2. dźěl esejistiskeje serije wo słowjanskim žiwjenju Europy a wo tym, čehodla Serbja poprawom na čole Słowjanow steja
Wčera je tomu štyri lět, zo zahaji Ruska inwaziju Ukrainy. Ale wojowanje mjez europskimi statami njewotměwa so tuchwilu jenož z brónjemi, zaznawamy tež diplomatiske a hospodarske: Madźarska blokuje nowe europske sankcije přećiwo Ruskej, Słowakska wzdawa so nuzoweho poskićowanja elektriskeho pruda bombardowaneje Ukrainje, dokelž nadběhuje Ukraina wolijowód Družba, kotryž srjedźnu Europu z ruskej naftu zastara. Čěska a Pólska mataj cyle hinaši poměr k Ukrainje – swojich nazhonjenjow z Ruskej dla ukrainskich přećelow njehladajo na słowakske měnjenje podpěratej. Tež na tym hodźi so zwěsćeć, zo su poměry mjez zapadnymi słowjanskimi ludami komplikowane. Wjacore aspekty je definuja. Sprěnja: Přisłušnosć k srjedźnej Europje. Hačrunjež – Eksistuje scyła tajke něšto kaž „srjedźna Europa“? A jeli haj – hdźe leža jeje hranicy? Češa wobhladuja ju w mjezach něhdyšeho Rakusko-Wuherskeho mócnarstwa.
