Böhlen (MBc/SN). W měsće Böhlen wosrjedź bywšich brunicowych jamow južnje Lipska přihotuja klankodźiwadło w němskej, hornjo- a delnjoserbskej rěči. „Krabat zemrěje“ abo „Krabat stirbt – Zauberstück für Stabpuppen und Dreh­leier“ rěka skerje swobodna interpretacija maćizny kołowokoło powěsće wo „dobrym serbskim kuzłarju“, kotruž chce wuměłstwowe duwo schoenbrodtkuerschner přichodnje premjernje předstajić.

Klankar Moritz Schönbrodt je awtor krucha a jón zhromadnje z hudźbnikom Johannesom Kürschnerom inscenuje. Klankodźiwadźelnica Linda Fülle wudospołnja team, kotryž so na eksperimentalne wašnje z powěsću wo Krabaće zaběra. W starej blidarni su sej swójsku dźěłarnju wuhotowali a tam kulisu, figury a rekwizity zhotowili. Žadyn z nich z Łužicy njepochadźa, z někotrymžkuli Serbom pak su so hižo zeznajomili. Wšitcy znaja „Krabata“ Otfrieda Preußlera ze šulskeho časa, za inscenaciju pak zdachu so jim twórby Jurja Brězana wo wjele kmańše być. Tak nastaty scenarij wotbłyšćuje w dobrej hodźince pućowanja Krabata po swěće a přez časy.