W Awstralskej wo wupućowanju
W Melbournje w Awstralskej je njedawno jendźelskorěčna knižka wo wupućowanju Serbow z Hornjeje Łužicy do Awstralskeje a do Texasa w 19. lětstotku wušła. Wot Trudle Malinkoweje napisany spis je serbske towarstwo Wendish Heritage Society Australia (WHSA) wudało.
Brošura w formaće A5 ma atraktiwny layout a je z tójšto wobrazami wuhotowana. Pokazki na dale wjeducu literaturu zmóžnja zajimcam, so nadrobnišo z tematiku zaběrać. Publikacija je składnostnje lětušeje 40. róčnicy załoženja WHSA wušła.
36. filmowy festiwal wuspěšnje zakónčili
Choćebuz (KP/NC). 36. wudaće Filmoweho festiwala Choćebuz (FFC) su minjenu wutoru we wulkim domje Statneho dźiwadła swjatočnje wotewrili. Přez wječor z čestnymi hosćimi a hudźbnym přinoškom ukrainskeho chóra Paljanyzja wjedźeše moderator Christian Matthée němsce, jendźelsce a serbsce. Hač do kónca festiwala njedźelu móžachu lubowarjo kina ze 147 filmow wuzwolić, mjez nimi bě 12 swětowych premjerow. Dalša nowostka bě lětsa mjez druhim nowe wubědźowanje GenNext, w kotrymž předstajichu młodźi režiserojo perspektiwy młodostnych a młodych dorosćenych. Kruty wobstatk FFC je hižo wjele lět sekcija Heimat/Domownja/Domizna, kotraž prezentuje filmy z a wo Łužicy kaž tež łužiskich a serbskich filmowcow. Składnostnje dweju jubilejow – 75lětneho wobstaća Serbskeho instituta a 80 lět DEFA – skićachu dohlad do archiwa serbskeho filmowstwa. Dale swjećeštej dwě serbskej dokumentaciji swoju premjeru: „Spiwanje. Co nas zwězujo“ Romana Pernaka a „Štom stejo mrěje – Am Ende des Brotbaumes“ Reinera Nagela.
Prapremjera młodeho komponista zaklinčała
Reinera Nagela wuznamjenili
Wotnětka za spisownu rěč aktiwna
Nowe wobličo je wot spočatka měsaca w Ludowym nakładnistwje Domowina (LND) widźeć: Betina Wenderothowa z Chrósćic, 40lětna ženjena mać štyrjoch dźěći, je zamołwitosć za marketing přewzała. Oficielnje so městno „senior marketing manager“ mjenuje. Do tutoho naročneho joba njesłušatej jenož koncipowanje a koordinowanje wšěch naprawow marketinga LND, ale tež wuwiće produktow serbskeho nakładnistwa a zdobywanje dorosta změje wona sobu na starosći. Jednaćel LND Syman Pětr Cyž so wjeseli, zo je dlěši čas wakantne městno zaso z kompetentnej Serbowku wobsadźene.
Kultura dyrbi lutować
Budyšin (SN/MiR). Kulturny konwent Hornja Łužica-Delnja Šleska je so na swojim prěnim zeńdźenju po wólbach noweje kulturneje přirady wčera w Budyšinje z etatom kulturneho ruma za lěto 2027 zaběrał. Naćisk knježerstwa Swobodneho stata Sakska za dwójny etat 2027/2028 dotal předwidźi, zo dóstanje kulturny rum pjenjezy we wysokosći zašłeju lět. Najebać to su we wobłuku kulturneho kubłanja a při inwestiwnych srědkach skrótšenja předwidźane. Sakski etat njeje hišće schwaleny. Tuž je so konwent rozsudźił, tuchwilu jenož pozitiwne lisćiny institucionalneho a projektoweho spěchowanja wobzamknyć. Doskónčnje pak chcedźa wo tym hakle klětu w februaru na přichodnym zeńdźenju gremija wothłosować, wobkedźbujo, hač so budget z wobzamknjenjom etata Sakskeje snano hišće powjetši abo tež nic.
Serbske baje na Romantice
Festiwal z letiskim filmom zahajili
Marija-Tereza Krawžic nowa młodźinska referentka
Marija-Tereza Krawžic je wot lětušeho awgusta młodźinska referentka w zarjedźe Domowiny. Wotrostła bě wona w Chrósćicach a je so po maturje na Serbskim gymnaziju w Budyšinje do Berlina podała, zo by tam socialne dźěło studowała. Dostudowawši swój bachelor dźěše do Lipska, hdźež přizamkny masterski studij w samsnym předmjeće. Po zakónčenju studija něšto lět w Lipsku w pěstowarni dźěłała.
„Lětsa pak sym pytnyła, zo je čas, zo so do Łužicy nawróću“, Marija-Tereza Krawžic w swojim běrowje w Serbskim domje powěda. Swoje nadawki wona hižo trochu znaje, wšako bě bywšu młodźinsku referentku Virginiju Hanuzowu před něšto časom hižo někotre měsacy zastupowała. Nětko pak chce so młodźinska referentka najprjedy z aktualnymi potrjebami młodostnych w serbskej Łužicy rozestajeć. Zhromadnje ze serbskim młodźinskim towarstwom Pawk prosy wona tuž předsydow młodźinskich klubow a towarstwow sobotu, 14. nowembra, na tak mjenowanu „Klub-šef-etažu“ do Radworskeho Słodeńka. Z młodostnymi chce so Krawžic wo tym dorozumić, kotre projekty abo kajku podpěru sej woni přeja.
Wumrěć chcyć a wěčnje žiwy wostać – Krabat
Budyšin (SN/MiR). Wo temje Krabat su zašłe lěta mnohe wuměłske twórby nastali, mjeztym nowa profesionalna jewišćowa twórba za klankodźiwadło. Johannes Kürschner a Moritz Schönbrodt staj kuzłarski kruch „Krabat stirbt · zemrěje · wumrějo“ za klanki na kiješku a dudlawu (Drehorgel) stworiłoj. Pjatk staj wonaj dopołdnja šulerjow a wječor dorosćenych zajimcow w Budyskim dźiwadle na hrodźe zahoriłoj. „Njeje lochko, młodostnych wo tym přeswědčić, zo je klankodźiwadło wuměłski žanr, kiž jich puta. Ručež pak do zahajenja předstajenja dudlawu zasłyša, namakaja spěšnje měr a so do jednanja zanurja“, rjekny na naprašowanje SN hudźbnik a komponist Johannes Kürschner.
