To a tamne (22.10.26)
Alice Schwarzer zakónči wudawanje swojeho feministiskeho magacina „Emma“. Decemberske wudaće budźe poslednje, 83lětna wčera w medijach zdźěli. Wona bě časopis w lěće 1977 załožiła, dokelž mějachu žony w tehdyšich medijach lědma hłosa, wona praji. Najebać lěto a woteběrace ličby abonentow njeje so z hospodarskich přičin za kónc rozsudźiła. „Dźemy, dokelž měnimy: To dosaha“, Schwarzer wuzběhny.
Francoski honjak typa Mirage je wčera we wuchodnej Francoskej pola města Nancy při treningowym lěće znjezbožił. Jednoho pilota wobsadki su wuchowanske słužby mortweho našli, za tamnym přeco hišće pytaja, zdźěli francoska zakitowanska ministerka Catherine Vautrin. Přičiny njezboža dotal znate njejsu. Swědkojo rozprawjachu, zo běchu eksploziju słyšeli.
Wažny krokza slědźenišćo
Budyšin/Drježdźany (SN). Budyske měšćanske zarjadnistwo je wčera w nowinskej zdźělence wo tym informowało, zo je sakske knježerstwo na swojim poslednim kabinetnym posedźenju čłonstwu swobodneho stata w towarstwje Němski slědźerski centrum twar z. t. (DFZ twar) přihłosowało, w kotrymž budźetej tež Weimarska uniwersita Bauhaus a Drježdźanska Techniska uniwersita z čłonom. Załožensku zhromadźiznu towarstwa chcedźa čłonojo hišće lětsa přewjesć.
Po informacijach Sakskeho statneho ministerstwa za infrastrukturu a wuwiwanje kraja ma so runočasnje z aktualnym procesom załoženja towarstwa w Budyšinje zakładna slědźenska infrastruktura za DFZ twar zarjadować. Za to přewostaja zamołwići dohromady 100 milionow eurow z fondsa za wuwiwanje strukturow w brunicowych kónčinach. Tak mjenowany startup-inkubator je jedyn z prěnich krokow, kotryž chcedźa w Budyšinje zwoprawdźić.
Budyski wyši měšćanosta Karsten Vogt (CDU) zwurazni we wčerawšej zdźělence swoje wulke wjeselo nad wažnym rozsudom sakskeho knježerstwa.
Fatalny zmylk ministerstwa
Berlin (dpa/SN). Mylnje je zwjazkowe financne ministerstwo wot spočatka lěta 2027 planowane zwyšenje dawka na tobak w zwjazkowym zakonskim łopjenu na dźensniši dźeń datěrowało. Na naprašowanje powěsćernje dpa zamołwići zdźělichu, zo su dźensa porjedźenku wozjewili a producentow tobakowych produktow wo zmylku informowali.
NATO wo podpěru prosyli
Sofija (SN). Po wjacorych nadpadach trutow na łódźe w Čornym morju je bołharske knježerstwo wojerske zwjazkarstwo NATO wo pomoc prosyło. Wo tym sćelak Deutschlandfunk dźensa rozprawja. Rěčnica NATO připowědźi, zo chcedźa srědki za dohladowanje, wuskušowanje a forensiske analyzy do regiona pósłać. W oktobrje běchu prawdźepodobnje ruske truty štyri wikowanske łódźe před bołharskim pobrjohom nadpadnyli. Dwě łódźi so podnurištej. Za wjacorymi wosobami hišće pytaja.
Sudnistwo wusudy zběhnyło
Mongolski prezident Ukhnaagiin Khurelsukh (nalěwo) je na swojim ...
Witkoff w Oslu a Pětrohrodźe
Oslo/Pětrohród (dpa/SN). Posrědnik USA, wosebity pósłanc Steve Witkoff, je so wčera w Oslu z ukrainskim prezidentom Wolodymyrom Zelenskym a dalšimi načolnymi politikarjemi zetkał. Při tym wospjet wo móžnym měrje w Ukrainje jednachu. Dźensa poda so Witkoff dale do Ruskeje, zo by tam wo samsnej temje jednał. W Pětrohrodźe Witkoff zastupjerjow ruskeho knježerstwa zetka, ministerski prezident Norwegskeje Jonas Gahr Støre wčera wobkrući.
