Zběrka wušła
Muzej nowy koncept prezentował
Serbski institut je na swojej wčerawšej klawsurje w Serbskim domje składnosć wužił a so dźeń do prěnjeho zarywa za twar noweho Serbskeho foruma wědy na Lawskim arealu wo koncepciji za nowu trajnu wustajeńcu Serbskeho muzeja wot 2030 na nowym městnje informował.
Budyšin. Direktorka Serbskeho muzeja Christina Boguszowa a kurator dr. Jędrzej Soliński předstajištaj něšto wjace hač 40 institutnikam plan za modularnje natwarjenu wustajeńcu a temowe wobłuki. Inspiraciju běchu sej muzejownicy při wopytach wšelakich muzejow w tu- a wukraju nazběrali.
Team běrowa dr. Ulrich Hermanns z Münstera, kotryž je nadawk za koncepciju wustajeńcy dóstał, prezentowaše na wulkim płatnje 3D-turu po nutřkownych rumach nowotwara na dwěmaj etažomaj. Tak dóstachu přitomni zaćišć wo rumnostnych wuměnjenjach a wuhladachu hižo rumnosće za zhromadne wužiwanje. Z pomocu KI Moodboards sposrědkowa jim běrow dohlad do dźěła na koncepće. Zakładna ideja je zběraćelski muzej, w kotrymž so objekty inscenuja. Rěč běše wo 1 300 eksponatach.
Maika Dźisławkec podpěruje LND
Wot spočatka septembra podpěruje Maika Dźisławkec z Dobrošic wotrjad rozšěrjenja w Ludowym nakładnistwje Domowina. Po lětsa złoženej maturje ze wukonowymaj kursomaj serbšćina a stawizny na Serbskim gymnaziju Budyšin chce so Maika na rozdźělnych powołanskich polach wuspytać. W šulskich prózdninach je hižo w redakciji Serbskich Nowin dźěłała a staraše so wo scannowanje fotow za archiw LND. We wotrjedźe rozšěrjenja podpěruje sobudźěłaćerjow při pisanju zličbowankow, předawanju knihow a dodawanju Serbskeje protyki. Tak dóstanje dohlad do nadawkow wšědneho dnja nakładnistwa, za kotrež je so hižo zahe zajimowała. Jako šulerka je wona w Dobrošicach a wokolinje za małki kapsny pjenjez nowiny roznošowała. Z tym so wona wo to postara, zo kóždy zajimc dypkownje nowostki do domu dóstanje. Hač do klětušeje meje chce wona w nakładnistwje dźěłać. W lěću chce sej zhromadnje z přećelom z nalutowanymi pjenjezami swět wotkryć a so na jězbu do najwšelakorišich krajow podać. Po tym ma wotpohlad, so na studij pola policije abo cła podać, na kotryž so hižo pilnje přihotuje.
Slawisća so w Jenje schadźowali
Jena (LM/SN) Kóžde tři abo štyri lěta schadźuja so zastupjerjo němskeje slawistiki, stajnje na druhim městnje. Lětsa wuhotowaše Friedricha Schillerowa uniwersita w Jenje tak mjenowany 15. dźeń slawistiki. Zarjadowanje pak njetraješe jenož jedyn dźeń, ale poprawom cyłe štyri dny, a to wot minjeneje srjedy hač do předwčerawšeho. Zetkanje zahajichu swjatočnje z wjacorymi powitanskimi narěčemi a přednoškom. Mjez druhim porěči tam tež prof. dr. Thede Kahl, direktor Instituta za slawistiku a kawkaziske studije w Jenje. Po tym sćěhowaše bifet, kotryž bě hudźbnje wobrubjeny.
Přihotuja so na beneficny koncert
Zwěrjata za dźěći
Budyšin (SN). Hač pos, kóčka, wujk, papagajik abo samo pawk – kóžde zwěrjo ma so prawje hladać a zastarać. Što pak su scyła domjace zwěrjata a zwotkel přińdu? Što zwěrjo wšitko trjeba, hdyž do domjacnosće přińdźe?
Nowa w Ludowym nakładnistwje Domowina wušła kniha „Moje najlubše domjace zwěrjata“ njeposrědkuje jenož wědu wo znatych domjacych zwěrjatach, ale předstaja tež eksotiske zwěrjata kaž grjeksku nakrajnu nopawu, ptakopawka abo najwšelakoriše ryby. Publikaciju poskićuja we wšitkich znatych předawanišćach serbskich knihow.
Pěsničkarjo znowa při skale zahrali
Z basnjemi, hudźbu a mólbami na Boženu Nawka-Kunysz spominali
Pod hesłom „W fokusu – Božena Nawka Kunysz“ stej Serbski ludowy ansambl a Budyski Serbski muzej wčera wopominanske zarjadowanje za wusahowacu serbsko-pólsku tworjacu wuměłču wuhotowałoj. Cyłkownje něhdźe 70 zajimcow je hudźbu, reju, poeziju a molerstwo wopřijimacy program sćěhowało.
