Najebać někotre wuspěšne prócowanja wo etniskorěčnu rewitalizaciju (Baskojo, Walizojo, Samojo …) namakamy w Europje wjacore etnikumy a rěče na kóncu swojeje eksistency. Tajkimle skupinam přisłušeja tež Istrorumunojo, rěčacy wosebitu romanisku rěč. Woni su dotal žiwi w někotrych zanjesenych kutach połkupy Istra na sewjeru Chorwatskeje. Tučasne mnóstwo rěčnikow istrorumunšćiny pak njehodźi so runjewon lochce postajić. W encyklopedijach nańdźemy w tym zwisku často ličbu tysac, kotraž pak wuchadźa ze situacije před modernej globalizaciju a mobilitu wobydlerstwa. Mnozy istrorumunsce rěčacy njebydla mjeztym hižo w swojich tradicionelnych sydlišćach, ale su do druhich kónčin kraja přećahnyli. Za cyłu Chorwatsku płaći dźensa skerje podaće wo něhdźe 500 wosobach (z toho jenož někotre dźesatki młódšich), kotřiž su rěče kmani. Nimo toho eksistuje paradoksneho razu 400 do 500 ludźi wopřijimaca skupina istrorumunskich wupućowarjow, kotraž je domiznu mjez lětami 1945 do 1970 do zamórskich krajow (USA, Kanada, Awstralska) wopušćiła.