Wojerecy (SN). Podcast „That‘s #WHY!“, kotryž so ze storytellingom zaběra, je dotal něhdźe 20 000 słucharjow a słucharkow docpěł. Nětko startuje poskitk druhe koło. Wón je wobstatk komunikaciskeje strategije „#WHY! – Změna we Wojerecach“, kotraž bu 2022 we wobłuku idejoweho wubědźowanja fondsa simul⁺ ze 100 000 eurami wuznamjenjena. Nowa stafla měri so wosebje na potencielnych nawrótnikow a nowowobydlerjow. „Dźakowano podpěrje fondsa simul⁺ a dalšeho spěchowanja smy minjene lěta nowe ideje za komunikaciju zrodźili, kotrež su za zarjadnistwo skerje njetypiske. To pak bě a je nam dale wažne, zo bychmy z mnóstwa informaciskich poskitkow wusahowali a jónkrótnosć našeho města a jeho wuwića wu­zběhnyli“, rjekny Christian Hoffmann, nawoda zarjada za hospodarske spěchowanje, za nowinarske a zjawnostne dźěło. W druhej stafli Wojerowskeje produkcije wozmje fiktiwna protagonistka Julia słucharjow sobu na pućowanje po měsće zaběrajo so z temami z wobłukow kultura, swójba, turizm a powołanje. „That‘s #WHY!“ je darmotny poskitk na podcastowych platformach kaž Spotify a Apple Podcast.

1. małeho róžka 1700 zemrě na Budyskim tachantstwje tachant Měrćin Brückner z Brückensteina. Wón bě so wokoło 1650 w klóšterskej Nowej Wsy pola Kulowa ­narodźił. Po studiju teologije bě wot 1663 do 1671 kanonik w Budyšinje, po tym pjeć lět senior a 23 lět tachant Budy­skeho tachantstwa. Jako česćowar Prahi a prócowar wo dobre přećelske zwiski mjez Serbami a Čechami da wón křiž z dwójnym prěkušom, symbolom Pra­skeho arcybiskopstwa, na Budyskej serbskej cyrkwi Našeje lubeje knjenje při­prawić. Brückner, kotryž bu swojich zasłužbow dla do zemjanstwa pozběhnjeny, zdoby sej wulke připóznaće spěchowanja serbsko-katolskeho nabožinskeho pismowstwa dla. Měrćin Brückner von Brückenstein bě prěni najwyši duchowny w Bu­dyšinje. Najzasłužbniši bě rodźeny Ku­lowčan Franc Jurij Lok (1751–1831). Wón přiswoji sej w Praze ideje rozswět­lerstwa a zastu­powaše je tež we Łužicy, spisa rjad modlerskich a druhe nabožne knihi, spožči Handrijej Zejlerjej stipendij a załožowaše nowe šule w Kulowje a Budyšinje. Dalši z Kulowa pochadźacy biskop bě Jan Měrćin Nuk z Lichtenhofa (1720–1780). Manfred Laduš

Zyma so pomału minje a nalěćo so spłóšiwje pokazuje. Prěnje ptački so do našeje rjaneje Łužicy nawróća a słónco z chowanki fifola. Wutroba so wšěm wotewrja. Prěnje kwětki so pomału pokazuja a nalěćo powitaja. Zyma pak njeje hišće přetrata. Móže so přiwšěm stać, zo so wospjet sněh saje.

Jeli tuž njeje prawe wjedro za wulět do přichodneho zwěrjenca, móža sej naše najmjeńše dźěći nowu papjercowu BOOKii-knižku „Mój wobrazowy słownik – zwěrjata“ z Ludoweho nakładnistwa Domowina do rukow wzać, sej zwěrjeće zwuki kaž tež jich pomjenowanje w serbskej a jendźelskej rěči naposkać. Z něšto fantaziju nastawa zwěrjenc doma w dobrej stwě.

Po dyrdomdeju w priwatnym zwěrjencu trjebaja dźěći přestawku. Za to hodźa so rjane ilustrowane karty za masažu. Při kombinaciji rjaneho hrónčka z majkanjom chribjeta, nóžkow, rukow abo hłowy kóžde dźěćo wotpina. Wězo móža tež dorosćeni karty wužiwać. Što dźě dawa rjeńšeho hač masaža? Masažowe hrónčka su po počasach rjadowane. Tak hodźa so přeco zaso nowe kartki wupytać a mjezsobny poćah skrućić.

Dźensa před 80 lětami, 13. februara 1945, bu z najzrudnišim dnjom za saksku stolicu Drježdźany. Dotal njebu wulkoměsto nad Łobjom, kotrež bě swojich krasnych baroknych twarow dla swěto­znata metropola, wot ameriskich a jendźelskich lětadłow bombardowane. ­Sowjetska armeja steješe hižo sto kilometrow wuchodnje nad łužiskej Nysu, hdyž aliěrowane komanda přikaza Drježdźany přez bombardowanje zničić. Dwě hodźinje do połnocy 13. februara k 14. dnju tutoho měsaca zahaji so hoberski nalět ameriskich a jendźelskich wójnskich lětadłow na z ćěkancami z wuchodneje Němskeje a ze zranjenymi wojakami přepjelnjene wulkoměsto.

Hodźinje dołho mjetachu bomby na Stare a Nowe město a na dalše bydlenske wobwody Drježdźan. Domy so sypnychu a palachu so, tohorunja hasy, dróhi a naměsta, dokelž so tež palace bomby na město mjetachu. Rano zahe 14. februara docpě dalša žołma lěta­dłow město a tak cyły druhi dźeń dale a tež hišće 15. februara Drježdźany ­njesměrnje bombardowachu. Dohromady 3 450 bombowcow wospjet na město lećeše a swoje mordarske bomby ­mjetaše.