Tel Aviv/Beirut (dpa/SN). Israelske wójsko je po swójskich informacijach při swojim zasadźenju na juhu Libanona dźesatki teroristow moriło. Jich su wuslědźili, jako w swojich schowach nad­pady na israelskich wojakow přihoto­wachu. Jedyn chcyše runje israelski tank z raketu nadpadnyć. Po zahajenju wójny USA a Israela přećiwo Iranej je israelske wójsko znowa do južnych kónčin Libanona zaćahnyło, dokelž libanonska Hisbollah wottam Israel nadběhuje. Mjeztym su tam třo israelscy wojacy padnyli. ­Hisbollah twjerdźi, zo je wo wjele wjace israelskich wojakow moriła a dźesatki ­israelskich tankow z pomocu trutow zničiła. Wotpowědne wideja w interneće maja tole dopokazać.

Waršawa (dpa/SN). W Pólskej płaći za bencin a za diesel wot dźensnišeho wot knježerstwa postajena hornja mjeza płaćizny. Nimo toho su nadhódnotowy dawk a dawk na energiju znižili, zo bychu pře­trjebarjow podpěrali. Po infor­macijach energijoweho ministerstwa njesmě liter normalneho bencina wjace płaćić hač 6,16 złotych (1,44 eurow). Liter superbencina płaći 6,76 złotych (1,58 eurow) a diesel 7,60 (1,77 eurow).

Srjedźo-lěwicarske knježerstwo ministerskeho prezidenta Donalda Tuska reaguje z naprawami na sćěhi wójny w Iranje. Nadhódnotowy dawk zniža wot dotal 23 na jenož hišće wosom procentow. To wotpowěduje wot Europskeje unije wukazanemu minimalnemu dawkej sydom centow na liter bencina a diesela. Nowe rjadowanja płaća najprjedy raz hač do kónca junija. Tak dołho postaja mi­nister za energiju wšědnje přerěznu płaćiznu bencina a diesela za wulkowikowarjow, kiž tankownje zastaruja. Ranjenja wukaza móža z pokutu hač do 230 000 eurow chłostać.

USA chcedźa Hormuski přeliw „tak abo znak“ za łódźe wotewrěć

Teheran (dpa/SN). Tež měsac po zahajenju wójny USA a Israela přećiwo Iranej je kraj dale kmany so wobarać a susodne kraje Persiskeho zaliwa z raketami a trutami nadběhować. Sawdi-Arabska, Kuwait, Bahrain a Zjednoćene arabske emiraty rozprawjachu minjenu nóc wo nowych nadpadach. W Persiskim zaliwje su truty hoberski Kuwaitski wolijowy tanker trjechili. Na łódźi wudyri woheń, kotryž zamóchu hakle po wjacorych hodźinach zhašeć. Runočasnje su lětadła USA skład brónjow a municije w Iranje bombardowali a pječa dospołnje zničili.

Wonkowny minister USA Marco Rubio je wo tym přeswědčeny, zo budźe blokowany Hormuski přeliw „tak abo znak“ bórze zaso za łódźe wotewrjeny. Pak budźe Iran zwólniwy, „dodźeržeć mjezynarodne prawo“ a wuski mórski zwisk dlěje njeblokować, rjekny Rubio sćelakej Al Jazeera, „abo koalicija narodow wšeho swěta z wobdźělenjom USA so wo to postara, zo je přeliw zaso wotewrjeny“. Rubio pak so dokładnišo k tomu njewupraji, što z wuprajenjom „so wo to postara“ měni.

Njemóžu sej pomhać, ale někak dopominaja mjez reakcije USA w zwisku z wójnu přećiwo Iranej na film „Der Untergang“ wo poslednich dnjach Druheje swětoweje wójny. W bunkru w Berlinje dyrbja bjezradni zwěsćić, zo nimaja přećiwo njepřećelej ničo wjace w rukomaj. USA chcedźa diplomatiski ćišć na Teheran zwyšić! Nó wulkotnje! Tam so tajkim planam směja. Jeli so to njeporadźi, chcedźa mjezynarodnu koaliciju zestajeć, kotraž Hormuski přeliw łódźam wotewrje. To pak tež hižo mějachmy. Nichtó nochce so wobdźělić. A nětko tež hišće inwazija wójska USA w Iranje. Kelko wojakow chce Trump při tym woprować? 50 000, 100 000 abo hišće wjace? Z kóždym dnjom wójny je wočiwidniše: USA su sej do hoberskich paslow zalězli, z kotrychž njeje žanoho wupuća. Snano so we Washingtonje tola hišće něchtó namaka, kiž Trumpa wotsadźi a tam dowjeze, hdźež wón słuša: do hladarnje za dementnych – mojedla ze złotymi lěsycami. Marko Wjeńka