Thabet Azzawi, ze Syriskeje pochadźacy mišter orientaliskeho instrumenta oud, bě wčera z wosebitym hosćom zazběha lětušich zarjadowanjow akcije „Happy monday Bautzen – Wjesoła póndźela Budyšin“. Na Hłownym torhošću wobrubi wón z hodźacymi so zynkami swjedźeń swěčkow, z kotrymž so po chowanju słónca posćenje we wobłuku ramadana kónči. Program zarjadowanja wopřijimaše wotpowědny zawod a dźěłarničku za paslenje latarničkow. Na wotewrjenym jewišću wěnowachu so hosćo aspektam hospodliwosće a/abo nawjazachu z tak mjenowanym speed friending (snano prěnje) mjezsobne styki. Foto: Jörg Stephan

Budyšin (SN/bn). Pod hesłom „W kruhu byća – Im Zirkel des Seins“ je Serbski ludowy ansambl minjeny štwórtk třeći sinfoniski koncert aktualneje hrajneje doby wuhotował. Něhdźe 50 wopytowarjam předstaji Serbska komorna filharmonija pod nawodom Kathariny Dickopf na žurli SLA wuběr skerje rědšo hratych twórbow słowjanskich komponistow. Zazběh tworješe po kompetentnym zawodźe Symana­ Hejduški koncertantna suita „Přezpolo“ Jana Bulanka w za komornu wobsadku wobdźěłanej wersiji Christy Abels. Kruch, kiž kombinuje elementy serbskeje ludoweje hudźby, barokneje pychi a „antisowjetskeho formalizma“, so spočatnje trochu zdźeržliwje agěrowacym hudźbnikam naposledk dosć suwerenje poradźi. Slědowace „Tři modlitwy“ ze „Sinfonije V“ Jana Paula Nagela w aran­žemenće Lutza Lehmanna tohorunja bjezporočnje zmištrowachu. Při tym wědźachu wliw francoskeho impresionizma a ruskeje awantgardy na twórbu runje tak wotbłyšćować kaž partikle pólskeje postmoderny.

Budyšin (SN). Zwjeselaca to powěsć za kulturu w našim regionje, kotruž je łužiska zapósłanča w zwjazkowym sejmje Kathrin Michel (SPD) zašły pjatk w nowinskej zdźělence šěriła: Tři festiwale dóstanu srědki ze spěchowanskeho fondsa projektoweje towaršnosće „Iniciatiwa hudźba“. Z tutym instrumentom podpěruje Zwjazk popowu a jazzowu hudźbu. Z tym njeje jenož hudźbnikam, ale tež zarjadowarjam livehudźby poboku. Zaměr je zachowanje mnohotneje hudźbneje krajiny. 23 000 eurow přewostaja za festiwal Meta Solis. Kaž Kathrin Michel zdźěli, je fachowa jury při rozdźělenju srědkow wosebje festiwale z maksimalnje 15 000 wopytowarjemi wobkedźbowała. Ćežišćo spěchowanja běchu při tym festiwale we wjesnych kónčinach resp. zwonka metropolow. Wone dóstanu 71 proc. cyłkow­neje spěchowanskeje sumy 3,7 mio. Přiražka je jónkrótna a znajmjeńša 30 proc. kóštow ma zarjadowar sam njesć. Po informacijach na internetnej stronje je Meta­ Solis rosćaca skupina tuchwilu 20 młodych Serbowkow a Serbow, kotřiž so wo serbske kulturne poskitki zwonka mainstreama staraja.

Składnostnje 80. posmjertnych narodnin Bena Budarja je w Ludowym nakładni­stwje Domowina (LND) wot Měrany Cušcyneje wobdźěłane a rozšěrjene wudaće zběrki „Dźens sym połsta dubow sadźił“ wušło. Nowostka wopřijima – kaž mjeztym rozebrany prěni nakład – předewšěm krótkoprozu Budarja. Basnje a anekdoty kaž tež biografiski přehlad a bibliografija antologiju skulojćeja. Wčera přepoda jednaćel LND Syman Pětr Cyž wudowje awtora Ludmili Budarjowej dokładowy eksemplar. Knižnu premjeru wuhotuja štwórtk, 19. měrca, we wobłuku hudźbno-literarneho wječora „Wokomiki słónca“ w Serbskim ludowym ansamblu. Foto: Annett Šołćic