Stuttgart (dpa/SN). Zadźerženje šulerkow a šulerjow wučerki a wučerjow dźeń a bóle poćežuje. W němskim šulskim barometru, kotryž załožba Roberta Boscha do nadawka dawa, měni dale a wjace woprašowanych (46 proc.), zo jim zadźerženje chowancow wjeselo na powołanju bjerje. Před lětomaj bě tole hišće něhdźe dźesać procentow mjenje woprašowanych zwurazniło. Na druhim městnje wobćežowanjow slěduje heterogenita w rjadownjach, potajkim zdźěla wulke rozdźěle we wukonach šulerkow a šulerjow. Tole měni 34 procentow woprašowanych. Wjele dźěła a falowacy čas (27 procentow) stej dalšej problemaj wučerjow. Za wučerki a wučerjow na wyšich, zhromadnych a powołanskich šulach je zadźerženje wuknjacych často wjetši problem hač za jich kolegow na gymna­zijach abo zakładnych šulach. Na tym móhli po měnjenju ekspertow tež socialne medije wina być. Po měnjenju załožby Roberta Boscha kryja so měnjenja wučerjow z tymi šulerkow a šulerjow. Tych běchu so w měrcu woprašowali.

Dźesać lět po referendumje su sćěhi dźeń a wočiwidniše

London (dpa/SN). „The British people have spoken and the answer is, we’re out.“ („Wobydlerjo Wulkeje Britaniskeje su rozsudźili a wuslědk je, zo smy won.“) Z tutymi słowa je moderator BBC David Dimbley dnja 23. junija 2016 wuslědk wothłosowanja wo tak mjenowany brexit wozjewił. 52 procentow ludźi so tehdy za wustup Wulkeje Britaniskeje z Europskeje Unije (EU) wupraji, 48 procentow bě přećiwo tomu. Šok bě tehdy wulki a rozsud ma hač do dźensnišeho sćěhi. Na wotum sćěhowaštej dołha ćahańca wo modalitach wustupa a politiski chaos. Keira Starmera, kotryž bě póndźelu wozjewił, zo swoje zastojnstwo jako premierminister spušći, naslěduje po referendumje hižo sedma nawodnica abo sedmy nawoda knježerstwa. W 40 lětach do toho bě runje telko premierministrow. A byrnjež chcyła so wjetšina Wulkobritaničanow dźensa zaso do EU nawróćić, wostanje kraj hłuboko pačeny.

Před tydźenjom je mały kraj Kap Verde na koparskim swětowym mišterstwje w hrě přećiwo wulkemu koparskemu krajej Španiskej debitował. Dokładnje tydźeń pozdźišo čakaše z Uruguayjom přichodne wužadanje na mustwo. Ze swojim sebjewědomjom so jim samo tróšku wjace poradźi hač w předchadźacej hrě. Z direktnym wólnym kopom je mustwo jako „překwapjenka turněra“ přećiwo dwójnemu swětowemu mištrej krótki čas nawjedowało. Po tym zo běchu Uruguayčenjo hru hišće do połčasa z dwojimi wrotami zwjertnyli, pak sta so jim w 61. min. wulki zmylk w škiće. Olivera­ hraješe bul k přećiwniskemu nadběhowarjej Vareli. Wón wuži składnosć a suny bul do mjeztym prózdnych wrotow. Tole wosta tež kónčny staw bajka­ wokoło Kap Verde póńdźe dale. W druhej hrě wčerawšeje póndźele nastupištej Nowoseelandska a Egyptowska. Nowoseelandska zahe nawjedowaše, ale njemóžeše předskok zachować, přetož w 2. połčasu Egyptowčenjo nachwatachu a hru 3:1 za sebje rozsudźichu. Wječor je Argentinska dźakowano Lionelej Messijej 2:0 přećiwo Awstriskej dobyła. Wón trjechi dwójce a je z tym najlěpši třělc wrotow w stawiznach WM.

Wulce wustróžani smy zhonili, zo je wjelelětny předsyda spěchowanske towarstwa Němsko-Serbskeho ludoweho dźiwadła Falk Winzer njejapcy zemrěł. Jako rodźeny Budyšan bě wón čas žiwjenja wusko z městom a jeho kulturu zwjazany. Za čas swojeho 30 lět trajaceho skutkowanja jako předsyda spěchowanskeho towarstwa je so wón za nje zasadźował. Dźakowano jemu a druhim čłonam towarstwa móžachmy křidło za koncerty kupić a dźěći dóstachu powyšenja za křesła. Z financielnej podpěru za busy móžachu so dźěći dla na swětowym dnju šulerskeho dźiwadła wobdźělić. Mnoho dalšeho je towarstwo pod nawodom Falka Winzera do skutka stajiło. Wosebitej wjerškaj jeho skutkowanja běše reprodukcija originalneje akcije dźiwadła z lěta 1796, kaž tež sobudźěło na knize „Bautzener Theater Geschichten“. Tež na wabjenskich akcijach za dźiwadło a towarstwo je so wobdźělił.