Swět słowjanskich bajkow na festiwalu w Dešnje
Dešno (NC/JFK). Słowjanski bajkowy festiwal je lětsa trochu mjenje wopytowarjow hač loni do Dešna přiwabił, štož zaleži zawěsće tež na wjedrje. Předstajenja dźě wotměchu so hłownje kołowokoło tamnišeho Domizniskeho muzeja pod hołym njebjom, a minjeny kónc tydźenja njepostara so chłódny „Wichaŕ“ jenož wo mytologiske, ale tež wo meteorologiske ekstrawagancy. Štóž njeje so wot toho wottrašić dał, dožiwi wospjet wulkotny a hódny festiwal.
Wjeršk programa bě na woběmaj dnjomaj powědarske dźiwadło Machandel, kotrež małych runje tak kaž wulkich hosći w publikumje přewšo zahori. Tež nawodnica hosćićelskeho muzeja Kathrin Šwjelina wopokaza so jako wulki fan „Lubuju prosće wašnje, kak hrajerjej swój program wuhotujetaj.“ Tónraz staj „Machandelojc“ dyrdomdej dweju lutkow předstajiłoj. Wonej namakatej dźiwnuški nastroj, wo kotrymž – zwotkel tež? – njewěstej, zo so wo handy jedna. Jimaj njeje wědome, zo bě njesmilny profesor jón wotpohladnje w lěsu „zabył“, zo by naposledk lutka popadnył a za to sławu žnjał ...
Akcija Koslow
Před 80 lětami, njedźelu, 7. julija 1946, po připołdnju su so w Koslowje pola Kupkec skupiny serbskich młodostnych z 23 wsow zetkali. Na kóncu wójny běše Koslow chětro zničeny. Nětko započachu młodostni hromady rozpadankow rumować. Pilnych dźěłaćerjow zawjeseli chór z Konjec/Šunowa ze spěwami, kiž potom wšitcy sobu spěwachu. Z akciju w Koslowje je so brigadowanje serbskeje młodźiny zahajiło. Ličba brigadow zwyši so na 56. Pozdźišo rozšěrichu so aktiwity na akciju „Wo naš wšědny chlěb“, kotrejež ćežišćo bě socialne polo. A bórze spěwachu w Serbach:
„Bratře, sotra, pój ty k nam,
do dźěła, brigady,
słaby je dźens kóždy sam,
mócne su brigady.“
Na festiwalu w Danskej pomhali
Štyri myta na wožiwjenej Łužiskej filmowej přehladce
Choćebuz (SN/bn). Hač do lěta 2021 tworješe rjad Lausitzer FilmSchau – Łužyska filmowa pśeglěka – Łužiska filmowa přehladka zazběh Choćebuskeho filmoweho festiwala (CFF). Po wjace hač 20 lětach bu format přemjenowany a sta so jako „Dłujka noc krotkich Łužycanarjow“ we wobłuku sekcije Heimat – Domownja – Domizna z wobstatkom regularneho programa CFF. Rozsud zbudźi tehdy rozdźělne reakcije: Na jednym boku chwalachu nowowusměrjenje jako „krok z niše“, na tamnym kritizowachu, zo móhli produkcije tudyšich filmowcow „na widźomnosći zhubić“. W kooperaciji z CFF je Wobydlerske towarstwo Chmjelow tradicionalny format wožiwił a pod starym mjenom we wobłuku 8. Chmjelowskich filmowych nocow pod hołym njebjom minjenu srjedu prěni raz prezentował. Po třoch segmentach pokazachu cyłkownje něhdźe 120 wopytowarjam na Naměsće Arnošta Muki dohromady 14 paskow. Jednotliwym přinoškam přizamkowachu so rozmołwy z wjacorymi na wotpowědnych produkcijach wobdźělenymi filmowcami.
