Zły Komorow/Podstupim (dpa/SN). Dźeń a wjace wokrjesow w Braniborskej zakazuje niłkeje wody dla wubranje wody z rěkow, hatow a jězorow. Wot dźensnišeho je we wokrjesu Hornje Błóta-Łužica wotklumpanje wody w přitočnišću Srjedźneje Sprjewje zakazane. W šěsć dalšich braniborskich městach a wokrjesach su wubranje wody hižo zakazali, mjez druhim w Braniborje nad Habolu. W Choćebuzu a Podstupimje wo naprawje tuchwilu wotwažuja.

Zhorjelčanka nowa nawodnica

Zhorjelc (SN). Rodźena Zhorjelčanka Kerstin­ Nowotny nastupi spočatk septembra zastojnstwo nawjedowaceje wyšeje statneje rěčnicy na Zhorjelskim statnym rěčnistwje. Wona naslěduje dr. Thomasa Fresemanna, kotryž bu loni spočatk junija jako prezident krajneho sudnistwa w Zhorjelcu powołany. Wot tutoho časa je Kerstin Nowotny zarjad komisarisce nawjedowała.

53 milionow za nowy centrum

Berlin (dpa/SN). Nic jenož w knježerstwowej koaliciji debatuja tuchwilu wo naćisku zwjazkoweho financneho minis­terstwa nastupajo zawjedźenje cokoroweho dawka, na kotryž běchu so w koa­liciskim zrěčenju dojednali. Mjez dru­him je so zwjazkowe agrarne ministerstwo jasnje přećiwo planam wuprajiło. W zjawnym lisće mjez druhim rěka, zo so naćisk poručenjam wot strowotni­skeho ministerstwa społnomócnjeneje fachoweje komisije spřećiwja.

Drježdźany (dpa/SN). W Sakskim krajnym sejmje zahaja dźensa wuradźowanja wo dwójnym etaće za lěće 2027 a 2028. Po předstawach mjeńšinoweho knježerstwa stronow CDU a SPD ma wón hač do 22. decembra schwaleny być. Sakske knježerstwo chce w přichodnymaj lětomaj něhdźe 53,5 miliardow eurow wudać. Cyłkowny etat je z tym tak wulki kaž hišće ženje.

Wotewrjene tuchwilu je, z kotrymi frakcijemi chce knježerstwo wjetšinu hłosow­ zdobyć. Knježerstwowej koaliciji pobrachuje dźesać hłosow za swójsku wjetšinu. Dokelž wona frakciju AfD z procesa konsultacijow a tež jako podpěraćela wuzamkuje, zwostanu jako partnerojo jenož frakcije BSW (15 mandatow), Zelenych (7) a Lěwicy (6). Wobzamknjenje aktualneho sakskeho etata běchu zapósłancy Zelenych a Lěwicy podpěrali. Na prašenje, hač by strona zhromadnje z BSW schwalenje etata podpěrowała, praji předsydka frakcije Zelenych Franziska Schubert, zo tradicije Zwjazka 90 dla z neo-stalinistiskej stronu kooperować nochcedźa.