Wuspěšny posledni test
SJ Chrósćicy –
ST Klětno/Hamor 2:1 (1:1)
zestawa SJC: Cyž – L. Zahrodnik, Zynda, Matik, Bogusz, Rätze, Šiman, Žur, Hawš, Mark, Kral-Zahrodnik, G. Zahrodnik, Donat, M. Zahrodnik
Poslednju testowu hru přewjedźechu Chróšćenjo sobotu na domjacym trawniku přećiwo Sportowemu towarstwu Klětno/Hamor. Ći běchu poslednju sezonu suwerenje do wokrjesneje wyšeje ligi Hornjeje Łužicy postupili. Za trenarja SJC Waldemara Adamowicza bě to poslednja móžnosć to a tamne wuspytać. Zdobom pak chcyše, zo so jeho mustwo zahraje.
Z jubilejomaj do přichoda
Wojerecy (SN/bn). Towarstwo pěstowanja regionalneje kultury srjedźneje Łužicy woswjeći předwčerawšim z lětnim swjedźenjom 35. róčnicu swojeho załoženja. Z „płatowym“ jubilejom wuhotowaše towarstwo zdobom wjeršk swjedźenskeho lěta składnostnje narodninow mjeztym sto lět wobstawaceho Wojerowskeho Wjacławkec drastoweho domu. Předsydka towarstwa Kirsten Bejmina powita hosći serbsce. Na ze stawizniskimi eksponatami wupyšenym dworje domu wuzběhny wona, zo „nochcemy prosće historizować. Stare rjemjesło a tradicije wjedu generacije hromadźe, a nic naposledk dźakowano angažementej młodźiny swjećimy předewšěm tež, zo dale dźe. Tuž připijmy sej: K strowosći a na přichod!“
Dalši dyrdomdej
Hnujacy literarny pomnik Bukečanomaj
Wosrjedź najrjeńšeho podlěća je Historiske towarstwo w Bukecach serbske popołdnjo wuhotowało. Domiznowědnemu zjednoćenstwu dźe předewšěm wo serbsku rěč a kulturu w Bukecach a we wokolinje. Za to bě sej přeprosyło serbskeho spisowaćela Křesćana Krawca, zo by předstajił swojej knize „Sej statok stajili“ kaž tež wotpowědny němski přełožk pod titulom „Was wir in uns tragen“. Krawc bě po Łužicy jězdźił a dał Serbowkam a Serbam z jich žiwjenja powědać. Mjez druhim předstaja tež dweju Bukečanow, kotrajž so z njesprócniwej wutrajnosću wo zachowanje serbskeje rěče a kultury zasadźujetaj.
Bukečanaj w Bukecach w srjedźišću
Bukečan Arnošt Zoba je jako šulski hólc rady rjemjeslnikow we wsy wopytował, blidarjow, rěznikow, ratarjow. Bukečanscy rjemjeslnicy su jeho serbsce witali a so wjeselili, hdyž je jim při dźěle přihladował. A dokelž so tež pola ćetow a wujow we wokolinje, mjez druhim pola sydom Zobic wujow z Čornjowa, jenož serbsce rěčeše, běše za njeho cyły swět serbski.
Łužica je moja druha domizna
Milan Hrabal powěda, što je kuzło Serbow, kak jeho Łužica puta a čehodla je zaso wo Serbach basnje pisać započinał
Basnik Milan Hrabal předstaji jutře, štwórtk, w Smolerjec kniharni swoju prěnju serbsku zběrku „Dótknjenja“. Lukáš Novosad je so z nim rozmołwjał.
Wěm, kak hnuty sy, hdyž nowa zběrka wuńdźe. To zawěsće hladajo na Twoju prěnju serbsku zběrku hinak njeje, abo?
Na kóždy pad je to něšto druhe, wšako so w Serbach husto zběrki wukrajnikow njewudawaja. Je to njewšědne a pozběhowace, dokelž moje basnje w rěči wuńdu, z kotrejž so wjele lět zaběram. Sym w Smolerjec kniharni tójšto prapremjerow druhich awtorow dožiwił a wěm, kak tajke zarjadowanja wupadaja. Tuž so wjeselu, zo sym to tónraz ja, kohož dla ludźo přińdu. Za mnje je to wulke dožiwjenje, tež hdyž na swojich přełožowarjow myslu, kotřiž su so jara prócowali, moje basnje zeserbšćić – štož zawěsće přelochko njebě.
Čehodla?
Poezija Hrabala wušła
Stefan Šmit nowy čłon redakcije
Mjeno awtora Stefana Šmita jewi so wot spočatka tydźenja pod tekstami a fotami w Serbskich Nowinach. Najwjetši čas potajkim, čitarstwu přeradźić: 40lětny nazhonity žurnalist, kotryž bě w Lipsku sorabistiku a zapadnu slawistiku studował, je nowy přistajeny redaktor a z tym kruty čłon redakcije našeho dźenika. We Worklecach rodźeny a bydlacy wjelelětny swobodny sobudźěłaćer MDR je mnohim ludźom přez swoje přinoški za „Wuhladko“ a jako moderator za sport we wusyłanju „Sachsenspiegel“ znaty.
Wot lěta 2002 skutkowaše Šmit w Serbskim rozhłosu a jeho wusyłanju za młodźinu, Radijo Satkula. Tež w ZDF a na wšelakich městnach ARD je žurnalistiske nazhonjenja nazběrał. K tomu słušachu štyri lěta w Lipšćanskej wotnožce powěsćoweje redakcije ARD-aktuell, kotraž mjez druhim „Tagesschau“ produkuje. Tež přihladowarjo wusyłanjow „Sport im Osten“ a „ARD Wintersport“ jeho znaja.
Łužiske hudźbne lěćo z barokom a rockom zahajili
Budyšin (SN/bn). „East tales“ (stawiznički wuchoda) mjenuje mjezynarodnje renoměrowany serbisko-pólski cyłk Duo Alianda koncertny program, z kotrymž so wčera lětuše Łužiske hudźbne lěćo zahaji. Saksofonist Michał Knot a akordeonist Bogdan Laketic prezentowaštaj na arealu bywšeho Budyskeho Woclo- a sudobjotwarstwa swojorazne swójske wobdźěłanja twórbow přewažnje jendźelskich mištrow baroka, kotrež (zdźěla) z adapcijemi tohorunja jendźelskeho rocka wudospołništaj. Na wysokim rjemjeslniskim niwowje zahorištaj publikum na přikład z kompozicijemi Henryja Purcella abo Johna Dowlanda a klasikarjemi skupinow The Beatles abo Queen. W běhu programa dźakowaštaj so za přeprošenje do Budyšina, hdźež prěni raz zahudźištaj, kaž tež za rjanu překwapjenku: „Smój hižo wjace hač 1 000 króć po wšěm swěće wustupiłoj, ale žonop za to hišće ženje dóstałoj njesmoj.“
