizny mloka tak niske kaž to minjene pjeć lět hižo njeběchu. Za mlokowych burow pak kóšty nadal stupaja. Kak so to na kupcow wuskutkuje?

Drježdźany (dpa/SN). Němski zwjazk mlokoweje industrije (MIV) z toho wuchadźa, zo so produkty z mloka klětu podróša. Na to skedźbni předsyda MIV Detlef Latka na dwudnjowskim lětnym schadźowanju zwjazka minjeny kónc tydźenja w Drježdźanach. Hač woprawdźe k zwyšenju płaćiznow dóńdźe, pak wotwisuje wot nowych zrěčenjow mlokowych burow z mlokarnjemi a rjećazami drobnowikowarjow.

Na aktualne lěto zhladuje zwjazk z měšanymi začućemi. Detlef Latka znazorni, zo bě lěto 2025 za mlokowych burow hladajo na płaćizny mloka njewšědnje pozitiwne: Přerězna płaćizna 52 centow na liter mloka běše druha najwyša syła. Přiwšěm pak zwěsća lětsa zaso rekordny minus wuwića mlokowych płaćiznow w dobje minjenych pjeć lět. We wěstych regionach su mlokowi burja liter­ mloka jenož hišće za 30 centow předawali.­