Lipsk (TJ/nsk/SN). „Im Spülicht der Überamme“ rěka nowa wosebita wustajeńca, kotraž bu wčera w Lipšćanskim kulturnym domje Salon Similde wotewrjena. Přehladka, kotraž nawjazuje na ekspoziciju „Neue Sorbische Kunst (NSK)“ „Café Venedig“, pokazuje lětsa nastate twórby Bernharda Schippera kaž tež wudźěłki, kotrež maja po słowach wuměłca „prěnjotny serbski sydlenski rum wotbłyšćować a na słowjanski pochad sydlišćow Lipsk a Connewitz dopominać“. Nimo toho wopřijima wustajeńca dotal njepokazane eksponaty a nowonamakanki dźěłoweje skupiny hibanja NSK, zdźěłane wot lěta 1974 do 1989.

Z tutej instalaciju chce Schipper „z wuměłskim přepytowanjom kolonialneje dimensije praksy serbskich ćěšerkow w Berlinje za čas wilhelminskeje doby pokročować“. Zaměr je, recipientej z „wulgarno-martialiskej metaforiku“, kaž wuměłstwowa historikarka Ulrike Lorenz tworićelstwo Schippera wopisuje, zmóžnić, so na wšitkich zmysłowych runinach do tematiki zanurić. Zajimcy, kotřiž­ chcedźa­ sej wustajeńcu wobhladać, měli so do spěcha měć, přistupna je mjenujcy jenož hač do pjatka dźensa za tydźeń.

Budyšin (SN/bn). Dohromady 17 młodych, bjezwuwzaćnje hornjoserbsce tworjacych awtorkow a awtorow w starobje jědnaće do 29 lět wobdźěli so na lětušim literarnym wubědźowanju, kotrež je Ludowe nakładnistwo Domowina zhromadnje ze Załožbu za serbski lud znowa wupisało. W třoch kategorijach pytaja za młodymi talentami. Najsylniši je wobłuk lyrika ze 26 basnjemi z pjera cyłkownje dwanaće dorostowych basnicow a basnikow. Za wobłuk lyriska proza a krótkopowědančko bu pjeć awtorskich přinoškow namjetowanych. W kategoriji proza a dra­matika su štyrjo pisacy runja telko twórbow zapodało.

W kóždej kategoriji spožča so maksimalnje tři myta w cyłkownej hódnoće 1 750 eurow. K tomu wuznamjeni so přidatnje najlěpši přinošk, spisany wot wobdźělnicow a wobdźělnikow pod 16 lětami. Wšitkim zapodawacym kiwaja za „dalše radźene přinoški“ dobropisy za nakup w Smolerjec kniharni.

Wuznamjenjene twórby maja so w přichodnej antologiji rjadu LND „LitMiks“ – hač do lońšeho znaty jako „Paternoster“ – resp. w Rozhledźe wozjewić.

Choćebuz (NC/KP). W lěće 1989 natoči serbski režiser a awtor Jan Hempel w kooperaciji z DEFA-studijom trikowy film z klankami pod titulom „Als es noch Wassermänner gab“ na zakładźe swojeje dźěćaceje knihi „Kak bu wódny muž braška“. 34 lět pozdźišo, mjenujcy minjenu njedźelu, swjećeše film pod titulom „Ako su hyšći žywe byli wódne muže“ swoju delnjoserbsku premjeru. Něhdźe 30 dorosćenych a dźesać dźěći ju w Choćebuskim filmowym dźiwadle Obenkino we wobłuku ramikoweho programa 35. Choćebuskeho filmoweho festiwala (CFF) dožiwi.