Pólska a Ukraina při předźěłanju struchłych stawiznow na nowym puću

Waršawa (dpa/SN). Ukrainski prezident Wolodymyr Zelenskyj je Pólskej přilubił, zo so w prašenju struchłeho kapitla zhromadnych stawiznow žadanjam Pólskeje podwoli. Ukraina je zwólniwa, ekshuminowanje pólskich woporow suroweho masakra we Wolhyniskej za čas Druheje swětoweje wójny pospěšić. Tole rjekny Zelenskyj we Waršawje po zetkanju ze swojim pólskim kolegu w zastojnstwje Karolom Nawrockim.

Při masakrach we Wolhyniskej a wuchodnej Galiciskej běchu ukrainscy nacionalisća mjez 1943 a 1945 ze swojim wójskom UPA wjace hač 100 000 pólskich ciwilistow morili. Při tym postupowachu přewšo bestialisce: Wobydlerjow wjeskow zahnachu do cyrkwjow a Bože domy zapalichu. Štóž spyta ćeknyć, toho ze sekerami zabichu. Nacionalisća chcychu z etniskim wučisćenjom swoje žadanja za swójskim ukrainskim statom potwjerdźić. Němscy okupanća krawnym njeskutkam přihladowachu.