Zeleni w Sakskej rozsud nutřkowneho ministra kritizuja

Berlin/ Zhorjelc (dpa/SN). Rozsud zwjazkoweho nutřkowneho ministra Alexandera Dobrindta (CSU), z kontrolemi na němskich mjezach pokročować, Zeleni w Sakskej kritizuja. „Z tym wopruje zwjazkowe knježerstwo swobodu za swoju retoriku wěstoty a přidatnje zwjazkowu policiju přežaduje“, zapósłanča Europskeho parlamenta Anna Cavazzini z Kamjenicy w zdźělence wopodstatni. „Komisija EU měła so skónčnje jasnje přećiwo tutomu systematiskemu přeń­dźenju europskeho prawa wuprajić“, wona rozkładujo doda.

Cavazzini kontrole jako wobćežowanje za dojězdźowarjow a zawody w pomjeznym regionje kritizuje. Mjez Zhorjelcom a Zgorzelecom ludźo tole wšědnje pytnu. Zapósłanča so ze skóržbu muža z regiona solidarizuje, kotryž so před zarjadniskim sudnistwom w Drježdźanach přećiwo kontrolam wobara. Wón ma wjackróć podlěšene kontrole za wopačne a njezakonske, praja Zeleni. Cavazzini mjenuje skóržbu wažny krok, „zo bychmy prawa wobydlerjow zakitowali.“