Na próstwu Ukrainy bě Norwegska rozmołwy zhromadnje z Finskej organizowała. W Pětrohrodźe chce Witkoff Rusam namjet předstajić, „kotryž su europscy a ameriscy kolegojo wudźěłali“. Ukraina je w Oslu nowe ideje a koncepty předstajiła, kotrež su w detailu wobrěčeli. Knježerstwo USA so nětko nadźija, zo namjety tež w Ruskej přiwozmu. Potom by puć najprjedy za trilateralne rozmołwy a pozdźišo za multilateralne rozmołwy swobodny był. Tole rjekny zastojnik knježerstwa nowinskej agenturje Axios.
„Němska tu zaso je“
Merz a Klingbeil z wuslědkami wjerška inwestorow spokojom
Berlin (dpa/SN). W hospodarsce špatnych časach w kraju wo inwestorow wabić – to běše ideja zwjazkoweho knježerstwa, kotruž je z wjerškom inwestorow zwoprawdźiło.
Něhdźe 200 nawodow předewzaćow z tu- a wukraja bě na dwaj dnjej do Berlina prošenych, zo bychu mjez druhim wot zwjazkoweho kanclera Friedricha Merza (CDU) a zwjazkoweho financneho ministra a wicekanclera Larsa Klingbeila (SPD) zhonili, čehodla je za nich spomóžne, swój kapital w Němskej inwestować. Naposledk mjenowany zwurazni z miknjenčkom samo jara direktnje, wo čo jemu dźe: „Chcu waše pjenjezy.“
Za swobodu wobchodow
Pólska: Wolóža wotehnaće
To a tamne (21.10.26)
Technologiski koncern Google dyrbi třidimensionalne wobrazy priwatnych ležownosćow w swojich nawigaciskich posłužbach Google Earth a Google Maps wotstronić, jeli wobsydnicy z wozjewjenjom přezjedni njejsu. Po skóržbje nana a wobsydnika swójbneho domu blisko Frankfurta nad Mohanom su sudnicy ciwilneje komory tamnišeho krajneho sudnistwa rozsudźili, zo zranja zwobraznjenja powšitkowne wosobinske prawo.
Roboter z mjenom CA-1 dźěła jako nowy kuchar w kantinje kaserny Zwjazkoweje wobory w schleswigsko-holsteinskim Alt-Duvenstedće. Wulka lěpšina za dohromady 900 wojakow je, zo móža sej swój wobjed kóždy čas skazać. W chłódźenej, sydom kwadratnych metrow wulkej rumnosći zwari nastroj Mnichowskeje firmy Circus Group w běhu někotrych mjeńšin čerstwu jědź.
Na zymsku słužbu přihotowani
Budyšin (SN). Hač do kónca oktobra maja přihoty za zymsku słužbu w lětušej sezonje dokónčene być. Tole wuchadźa z informacijow Budyskeho krajnoradneho zarjada. Dohromady 100 sobudźěłaćerjow je w zarjedźe za zymsku słužbu zasadźenych. Woni dźěłaja w cyłkownje pjeć nadróžnych mištrownjach, a to w Budyšinje, Biskopicach, Wojerecach, Kinsporku a Kamjencu.
Tute nadróžne mištrownje maja w zymje cyłkownje něhdźe 1 650 kilometrow dróhow wot sněha a loda wuswobodźić. To je 238 km zwjazkowych dróhow, 610 km statnych dróhow a 796 km wokrjesnych dróhow. Za zymsku słužbu steji sobudźěłaćerjam dohromady 25 rumowanskich a sypanskich jězdźidłow k dispoziciji. Po potrjebje maja móžnosć, sej přidatnje 15 jězdźidłow cuzych firmow wupožčić. W składach wokrjesa leži něhdźe 6 300 tonow sypanskeje sele a hdyž je potrjeba, tež hišće dalšich 1 500 tonow jako rezerwa.
