W Słowjenskej maja wosebity wólbny system za narodne mjeńšiny

Felice Zizu bu třeći raz jako zastupjer italskeje mjeńšiny do słowjenskeho parlamenta woleny. Italski dźenik „La Voce del Popolo“, kotryž w měsće Fiume/Rijeka wuchadźa, piše, zo bě sej z města Pola/Pula pochadźacy lěkar 42 procentow hłosow zdobył. 66,5 procentow 2865 wólbokmanych italskeje mjeńšiny bě so na wólbach wobdźěliło.

Słowjenska připóznawa dwě narodnej mjeńšinje: italsku a madźarsku. Woběmaj garantuja jedne sydło w słowjenskim parlamenće. Wólbokmani přisłušnicy mjeńšinow wola při wólbach par­lamenta tuž dwójce: Jónu wobdźěla so na normalnych wólbach po stronach, z druhim wólbnym lisćikom wothłosuja, štó jich mjeńšinu w parlamenće zastu­puje.

Madźarsku zhromadnosć budźe znowa Ferenc Horváth zastupować. Wón je sej 72,7 procentow hłosow zdobył a doby z tym před swojim napřećiwnym kandidatom Tomijom Horvatom. Tole zdźěli dźenik „Primorski Dnevnik“, kotryž w Triesće wuchadźa.