Podstupim (dpa/SN). Laura Strohschneider swoje zastojnstwo jako předsydka Młodeje unije (JU) w Braniborskej złoži a swoju stronu CDU wopušći. Přičina toho je, zo kritizuje kurs zwjazkoweho kanclera a předsydy CDU Friedricha Merza. W zdźělence čłonkam a čłonam JU, z kotrejež powěsćernja dpa cituje, podkła­duje Strohschneider swój rozsud z kritiku na wodźacych wosobach w stronje kaž tež z tym, zo wona z přerjadowanjom zwjazkoweho knježerstwa přezjedna njeje. Laura Strohschneider so za zwjazkowu politiku hańbuje. Nimo toho kritizuje personalnu rochadu Merza: „Změna personala je za mnje symptom krizy wěryhódnosće CDU.“ Wona bě so změny kursa nadźijała. „Tutu šansu Friedrich Merz po mojim měnjenju wužił njeje. Nawopak, politisku municiju, kotraž wot­stu­pjenje Jensa Spahna bě, je wón přećiwo stronje wužiwał.“ Generalny sekretar CDU w Braniborskej Julian Brüning rozsud Strohschneider jara wobžaruje a žada sej znowa wjace tempa při reformach. Wón apelowaše na zwjazkowy kabinet, zo měli so nětko do spěcha měć.

NATO chce wjace bombow USA w Europje zaměstnić

Brüssel (dpa/SN). Dokelž z Ruskeje dźeń a wjetši strach hrozy, chce NATO swoje nuklearne kapacity rozšěrić. Powěsćernja dpa je při rešeršach wuslědźiła, zo drje je jedna z móžnych opcijow, zo dalše atomowe brónje z USA w Europje zaměstnja. Eksperća měnja, zo su USA snano hižo bomby typa B61-12 do Wulkeje Britaniskeje na lětarsku bazu Lakenheath dowjezli. Jeli so situacija dale přiwótřa, móhli bomby tež w Pólskej, Finskej a Litawskej stacionować. Tuchwilu planuja z atomarnymi brónjemi, kotrež njejsu strategiske. Tute zasadźuja na přikład za bombardowanje regimentow njepřećela, lětanišćow, přistawow, komandowych centralow a druheje wojerskeje infrastruktury. Hinak hač strategiske atomowe brónje nimaja tele bomby hižo tajku wulku móc. Njestrategiske brónje transportuja z lětadłami abo raketami, kotrež hižo tak daloko lećeć njemóža.

Na swojorazny spektakl so ludźo lěto wob lěto we Wótšowcu (Bischdorf) blisko Lubnjowa zetkawaja: Z kolesami jědu po wuskich deskach přez wjesny hat. Jězdnja je při tym jenož 15 centimetrow šěroka, rozprawja organizator Fritz Heinze. Na wšěch 35 entuziastow so kóžde lěto wubědźuje. Najwjace z nich padnje znajmjeńša jónu ze swojim kołom do wody. Dotal běchu so stajnje jenož mužojo na tym wobdźělili. Lětsa pak je prěni raz tež žona mjez „sportowcami“. Na wšěch 1 500 hosći wočakuja we wjesce z něhdźe 200 wobydlerjemi.

Na wšěch 450 000 ludźi bě wustajeńcu sławneje japanskeje wuměłče Yayoi Kusama w Kölnskim muzeju Ludwig wopytało. Tole je w stawiznach doma najwuspěšniša wustajeńca wšěch časow. Hač do njedźele pisane twórby molerki hišće pokazuja.

Interview ze Serbskim superintendentom n. w. a bywšim předsydu Maćicy Serbskeje Janom Malinkom

Składnostnje 70. narodnin Jana Malinka dźensa je so Marcel Brauman ze Serbskim superintendentom na wuměnku wo jeho widźe na wšelake načasne bytostne prašenja serbskeho ludu a towaršnosće w Němskej rozmołwjał. Runja mnohim ludźom zbliska a zdaloka gratuluje tež redakcija našeho wječornika jubilarej ke kulojtym narodninam a přeje jemu do přichoda bohate Bože žohnowanje, krutu strowotu a dale spomóžne skutki we winicy Knjezowej. Zdobom so dźakujemy jemu tež w mjenje čitarstwa za wjelelětne dobre zhromadne dźěło.

Sće so do wulkeje swójby narodźił a sam nan wulkeje swójby. W zjawnosći Was skerje jako intelektualneho duchowneho widźimy. Kotru rólu wulkoswójba we Wašim žiwjenju hraje?