Thorsten Frei naslěduje Spahna
Berlin (dpa/SN). Dotalny šef kanclerskeho zarjada Thorsten Frei (CDU) ma so z naslědnikom wotstupjeneho Jensa Spahna (CDU) na čole frakcije unije zwjazkoweho sejma stać. Wo tym staj so zwjazkowy kancler Friedrich Merz (CDU) a šef CSU Markus Söder dorozumiłoj, Němska powěsćernja dpa wčera z kruhow unije zhoni. Kaž dpa dale pisa, bě Frei wot wšeho spočatka kandidat, kotrehož je sej kancler na městnje w zwjazkowym sejmje přał.
Do toho běchu gremije stronow CDU a CSU wo naslědnistwje Jensa Spahna rěčeli. Merz bě po wotstupje Spahna připowědźił, zo chce so spěšnje z CSU wothłosować a kandidata namjetować. Zo pak je mjeno nětko hižo tak zahe znate, zwisuje tež z přiběracym ćišćom spekulacijow w medijach kaž tež w frakciji unije. Oficialnje móže Thorsten Frei zastojnstwo hakle přewzać, hdyž frakcija CDU/CSU w zwjazkowym sejmje tomu přihłosuje. Přichodnu srjedu ma so gremij w Berlinje na wosebite posedźenje zeńć. Mjeztym ma so naslědnistwo Freija w kanclerskim zarjedźe rjadować.
Reichsbürgerow wobskoržili
Skupina a jeje samozarjadnistwo stej w Němskej zakazanej
Karlsruhe (dpa/SN). Zwjazkowe statne rěčnistwo je skóržbu přećiwo štyrjom pozdatnym naštykarjam skupiny reichsbürgerow „Kralestwo Němska“ (KRD) zapodało. Rěčnistwo jim wumjetuje, zo nawjeduja kriminelne zjednoćenstwo. Załožerja Petera Fitzeka nimo toho wobwinuja, zo je mjez druhim njedowolene zawěsćernje wobhospodarjał. Senat statneho škita Wyšeho krajneho sudnistwa Düsseldorf ma nětko rozsudźić, hač skóržbje přizwoli a hdy ma so proces wotměć.
Loni 13. meje bě zwjazkowy minister za nutřkowne naležnosće Alexander Dobrindt (CSU) najwjetšu skupinu tak mjenowanych reichsbürgerow, KRD, a jeje samozarjadnistwo zakazał. Po swójskich informacijach měješe wona tehdy 6 000 přiwisnikow. Zwjazkowe wěstotne zarjady pak su skerje wot 1 000 přiwisnikow wuchadźeli. Samsny dźeń je zwjazkowe rěčnistwo po cyłym Zwjazku twarjenja KRD přepytać a štyrjoch pozdatnych nawodow w Porynsko-Pfalcy, Sakskej a Braniborskej zajeć dało. Wot toho časa su woni w přepytowanskej jatbje.
Dopomnjenki wostanu
Dalše chorownje zawru
Podstupim (dpa/SN). Strowotniski minister Braniborskeje, Rene Wilke (SPD) měni, zo je dalše zawrjenje wotdźělow w chorownjach w zwisku z reformu chorownjow móžne a zdźěla trěbne. Zaměr reformy je, kwalitu lěkarskeho zastaranja dołhodobnje zawěsćić a kóšty znižić. W Podstupimje matej so w klinice Ernst von Bergmann ortopediska a žiłowa chirurgija zawrěć, w chorowni swj. Józefa pak zawru neurologiju, gynekologiju a porodnu pomoc. Přičina toho je reforma chorownje a falowacy personal.
