Gagauzojo su mały lud (wjace hač 150 000 přisłušnikow), rěčnje a kulturnje přiwuzny Turkam, bydlacy wosebje w Moldawskej. Porno Turkam pak njewu­znawaja so k islamej – woni su prawosławnu nabožinu přiwzali.

W času Sowjetskeho zwjazka buchu Gagauzojo poněčimnje asimilowani; ródnu rěč započachu z rušćinu zaměnjeć. Wot 80tych lět 20. lětstotka pak zahajichu rewitalizaciju a politiske žadanja. Woni samo zamóchu w słabym młodym moldawskim staće sej wosebity status wunuzować. W lěće 1995 nasta tak na juhu Moldawskeje awtonomna Gagauziska. Wona rozpřestrěwa so dźensa na 1 832 km² (mjenje hač wulkosć serbskeho sydlenskeho ruma). W regionje je wokomiknje něšto wjace hač 100 000 wobydlerjow – něhdźe hač 80 procentow z nich su Gagauzojo.