Praha (SN/LuNo). Kaž je bamž Leo XIV. wčera rozsudźił, sta so z nowym a cyłkownje 38. Praskim arcybiskopom a 26. čěskim primasom msgr. Stanislav Přibyl. Tón je so w Praze před jenož 54 lětami narodźił a tuchwilu jako biskop w sewjeročěskich Litoměřicach skutkuje. Wottam je tež někotrym Serbam znaty, dokelž před lětomaj je tam serbskeho duchowneho Šćěpana Delana jako noweho čěskeho kanonika pomjenował. „Serbja maja dobry poćah k biskopstwu w Litoměřicach, wšako putnikuja kóžde lěto do Bohosudowa a Hejnic“, wujasni tehdom biskop hladajo na serbskeho kolegu swój rozsud.

Druzy Serbja znaja noweho Praskeho arcybiskopa z lońšeho putnikowanja do Bohosudowa, potajkim z Krupki. Tam je mjenujcy zjawnje něšto njewočakowane slubił: „Bych rady serbsce wuknył, dokelž so mjerzam, zo rěč njerozumju a čitać njemóžu, što w našich serbskich bohosłužbnych knihach steji. Češa a Serbja wostanu zawěsće dlěje hač jenož přichodne dwaceći lět dale susodźa, doniž so do renty njepodam. Tež tohodla chcu serbsku rěč tak derje zeznać, zo směm w přichodźe serbsce prědować.“