Wjacore sta ludźi su w Podstupimje přećiwo zawrjenju wotdźělow w chorownjach a přećiwo skrótšenjam protestowali. Wilke apeluje, zo dyrbi so zastaranje pacientow tež po změnach dale zaručeć. Dołhodobnje dyrbja wšitke stejnišća chorownjow zachowane wostać, zdźěla pak změja nowe nadawki. Tež zakładne a nuzowe zastaranje ma dale derje docpějomne być. Klinika za dźěćacu a młodźinsku medicinu w ewangelskej chorowni Ludwigsfelde-Teltow je připowědźiła, zo so kónc julija zawrje. Chorownja we Wittstocku dyrbi so započatk 2027 zawrěć, ale wuchowanska straža na městnje wostanje.
16. nóc hrodow w Drježdźanach
To a tamne (23.07.26)
Wjelk je we wokrjesu Sprjewja-Nysa při wobchadnym njezbožu zahinył. Zwěrjo je wčera rano mjez Hochozu a Prjawozom (Fehrow) před awto běžał. Škoda zražki wučinja něhdźe 5 000 eurow. Šoferka njemóžeše ze swojim jězdźidłom dale jěć.
Zo bychu angažement hłowno- a čestnohamtskich čłonow wohnjoweje wobory, pomocnych organizacijow a Techniskeho pomocneho skutka, wojakow Zwjazkoweje wobory, rezerwistow a mocy policije a justicy hódnoćili, su CSU a Swobodni wolerjo w Bayerskej krajnemu sejmej chwatnu próstwu zapodali. Zaměr je, „Bayerski dźeń uniformy“ zawjesć. Tutón ma so jónu wob lěto na dobrowólnej bazy pod patronatom statneho knježerstwa a w dorěčenju ze zwjazkami dźěłodawarjow wotměwać.
Turistikarjo nadźijeja so spěšneje pomocy
Jědojte husańcy: W Błótach boja so dale a wjac storněrowanjow poskitkow za dowolnikow
Dubowy pućowanski přadnik (Eichenprozessionsspinner) zawinuje stres w dowolu. W Błótach su někotre groble zawrjene. Minjeny tydźeń pak su fachowcy zawěsćenske naprawy přewjedli, tak zo je so situacija trochu změrowała. Wupožčowarjo čołmow pak so boja, zo přichadźa mjenje dowolnikow do kónčiny. Turistiske zawody nadźijeja so spěšneje pomocy.
Wosrjedź prózdninskeho časa su dźěle daloko rozhałžkowanych groblow w Błótach zawrjene. To je šok za turistiske zawody, kiž wo prěnich storněrowanjach rozprawjeja. Delnje Błóta su mjeztym wosebje sylnje wot duboweho pućowanskeho přadnika potrjechene. Wobmjezowanjow za padlowarjow we woblubowanym dowolnym regionje dla hroža hospodarstwu wobchodniske straty. Klětu chce wobswětowe ministerstwo lěpje na to přihotowane być.
Trump znowa z cłami hrozy
Washington (dpa/SN). Prezident USA Donald Trump hrozy z nowymi cłami. Tónraz chce wón předewzaća, kotrež medikamenty produkuja, nuzować, zo so w USA zaměstnja. Wot lěća 2028 maja najprjedy za jedne lěto wosebite wotedawki we wysokosći 100 procentow na tak mjenowane generika płaćić, po tym ma cło na 200 procentow stupać, Trump na platformje Truth Social připowědźi. Generika su lěki, kotrež so markowym preparatam runaja, su pak zwjetša wo wjele tuńše.
Spominaja na wopory terora
Oslo (dpa/SN). Ludźo w Norwegskej spominaja dźensa na 77 smjertnych woporow terorowych nadpadow w Oslu a na kupje Utøya před 15 lětami, kotrychž wopory běchu předewšěm młodostni. Na wopomnjenskim zarjadowanju porěči tež ministerski prezident Jonas Gahr Støre. Po tym předčitaja mjena morjenych. Na kemšach wočakuja krala Haralda V. a kralownu Sonju. Tež přežiwjeni maja so słowa jimać. Popołdnju wotměje so wopomnjenske zarjadowanje na kupje Utøya.
Ródny dom Hitlera přetwarili
