Žane zawjazowace zwučowanja
Reforma BAföGa z blida?
Berlin (dpa/SN). Ze swojim wuprajenjom, zo je „ministerstwo wšitke zakłady za reformu BAföGa stworiło, zo pak z toho wuńdu, zo frakciji knježerstwa reformu njepodpěrujetej“, je zwjazkowa ministerka za slědźenje Dorothee Bär (CDU) zwadu w koaliciji nastorčiła. Reforma mjez druhim předwidźi, měsačnu bydlensku pawšalu za studowacych wot přichodneho zymskeho semestra wot tuchwilu 380 na 440 eurow zwyšić.
Poprawom běštej so frakciji CDU/CSU a SPD po diskusijach kónc apryla na reformu dojednałoj. Znajmjeńša SPD wot toho časa kruće z toho wuchadźeše, zo reforma steji. Ćim iritěrowaniši reagowachu socialni demokraća na wčerawše wuprajenja ministerki.
Wolfa Biermanna wuznamjenili
Berlin (dpa/SN). Zhromadnje ze sydom dalšimi wuzwolenymi su wčera w Berlinje spěwytwórca Wolfa Biermanna z rjadom Pour le mérite za wědomosće a wuměłstwa počesćili. Zhromadźenstwu mytowanych přisłuša jenož něhdźe 80 wusahowacych wosobinow z Němskeje a druhich krajow, mjez nimi mnozy lawreaća Nobeloweho myta. W zjawnosći mało znaty rjad je pruski kral Friedrich Wilhelm IV. w 19. lětstotku załožił, patronatstwo wukonja dźensa zwjazkowy prezident Frank-Walter Steinmeier.
Stawiznar Karl Schlögel hódnoćeše Biermanna jako „přewšo politisku wosobinu a swojorazneho wliwapołneho wuměłca, kotrehož spěwy zwuraznjeja žiwjenske začuće cyłeje generacije“. Biermann sam naspomni, zo dyrbješe so hladajo na myto „najprjedy raz pola Google naprašować“. Na „wojerskich korjenjach myta“ so „hižo njepostorkuje“, wón rjekny a doda, zo je „zasadnje bóle za měr, tola druhdy tež za wójnu – mjenujcy, dźe-li wo bój swobodneje towaršnosće a demokratije přećiwo potłóčowanju“.
Kopolaty nowy započatk
Strack-Zimmermann na stronskim zjězdźe FDP z kandidaturu překwapiła
Berlin (dpa/SN). Hišće někotre mjeńšiny do wólbow prezidija a zwjazkoweho předsydstwa na kónctydźenskim zwjazkowym stronskim zjězdźe FDP běše Wolfgang Kubicki jenički požadar wo zastojnstwo stronskeho předsydy. Njejapcy pak zhonichu wón a mnozy delegaća, zo tež europska politikarka Marie-Agnes Strack-Zimmermann kandiduje. Dokelž běštaj w tydźenjach do zjězda dotalny šef FDP Christian Dürr kaž tež krajny předsyda strony w Sewjerorynsko-Westfalskej Henning Höne swoju kandidaturu cofnyłoj, „je sej strona šansu na wotewrjene a fairne wubědźowanje sama sćazała“, Strack-Zimmermann pozdźišo podšmórny. Wona doda, zo chcyše ze swojej krótkodobnej kandidaturu stronskim čłonam móžnosć wróćić, so rozsudźić móc. Porno konserwatiwno-liberalnemu Kubickijej słuša Strack-Zimmermann skerje do lěhwa tradicionelneho socialnoliberalneho politiskeho kursa.
Dobry rozsud
Klětuši bal z italskim flairom
To a tamne (01.06.26)
Škleńca wody k wječeri běše přičina lěta trajaceho juristiskeho rozestajenja mjez turistku a italskim luksusowym hotelom w Dolomitach. Nětko je sudnistwo prašenje, hač ma žona prawo na darmotnu škleńcu wody z honača k jědźi, zakónčiło. Po wusudźe hosćo w restawrantach a hotelach tajke prawo nimaja.
Seniorku z rolatorom wuhladachu zastojnicy policije w Euskirchenje na foće błyskača, nad čimž so njemało dźiwachu. W powěsći na Instagramje woni zdźělichu, kak běše ke kurioznemu wobrazej dóšło: Žona běše runje na chódniku podłu dróhi po puću, kotraž je na tempo 30 km/h wobmjezowana, jako přismali transportne awto ze spěšnosću 42 km/h, kotrehož dla běše radarowa kamera zaskočiła. Awto pak je jenož w pozadku widźeć.
Kancler Merz pod ćišćom
Berlin (dpa/SN). Zwjazkowy kancler Merz (CDU) steji pod dźeń a wjetšim ćišćom. Magazin Stern kaž tež dźenik Bild rozprawjatej, zo „wliwapołni“ čłonojo CDU wo změnje na čole knježerstwa přemysluja. Konkretne plany za wotwolenje pak prawdźepodobnje tuchwilu njeeksistuja. Přiwšěm kursěruja spekulacije wo Hendriku Wüsće jako móžnym naslědniku. Wüst je aktualny ministerski prezident Porynsko-Westfalskeje.
Wobskorža bywšeho ministra
Berlin (dpa/SN). Statne rěčnistwo je na Krajnym sudnistwje w Berlinje skóržbu přećiwo něhdyšemu zwjazkowemu ministrej za wobchad Andreasej Scheuerej (CDU) zapodało. Jemu wumjetuja, zo je so před přepytowanskim wuběrkom zwjazkoweho sejma k temje mawt wopaki wuprajił. Zhromadnje z 51lětnym wobskorža tež něhdyšeho statneho sekretara Gerharda Schulza, zdźěli rěčnik statneho rěčnistwa.
CSU žada sej spěšnu reformu
