Berlin (dpa/SN). Sydom lět po tym, zo běše jeho planowana mawt za wosobowe awta zwrěšćiła, zahaja dźensa sudniske jednanje přećiwo bywšemu zwjazkowemu wobchadnemu ministrej Andreasej Scheuerej (CSU) na Berlinskim krajnym sudnistwje. Statne rěčnistwo 51lětnemu wumjetuje, zo je před přepytowanskim wuběrkom zwjazkoweho sejma w zwisku ze zwrěšćenej mawtu łžał. Dale wobskorža 60lětneho bywšeho statneho sekretara Gerharda Schulza. Europske sudnistwo (EuGH) běše 2019 Scheuerowe plany zawjedźenja mawty za wosobowe awta jako europskemu zakonjej so spřećiwjace pohódnoćiła. Wón chcyše jenož jězdźerjow z tukraja połnje wot płaćenja mawty na jězdźidła wolóžić.

Berlin (dpa/SN). Krótko do wólbow krajneju sejmow w Berlinje a Mecklenburgsko-Předpomorskej je so Zwjazk z krajemi minjeny pjatk na nowy paket wolóženjow w zwisku z wysokimi płaćiznami za ćěriwa dojednał. Wot oktobra do decembra chcedźa z t. mj. tankowanskim rabatom wospjet wobydlerjow a předewzaća fi­nancielnje wolóžić. Zakonjedawar zniži energijowy dawk na bencin a diesel wo 14 centow na liter. Hromadźe z dawkom na wobroty wučinja potuńšenje nimale 17 centow na liter. Zwjazk a kraje płaći naprawa něhdźe 2,5 miliardow eurow. Wot spočatka přichodneho lěta chcedźa nimo toho tež hornju mjezu za płaćizny ćěriwow zawjesć. Předewšěm planowany tankowanski rabat hospodarscy eksperća, přirodoškitne organizacije a socialne zwjazki mócnje kritizuja. Tutón wolóža tež tych, kotřiž to scyła njetrjebaja, woni wuzběhnu. Nimo toho je wón na njedobro wobswěta, dokelž njepohnuwa ludźi k tomu, ćěriwo lutować. Tež na horendnych dobytkach mineralnowolijowych koncernow naprawa ničo njezměni.