Miks rěčow w „dobrej stwě“ zahorił
Nowej knize a mjezsobna masaža
Radwor (JM/SN). Pisane balonki na dworje serbskeho experiMINT-campusa w Radworju wabjachu wčera na knižnu premjeru BOOKii-knihi „Dožiwjej přirodu!“. Dešća dla su na zahrodźe planowane zarjadowanje do nutřkownych rumnosćow přepołožili. Něhdźe 45 hosći bě přeprošenju sćěhowało – dźěći a starši z Radworja a wokoliny kaž tež z Budyšina. Z wulkimi wočemi napjeće słuchachu, što měješe lektorka Ludoweho nakładnistwa Domowina Janina Mikławškowa wo nowej knize powědać. Z pomocu wuzwolenych stronow poda wona na wobrazowce dohlad do knihi a zawjedźe małych a wulkich hosći w přenjesenym zmysle do přirody. Hač na łuce, w lěsu, při abo we wodźe a samo w měsće – wšudźe nas přiroda wobdawa. Dźěći běchu jara aktiwne a wušikne a spěšnje wšě prašenja lektorki wotmołwichu.
Bestseller wušoł
Budyšin. Před wjace hač dźesać lětami je 3. nakład knihi Franka Förstera „Verschwundene Dörfer im Lausitzer Braunkohlenrevier“ wušoł, kotryž je runja předchadźacym nakładam dawno rozebrany. Ćim bóle zwjeselace je, zo je Ludowe nakładnistwo Domowina nětko 4. nakład bestsellera wudało, kotryž je Robert Lorenc znowa wobšěrnje wobdźěłał.
Přiručka wo zničenych sydlišćach dwurěčneje Łužicy brunicoweho hórnistwa dla wobkedźbuje nětko zdobom aktualne wuwiće minjeneje dekady hač do lěta 2025. Na předań je w znatych předawanišćach serbskich knihow.
Probuja za premjeru oratorija
Gitaristaj Kocora w nowym šaće předstajiłoj
Budyšin (SN/bn). „Gitarowe zynki ze Španiskeje, Argentinskeje a Brazilskeje scomter hudźbnym ekskursom do Łužicy kaž tež wulke stawizny na zakładźe małych melodijow, wotbłyšćowace rozpalitosć, reju, krajinu a ludźi“ – takle připowědźištaj Matteo Hórnik a Karl Winkelbauer sobotu swój koncert na Kulturnej zahrodźe Serbskeho ludoweho ansambla. Nic jenož žahaceje horcoty dla wědźeštaj tymile słowami wotpowědować a něhdźe 60 wopytowarjow do muzikaliskich sferow na přikład Joaquína Rodriga, Astora Piazzole a Paola Bellinatija wotwjedować.
Łužiska chłóšćenka wukopa so jako adapcija Korle Awgusta Kocorowych „Třoch serbskich narodnych rejow“, kotrež bě Hórnik po wašnju mjenowanych mištrow za gitarowe duwo spisał. Instrumentalistaj, kotrajž wukmanjataj swoju wirtuozitu tuchwilu na Wysokej šuli za hudźbu Franz Lizst Weimar, daštaj gitaromaj raz solistisce so wotměnjejo, raz w dueće přewažnje přewšo čućiwje klinčeć, štož trěbnemu temperamentej, ručež partitury sej to žadaja, ćim wjace skutkownosće spožči.
Wo stawiznach, kulturje a žiwjenju Serbow zhonili
Jawornik. Konferenca nawodow dušepastyrstwow (Seelsorgeamtsleiter) wšitkich němskorěčnych diecezow, potajkim Němskeje, Awstriskeje a Šwicy, je so wot minjeneje wutory do dźensnišeho w kubłanskim domje swjateho Wjacława w Jaworniku wotměła. Organizator tutoho zetkanja, nawoda dušepastyrstwa Zhorjelskeho biskopstwa Ansgar Hoffmann, je Domowinu wo podpěru prosył. Jemu běše wažne, zastupjerjam diecezow nimo přednoškow a wodźenju po Zhorjelcu a wokolinje zdobom předstajić wosebitosć Zhorjelskeho biskopstwa, kiž je po ličbje katolikow najmjeńše w Němskej, a Drježdźansko-Mišnjanskeho biskopstwa: Serbow, jich stawizny, kulturu a rěč.
Zawčerawšim wječor je nawodnica kulturneho wobłuka Zari Sonja Hrjehorjowa w přijomnej atmosferje na zahrodźe domu wo stawiznach, kulturje a žiwjenju Serbow Hornjeje a Delnjeje Łužicy rěčała a jim zdobom wo prócowanjach rewitalizacije serbšćiny rozwožowała. Přitomni wuwjedźenjam z wulkim zajimom sćěhowachu a so po přednošku hišće dołho z referentku rozmołwjachu.
